1B'aj kychmo'n pilistey kyxjal tu'n kyq'ojin ex b'aj kyb'u'yi'n kyib' toj Soko, kytanam aj Juda, e'kub'tentzuntz Epes-damim, kyxol Soko tuk'i'l Aseka.
2Ex ikxte Sawul kyuk'i'lu' aj Israel b'aj kyb'u'yi'n kyib' ex eb'aj kub'ten toju' b'ya' Ela, b'aj kyb'incha'nkyib' tu'n kyq'ojin kyuk'i'l pilistey.
3E'kub'ten pilistey twi' jun witz, ex ikxkye aj Israel twi' juntl witz, kyej tenju' b'ya' kyxol.
4O'kx tetz jun xjal te q'oj kyxol pilistey, Kolyat tb'i, oxe'lo metr twe'. Atoqtzu' najla' toj nintnam Kat.
5Tokxtoq jun toj twi' q'ank'uxb'il, ex toktoq jun kolb'il ti'j q'ank'uxb'ilx, jun kyintal tk'i' junaq jun lib'r (1.21) talil.
6Exqe'ju' kolb'il twitz tqan, tuk'i'lju' tch'ut iq'i'ntoq ti'j tqul, q'ank'uxb'ilqe'x.
7Nimxi'xtoq twe' tch'ut kse'n jun tqul chmob'l xb'alun, k'uxb'il twi' te oxlajoj tk'i' nik'jan lib'r talal. Ex nejliju' onilte.
8Kub'tzun we' Kolat ex tma kye aj Israel te q'oj kjalu:
—¿Tiqu'n ẍe tzaja'ye' q'ojil nk'u'n kytene'? pilistey qinwe', aye'tzunkye' ajb'el qe'ye' te Sawul. Kysk'o'nktz junkye' kyxol tu'n ttzaj q'ojil wuk'i'le'.
9Qa kuw tu'n tq'ojin wuk'i'le' exqa machin kub'e' tu'n, qo' okyele' te k'a'yi'nmajin kyeye', qatzun makub' wu'ne', aye'tzuntze' che okyel te k'a'yi'nmajin qeye', chij kye.
10Ex e'oktik'le'n Wolyat aj Israel, ikjalu: ¡Kychq'ontze' jun ichan tu'n tq'ojin wuk'i'le' ja'lo!, chij.
11Tetzunj kyb'inte Sawul ex kykyaqilju' aj Israel aju' tma pilistey, eb'ajxob' ex e'jaw lu'lun b'a'nxi'x.
12Atitoqtzun jun ichan toj B'elen, Jese tb'i, matxi'toq tijin toju' tq'ijlalil Sawul. Ate'toq wajxaq tk'walju' ichan lu, ex axtoq junju' Dab'i.
13-14Ojetoq che b'ajxju' oxe' tnejel tk'wal toj q'oj tuk'i'l Sawul, aye' Elyab', Ab'inadab' ex Sama. Atzunte Dab'i tu'nju' ch'i'p,
15ntoq xi' jatoq ta'qe' Sawul ex ntoq anjtzti'j B'elen tu'n txi' k'ik'lel rit.
16Atzu'n pilistey lu kukxtoq tetzu' ik'lelkye aj Israel tkyaqil prim ex tkyaqil qale, b'aj kab'naq (40) q'ij kukxtoqu' tu'n.
17Jun q'ij xitma'n Jese te Dab'i:
—Iq'i'ntza junaq litr wensi'n triy, exqe'ju' lajoj wab'j lu, ex wix q'inxa kyeju' ttzika ja tkub'a' kyxmuj.
18Ex q'inxa lajoj ptij kyes lu teju' chaq'ul kye xjal te q'oj. Ka'yinxa se'nta'qe' ttzika ex q'intza tqanil qa b'a'nqe', chijte.
19Aye'tzunkye Sawul kyuk'i'lju' ttzik Dab'i ex kykyaqilu' aj Israel intoq che q'ojin kyuk'i'l pilistey toju' b'ya' Ela.
20Tetzu'n juntl q'ij, jaw we' Dab'i b'a'n prim ex e'kyajtq'o'nju' rit tu'n kyxi' tka'yi'n juntl, kub'tzun b'etz tu'n, exi' tiq'i'nju' ti'xti' xitq'o'n tman te. Tetzunj tpon jatoq ta'qe'ju' ttzik, intoq kyb'incha'n kyib'ju' xjal te q'oj tu'n kyex q'ojil, ex intoq che b'ajẍch'in kuw.
21Kub' kytxoli'n kyib' pilistey toj jun plaj, ex kub' kytxoli'n kyib'u' aj Israel toj jun plajtl.
22Atzunte Dab'i kyej tq'o'nju' tiq'i'n teju' ka'yilkye kyq'ojb'il ex kywa, xi' ojqelantzuntz kyky'etzu' xjal te q'oj txoli'n kyten qanilte kyeju' ttzik se'ntoq ta'qe'.
