Jue 9 - Mam Ostuncalco Bible

Kawin Ab'imelek

1Xi' Ab'imelek, tk'wal Jedeon, yolil kyuk'i'lju' twitze'l ttxu toj Sikyem. Ex xitma'n kye kjalu:

2—Kxe'l nkub'sa'ne' kyeye', qwitze'lku'qib', kymanxe' kye xjal aj Sikyem tu'n tkane toj kywitz qa a b'a'nju' tu'n tkawin naq jun xjal qib'aj ex mya kykyaqilu' oxnaq lajoj (70) tk'wal Jedeon, chij.

3Tu'ntzu'n kywitze'l kyib' tuk'i'l Ab'imelek, kymujb'a kyib' tuk'i'l, exi'tzuntz q'malte kyeju' xjal aj Sikyem tu'n kyxilpe ti'j.

4Expe' tzaj kyiq'i'n oxnaq lajoj (70) saqpwaq toju' tja B'aal-b'erit, xikyq'o'ntzuntz te Ab'imelek. Tuk'i'ltzu'n pwaq lu, exi tchjo'n Ab'imelek jte' b'yolxjal tu'n kyxi' tuk'i'l. Exi'tzun tuk'i'l

5toj tnam Opra, janajana' Jedeonju' tman, ti'jtzun junx ab'j ekub'a' kyb'yo'na'ju' oxnaq lajoj (70) ttzik ex titz'in Ab'imelek. Naq o'kx Jotam ju' kych'i'pil b'ant tewan ex klet.

6Yajxi'tzuntel kykyaqilju' xjal aj Sikyem ex aj B'et-milo b'aj kyb'u'yi'n kyib' t-xeju' b'ansi ex tk'etzju' xjan ab'j toj Sikyem ex okkyq'o'n Ab'imelek te nimaqkawil.

7Tej tb'inte Jotam, jaxtzuntz twi'ju' witz Jerisim, tzaj t-ẍch'i'ntzuntz kuw tu'n kyb'inte tnam kjalu:

¡Chin kyb'intze' b'a'nxi'x, ichan aj Sikyem! ¡Che tzajel b'i'ntzuntze' tu'n Qman Dyos!

8Ati junmaj kyajb'iltoqju' tze jun nimaqkawil kyib'aj, ex xikyma'n teju' tze Olib'o tu'n tok te kynimaqkawil.

9Atzunte' Olib'o min taj, qu'n qatoq matz'ok te nimaqkawil kyeju' tze, lay taq'tl aseyt, ju' in ajb'en tu'n kynimetju' ichan ex tu'n tnimet Qman Dyos.

10Aye'tzunju' tze xikyma'n teju' tqan lob'j iw tu'n tok te kynimaqkawil.

11Atzunte' tqan iw min taj, qu'n qatoq matz'ok te nimaqkawil kyeju' tze, lay taq'tl lob'j iw chi' ex k'ok'j.

12Aye'tzunju' tze xikyma'n te tqan ub'a tu'n tok te kynimaqkawil.

13Atzunte tqan ub'a min taj, qu'n qatoq matz'ok te nimaqkawil kyeju' tze lay taq'tl b'in, ju' in ajb'en tzalajsalkye ichan ex te Qman Dyos.

14Te b'ajsb'iltzun xikyma'nju' tze te jun ch'i'x tu'n tok te nimaqkawil.

15Atzunju' ch'i'x xitma'n kye qa ax qa kyajb'iltoq tu'n tok te nimaqkawil kye, kykyaqilx atitoq tu'n kyokx tjaq'ju' t-xlekumal; qatzun min kyajb'iltoq tu'n tok te nimaqkawil kye, che b'ajeltoqtzun tpati'n tzetz k'ute toj Lib'ano.

16Atzu'n ja'lo kxe'l nqani'ne' kyeye': ¿Ma b'a'ntzun xkyb'inchaye' ex ma tojxi'x tu'me'l sok kyq'o'ne' Ab'imelek te nimaqkawil? ¿ma b'a'nju' xkyb'inchaye' te Jedeon ex kyeju' tk'wal kse'nxju' b'a'n tb'incha kyeye'?

17Qu'n taq'na' te nmane' tchwinqlal naq tu'n kpaje' tej tq'ojin tu'n kytzaqpete' toj kyq'ob' madyan;

18aye'tzunkye' mache b'jo'k tzaqpaje' kyi'ju' toj tja nmane', ex matxi' che kub' kyb'yo'ne' oxnaq lajoj (70) tk'wal ti'j jun ab'j. Expe' naqch'i'n ja'lu toj kywitze', qu'n matxi' tz'ok kyq'o'ne' Ab'imelek te nimaqkawil, talju' tqya Jedeon, naq tu'nju' tal kywitze'le'.

19Atzu'n kxe'l nma'ne' kyeye' ja'lo: qa b'a'nju' xkyb'inchaye' exqa tu'me'l xkyb'inchaye' ti'j Jedeon ex kyi'ju' toj tja, b'a'nwt che'xa'ye' tuk'i'l Ab'imelek, ex b'a'nwt txa' Ab'imelek kyuk'i'le';

20qatzun min, ¡tz'etzxwit jumin jun q'aq' ti'j Ab'imelek tu'n kyb'aj kykyaqilju' xjal aj Sikyem ex aj B'et-milo, ex ikx tz'etzxwit jumin jun q'aq' toj Sikyem ex toj B'et-milo tu'ntzun tb'aj Ab'imelek! chi Jotam.

21Tb'ajlenxi'tzun tma'n Jotam ja'lu, xi' oq ex xi' najal B'eer, qu'n intoq xob' te Ab'imelek ju' ttzik.

