Sal 118 - Mam Ostuncalco Bible

Nimxi'x tipumal Qman Dyos

1Kyq'onx chjonteye' te Qman Dyos, qu'n majx b'a'n te,

qu'n tejumajxju' tk'u'jlalil.

2Kymame' aj Israel:

Tejumajxte' tk'u'jlalil Qman Dyos. Chechiku'ye'.

3Kymame' pale:

Tejumajxte' tk'u'jlalil Qman Dyos. Chechiku'ye'.

4Kymame' aye'ye' nkynima'ne' Qman Dyos:

Tejumajxte' tk'u'jlalil Qman Dyos. Chechiku'ye'.

5Inkub'sane' te Qman Dyos tej nchin b'isune';

intzaj tb'i'ne' ex inttzaqpiye'.

6Ati te Qman Dyos wuk'i'le'; min nchin xob'e'.

¿Titi' ktb'incha'ju' xjal wi'je'?

7Ati te Qman Dyos wuk'i'le'; inchin toni'ne'.

¡Knka'yiye' ajtkub'kyi'ju' ntx'a'lti' kyk'u'j wi'je'!

8Ate b'a'nju' tu'n tokqe qk'u'j ti'j Qman Dyos

kyetwitz tu'n tokqe qk'u'j ti'j jun xjal.

9Ate b'a'nju' tu'n tokqe qk'u'j ti'j Qman Dyos

kyetwitz tu'n tokqe qk'u'j kyi'j nimaqxjal.

10Kkytxoli'kyib' kykyaqilju' nimaqtnam wi'je',

ma'tzun kub'kyi'j wu'ne' toj tb'i Qman Dyos.

11Okkytxoli'nkyib' wi'je' toj tkyaqil plaj,

extzun makub'kyi'j wu'ne' toj tb'i Qman Dyos.

12Okkytxoli'nkyib' wi'je' naku'j secha'lqe',

ex lwiy kub' maytz'aju' kytx'u'jil kse'n tq'aq'al tzqij ch'i'x;

¡kub'kyi'j wu'ne' toj tb'i Qman Dyos!

13Inxi' kylmo'ne' tu'n kytx'u'jil tu'n nkub' tz'aqe',

atzunte Qman Dyos ul onilweye'.

14Inchin b'itzane' te Qman Dyos, intzaj q'onte wipumale'.

¡Ate klol weye'!

15Inche b'itzanju' xjal tnik'alkyi'j

tu'n kytzalajb'il tojile kyja, qu'n mache kanb'an:

¡Makub'kyi'j ajq'oj tu'n tipumal Qman Dyos!

16¡Nimxi'x toklenju' tipumal Qman Dyos!

¡Kub'kyi'ju' ajq'oj tu'n tipumal Qman Dyos! Chechij.

17¡Lay chin kyimnaje', chin anq'ilwe'

tu'n txi' nchik'b'a'nju'ye' xtb'incha Qman Dyos!

18Makub' ttz'e'ysa'n Qman Dyos nwitze' kuw,

mixtzunti' xtaj tu'n nkyimnaje'.

19¡Kyjqome' tja Qman Dyos,

wajb'ile' tu'n wokxe' q'ol chjonte te!

20A ttzi tja Qman Dyos ja'lu,

ja che okyixa' tnik'alkyi'j.

21Chjonte teya Taye, qu'n machin tzaj ttzaq'we'na

ex machin tkola.

22Matxi' jawb'entju' ab'j kyej kysuchu'n b'inchal ja

te ab'j nim toklen.

23Matb'incha Qman Dyos ja'lu,

ex lab'te'nxi'xte' ja'lu.

24A q'ij ju'lu tb'inchante Qman Dyos:

¡qo'qe'tzun tzalaj toj ja'lo!

25Nman Dyos, b'inchama xtalb'il, ¡qo' tkloma!

Taye, b'inchama xtalb'il, ¡tu'n qtene' b'a'n!

26¡K'i'wla'nte' tzul toj tb'i Qman Dyos!

Inxi' qqani'ne' b'a'n kyib'aje' tzmaxtzu' toj tja Qman Dyos.

27Ate Dyosju' Dyos Manb'aj ¡intzaj tq'o'n spik'un qe!

kynk'um kyib'e' tuk'i'l tq'ob' tze toj kyq'ob'e'

tzmajx ajkypone' tk'etz q'olb'eb'l.

28Chjonte teya Nman Dyos,

kjawil nnima'nju'ye' toklena, qu'n aya Dyos.

29Kyq'onx chjonteye' te Qman Dyos, qu'n majx b'a'n te,

qu'n tejumajxju' tk'u'jlalil. Chiju' b'itzal.