Sal 44 - Mam Ostuncalco Bible

Na'j Dyos qanb'il o'nb'il te Dyos

1Nman Dyos,

oje qb'iye' tu'nku' qẍkyine',

kyej q'ma'n qeye' kyu'n qmane'

aju' tb'inchaya kye,

kyoju' tq'ijlalil ojtxi':

2aku'ya ex xla'jankyeju' xjal

nche niman kye txqantl dyos,

kub' ttz'e'ysa'na kwitzju' nimaqtnam

ex e'kub' tq'o'nju'ya qmane' toju' kytx'otx'.

3Qu'n mya tu'n kyq'ob' ex mya tu'n kyk'uẍtx'e'nb'il;

ẍe kanb'ana'

myana' kyu'nkye xkanb'eta'ju' tx'otx'.

¡Tu'nate tq'ob'ju'ya, tu'n tipumala!

¡Ulku'ya tuk'i'l tajwalila,

qu'n intoq che tk'u'jla'na!

4¡Nman Dyos! ¡Nnimaqkawil!

Tu'na e'kanb'ana'ju' ttanama;

5tu'na nkub'a' kyi'ju' qajq'oje' qu'ne';

¡toj tb'iya nche b'aju' nche oktzaqpaj qi'je' qu'ne'!

6Qu'n layna' tz'okqewe' nk'u'j ti'ju' nsmaje',

ex lay chin kanb'ane' tu'n nk'uẍtx'e'nb'ile';

7tu'nateju'ya xkub'a' kyi'ju' qajq'oje' qu'ne',

tu'na sela' kych'ixawju' nche el ik'onqe'ye'

8¡Qo tzalajele' kukxju' ti'ja Nman Dyos,

kjawil qajwali'na tkyaqil q'ij!

9Naqtzun aju' matxi' qo' eltik'o'na;

matxi' tz'el qch'ixawe' tu'na.

Minti' nxi'tla kyuk'i'lju' qxjale' te q'oj.

10Maqo kub' oqe' tu'na kywitzju' qajq'oje';

In qo alq'anjtze' kyu'nju' nche el ik'unqeye',

inxikyiq'i'n tkyaqilju' kyajb'il.

11Maqo'x tq'o'na

naku'jxi'xtej rit aj txi' toj b'i'yb'il;

maqo'x t-sputi'na kyxolju' xjal nche niman kye txqantl dyos;

12naqxi'x xxi' t-suqu'na ttanama,

mixti'te qoklene' toj twitza.

13Mataja tu'n qb'aj yasune';

nqo' el ik'u'ne' kyu'nju' najlqe' nqayin qk'etze' ex inel qch'ixawe' kyu'n.

14Mataja tu'n qb'aj xmayine' kyu'n nche niman kye txqantl dyos;

ajkytzaj ka'yin qeye', nxi' kyukcha'n kywi' te xmayb'ilqeye'.

15Tzipin wele' tu'n nch'ixawe';

tkyaqil q'ij inel nch'ixawe'

16tu'n i'lb'ilweye' tu'n wajq'oje

nchin noktik'le'ne' ex nchin tyasu'ne'.

17Tkyaqilju' saj qi'je' lu,

mya tu'nwtju' matzik'tna'la qu'ne'.

¡B'ajx qoela' txalpujqe' ti'ju' tyola kyejni b'entti'j!

18B'ajx kub'a' qxima'ne' tu'n tkyej qtzaqpi'na

ex b'ajx kyeja' qtzaqpi'nju'ye' tb'eyila.

19Extzun nqo yajtijtle' tu'na

kyoj kyjul xo'j.

¡Matzaj tq'o'na t-xlekumil kamik qib'aje'!

20Nman Dyos, naqwit matzik'tna'la qu'ne'

ex ma'wt qo k'ulune' twitz juntl dyos min ojtzqi'n,

21ma'wtlo tila,

qu'n tojtzqi'na'ta tkyaqilju' toj tanmi xjal.

22Naqpena' tu'nela inelje qi'je'

tu'n qkub' b'yo'ne';

nqo senjtze' kse'nqe' rit nche'x iq'i'n toj b'i'yb'il.

23¿Nman Dyos, titiqu'n nnik'a' wtana?

¡Na'ntztib'a, ex we'ktza!

¡Lalun qo' eltik'o'na tejumajx!

24¿Titiqu'ntzun in xa' tewa'n twitza qeye'?

¿Titiqu'ntzun nnik'a' qna'le' tu'na,

extzun luqo'ye' inxi'x qoyajtiye'?

25Matxi' kub'qi'je' ex matxi' tz'el qch'ixawe',

inqo' jwonjtze' twitz tx'otx'.

26¡Iq'i'nktz tib'a

kuttzaja onilqeye'

qo' tkloma, qu'n nimta tk'u'jlalil!, Chiju' b'itzal.