23Tetzunj intoq yolin Dab'i kyuk'i'l, etz Kolyat, twi' nintnam Kat, kyxol pilistey te q'oj txoli'ntoq kyten, ex aq'wi jumajtl ik'lelkye aj Israel, kse'nxju' ntoq tb'incha'n. Tb'i Dab'i ja'lu.
24Naqtzun nb'ent txi' kyka'yi'n aj Israel ichan lu, tzaj nim xob'il kyi'j ex e'kub' oq twitz,
25ex kyma: ¿Ma makyilju'ye' ichan setz? ¡Matzul ik'lelqe! Alkyete makub' ti'j tu'n, kxe'l tq'o'n nimaqkawil txqan tq'inumal, kxe'l tq'o'n tmyal te t-xu'jil exqe' toj tja lay che q'ontl chojb'il te nimaqkawil, chechij.
26Xi'tzun tqani'n Dab'i kyeju' ate'toq tk'etz:
—¿Titi' kxe'l q'o'n teju' ichan makub' b'yonte pilistey lu, tu'n mitz'ela' qch'ixaw ayo' aj Israel? ¿Ti'tzu'n toklenma' pilistey lu, min niman te Dyos, tu'n kyoktik'le'n ttanam Dyos itz'?, chij.
27Axte xikytzaq'we'n kse'n matxitoq kyma tnejel, ti'ju' kxe'l q'o'n teju' xjal qama kyimu' Kolyat tu'n.
28Atzunte Elyab', ttzik Dab'i, tb'i intoq yolin Dab'i kyuk'i'lju' xjal lu, tzaj ttx'u'jil ex xitma'n te:
—¿Titi' Sajtla'ya tzalu? ¿Alkye xkyaj tq'o'na k'ik'lelkyeju' jte' rit ate'qe' toj chq'ajlaj? Wotzqi'ntlwe' aya jaxja nnokxa' tq'o'ntib'a ex wojtzqi'ne' t-xima myab'a'n, matzulta naq ka'yilte q'oj, chij te.
29Atzunte Dab'i xittzaq'we'n:
—¿Ti'tzu'n matxi' nb'inchaye'? Tzmape'na' ẍin yolin ch'i'we', chij.
30El lq'etzuntz ti'ju' ttzik, atzunj txitqani'n te juntl, ax yolju' xiq'ma'n te.
31Aye'tzu'n eb'inte Dab'i nxjelun, exi q'malte te Sawul, tchaq'tzun Sawultz tu'n txitxko'n Dab'i tk'etz.
32Xi'tzun tma'n Dab'i te Sawul:
—Mix-a'lote tu'n t-xob' tema' pilistey lu, qu'n ayi'nku'we', ajb'el teya, chin xe'l q'ojil tuk'i'l, chij.
33Atzunte Sawul xittzaq'we'n:
—Myab'a'n tu'n txi'ya tjunala q'ojil ti'j ma' pilistey lu, qu'n tzmaxi'x ku'xuna; atzunte' ichan lu q'ojilx atxi'x toj tku'xumal, chij te.
34Xi'tzun ttzaq'we'n Dab'i:
—Ayine' ajb'el teya, kse'n nchin k'ik'lene' kyi'ju' trit nmane', qama tzul jun oso mujqa jun b'alun q'il jun rit,
35nchinx lpeye' ti'j ex inel wiq'i'ne' toj kytzi; qatzun matzaj wi'je', ntzyetju' tjaq' ttzi wu'ne' ex nchin oktene' woch'ilte tzmax ajtkyim.
36Qu'mtzun, b'a'ntzunqa jun b'alun mujqa jun oso, nche kyim wu'ne', ayine' ajb'el teya nimaqkawil. Ikxtzu'n kb'ajela' ma' pilistey lu min niman te Dyos, qu'n mache oktik'le'n ttanam Qman Dyos itz'.
37Ate Qman Dyos matxi' klonweye' toj kytzi b'alun ex oso, ex chin tkla'ye' tema' pilistey lu, chij.
Xi'tzun tma'n Sawul te:
—Kuna' txi'ya ex awt Qman Dyos txi' tuk'i'la, chij.
38Xi'tzun tma'n Sawul tu'n tokq'o'n t-xb'alun Dab'i, kse'nxju'te nnajb'en toj q'oj ex tu'n tjax q'o'n jun toj twi' q'ank'uxb'il ex tu'n tokq'o'n jun kolb'ilte.
39Mankb'ilxitzun oktk'lo'n Dab'i k'uẍtx'e'nb'il tk'u'j, tu'ntzun tpaj min naq'litoq tu'n kyajb'en q'ojb'il lu tu'n, mixpe' b'enta' tb'et kyuk'i'l. Xitma'ntzuntz te Sawul:
—Lay b'ant nb'ete' kyuk'i'lju' lu, qu'n min naq'liqine', chij.
E'eltiq'i'ntzuntz ti'j,
40tzaj tiq'i'n tpa te xob'l, ex jaw t-sk'o'n jwe' tal ab'j q'ib'un kyi'j toj a', ex ku'x tq'o'n toju' tpa iq'i'ntoq tu'n, twab'atzuntib'tz twitzju' pilistey tuk'i'lju' tpa te xob'l tzyu'ntoq tu'n.
41Ex Kolyat pilistey chab'a ttzaj lq'e tk'etz Dab'i. Nejli onilte twitz.
42Tetzunj tka'yinte pilistey Dab'i, ex tej tlonte qa tal ku'xun, ex tb'anil ka'yin, minxi' toj twinqil,
43ape' tma'nju' te:
—¿Ma tx'yanqine' teya, tu'n ttzaja b'yolweye' tu'n tze?, chij.
Ex tzaj ttxko'n toj twi' Dab'i toj tb'iju' tdyos.
44Expe' tzaj tma'n te:
—¡Kutzaja tza'lu, kxel nq'o'na te kychi' k'utz ex kychi' tojk'ul txkup!, chij te.
45Atzunte Dab'i xittzaq'we'n te:
—Tzula wi'je' tuk'i'l k'uẍtx'e'nb'il, ch'ut ex b'o'sch'ut, ayintzunwe' machinxe' ti'ja toj tb'i Qman Dyos nimtipumal, janqo nimana'ye', ayo'ye' xqo oktik'le'na.
46Kb'el q'o'na toj nq'ob'e' ja'lo tu'n Qman Dyos, ex texju' kmoj ja'lo kb'el nb'yo'na ex k'elel nk'uẍpi'ne' twi'ya, aye'tzu'n t-xjala te q'oj che kxe'lnq'o'ne' te kychi' k'utz ex kychi' tojk'ul txkup. Kykyaqiltzu'n xjal twitz tx'otx' k'elelkynik' qa aku'te Dyos ati toj Israel;
47kykyaqilju' ate'qe' tza'lu k'elelkynik' qa min nkolonte Qman Dyos tuk'i'l k'uẍtx'e'nb'il ex ch'ut. Te Dyoste' q'oj lu, qu'mtzun che b'elq'o'ne' ja'lo tu'n toj qq'ob'e', chij te.
48Tzajtzun tzaqpaj pilistey ti'j Dab'i, ex ikxte Dab'i lwiyxi'x tb'inchatib' tu'n tq'ojin ti'j:
49ku'x tq'o'n tq'ob' toju' tq'ob'pa, ex jatztiq'i'n jun ab'j, xit-xontzuntz tu'n tpa te xob'l ex majx tplajku'xi'xu' pilistey aq'pona'. Majx xi' tawa'ntib' ab'j toju' tplaj ex pon joqpajtzuntz twitz tx'otx'.
50Ikytzu'n kub'a' ti'ju' pilistey tu'n Dab'i. Naq tu'n jun pa te xob'l ex tu'n jun tal ab'j kub'a' tb'yo'n. Tu'ntzu'n mixtoqti' tk'uẍtx'e'nb'il iq'i'n,
51xi' ojqelan ti'ju' pilistey, ex eltiq'i'n tk'uẍtx'e'nb'il, jatztiq'i'n toj tja, tu'nxtzu'n kub'a' tb'ajsa'n. Tb'ajlenxi'tzun ja'lu, el ttx'e'mu'n twi'.
Tetzunj kyka'yinte aj Pilistya matxi'toq kyimu' kynejel b'a'nxi'x q'ojin, e'kub' oqtzuntz.
52E'b'jaw ẍch'intzun xjaltz aj Israel ex aj Juda, tu'n kyxi' q'ojil, eb'ajxlpe kyi'j tzmax ttxa'n tnam Kat ex ttzi nintnam Ekron. Nimtoq txqan xjal pilistey te q'oj kyimniqe'tl pak'a'jqe' toj tkyaqilju' b'e txi'x Saaraym tu'n tpon Kat ex Ekron.
53Kyanjtzlenxi'tzu'n aj Israel knolte kyi'j, b'je'tz kyiq'i'n tkyaqilju' ti'xti' toju' kyxmuj pilistey.
54Tzajtzun tiq'i'n Dab'i twi' Kolyat toj Jerusalen, aye'tzu'n tq'ojb'il Kolyat e'xi' tiq'i'n toju' tpach.
55Matxi'toqtzun txitqani'n Sawul te Ab'ner ju' nejenel kye t-xjal te q'oj, tej tka'yinte ikytoqu' tex Dab'i q'ojil tuk'i'l ma' nin pilistey, kjalu:
—Ab'ner, ¿alkye tmanju' ku'xun lu?, chij.
56—Nimaqkawil, axxi'x min b'i'n wu'ne', chi Ab'ner xittzaq'we'n.
—B'inx natzuna alkye, chij te.
57Qu'mtzun, tej tanjtzti'j Dab'i, tkub'lenxi' tb'yo'n Kolyat, expe' iq'i'nju' twi' tu'n, xi'k'le'n tu'n Ab'ner twitz Sawul,
58xi'tzun tqani'n Sawul te:
—Q'mantza weye', q'a, ¿alkye tmana? chij.
Xi'tzun ttzaq'we'n Dab'i te:
—Awe' nman Jese aj B'elen, ajb'el teya nimaqkawil, chij.
Who We AreWhat We EelieveWhat We Do
2025 by iamachristian.org,Inc All rights reserved.