22Oxe' ab'q'i kawin Ab'imelek kyib'aj aj Israel,

23tzajtzun tq'o'n Qman Dyos jun pa'jtib'il kyxol Ab'imelek kyuk'i'lju' xjal aj Sikyem, tu'n tjaw kyiq'i'nkyib' ti'j.

24Iktzu'n tchoja' Ab'imelek kykamikju' oxnaq lajoj (70) tk'wal Jedeon, ex ikx kychoja' xjal aj Sikyem e'onin tuk'i'l.

25Exi' kychq'o'n aj Sikyem kyxjal kyoj k'ul tu'n kyalq'an kyi'ju' xjal intoq che ik' kyoju' b'e nqayin kyk'etz. Ex tb'i Ab'imelek ja'lu.

26Jun q'ij ik'x Kaal, tk'wal Eb'ed, kyuk'i'lju' ttzik e'titz'in toj Sikyem ex kub' kywitzju' aj Sikyem tu'n,

27e'exju' xjal lu toj kojb'il b'uyil lob'j ub'a ex kub' kyb'incha'n b'in, ex kub'kyik'sa'n jun ninq'ij, intoq che wan extoq nku'x kyk'wa' toju' kyja kydyos, ex intoq che yasun ti'j Ab'imelek.

28Intoq tma'n Kaal kjalu: ¿Ti'xi'xtzu'n toklen Ab'imelek toj twitz? Naqna' jun tk'wal Jedeonte' ex a Seb'ul onilte. Yajtzunqe aj Sikyem qo', ¿titi'qo'tzunqe tu'n qten te majin k'a'yi'nqo' kye? Qa qajb'ilqe tu'n qok te majin k'a'yi'n te Amor ju' kub' q'onteju' tnam Sikyem, ex mya te tmajin Ab'imelek.

29¡Noqwit ayine' nejenel kyeye', jaku' tz'ex nxla'ja'ne' Ab'imelek, chij, expe' tmatl, Wixchaqa Ab'imelek, q'inqe'tzju'ya t-xjala ex qoq'ojin! chij.

30Tetzunj tb'inte Seb'ul, kawil toju' nintnam, ti'toqu' ntma'n Kaal, tzaj ttx'u'jil

31xitzun t-sma'n tqaniltz te Ab'imelek atitoq toj Aruma kjalu: lu te' Kaal tk'wal Eb'ed, matxi' tzul kyuk'i'lju' ttzik toj Sikyem, ex matxi' tz'okten oksalte kyk'u'ju' nintnam tu'n tjaw kyiq'i'nkyib' ti'ja.

32Qu'mtzun kuttzaja te qonik'an kyuk'i'l t-xjala te q'oj ex kyewinxkyib'e toj kojb'il.

33Atzun q'ojina ti'ju' nintnam ajtjawu'l q'ij te prim, ajtzun tetz Kaal kyuk'i'lju' t-xjal q'ojil ti'ja, b'inchama aju' tajb'ila ti'j, chij.

34Etztzun Ab'imelektz kyuk'i'l kykyaqilu' t-xjal te qonik'an ex xikyaq'pu'nkyib' toj kyaje' tnej ti'jileju' tnam Sikyem ex eb'ajkub' jutze.

35Tetzunj tetz Kaal ttziju' nintnam, etz Ab'imelek kyuk'i'lju' t-xjal te q'oj jachaq jutzla' qe'toq.

36Tej kyxitka'yi'n Kaal, xitma'n te Seb'ul kjalu:

—¡Ka'yinxpe'ya tk'ujwitz, xi'kyku'tz txqan xjal q'ojil! chij.

—Mixti'te', tewin witzte' inxi' tka'yi'na, chi Seb'ul xittzaq'we'n te.

37Atzunte Kaal xitma'ntl te:

—¡Ex xi'kyku'tz txqantl xjal q'ojil twi'tlu' witz tk'u'j tx'otx' tb'i! ¡Ex jun tnejtl tzul toju' b'e inik' t-xe b'ansi kye ajyo'ẍ! chij.

38Xitzun tma'n Seb'ultz te: —¡Yolintzuna ja'lo la'j! ¡Ina' tma'na qa mixti' toklen Ab'imelek tu'n kyoke' te tmajin! luqe'tzu'n xjal te q'oj mixti'x che ela' teya. ¡Q'ojin tzuna kyuk'i'l ja'lo! chij.

39Etztzun Kaaltz kyuk'i'lu' xjal aj Sikyem q'ojil ti'j Ab'imelek.

40Tetzunj t-xitka'yi'n Kaal Ab'imelek, kub' oq twitz, xi'tzun lpe Ab'imelektz ti'j tzmax ttziju' nintnam. Ex nim txqan xjal eb'aj Kub' tb'yo'n.

41Kyajtentzun Ab'imelektz toj Aruma, atzunte Seb'ul e'ex t-xla'ja'n Kaal kyuk'i'lju' ttzik ex titz'in.

42Te juntl q'ij, e'exju' xjal aj Sikyem toj kojb'il. Tetzunj tb'inte Ab'imelek,

43eb'aj tnk'u'n t-xjal te q'oj toj oxe' tnej, e'kub' jutzetzuntz toj kojb'il; atzunj tka'yinte xi'toq kyetzju' xjal aj Sikyem ttziju' nintnam, e'etz jajutzla'qe'toq ex minab'en kyok tzaqpaj kyi'j.

44Oktzaqpaj kyuk'i'lju' jun tnej t-xjal te q'oj ex e'kub'ten ttziju' nintnam, aye'tzu'n kab'e' tnejtl intoq che q'ojin ex intoq che kub' kyb'yo'nju' ntoq che b'et toj kojb'il;

45ex b'aj q'ij q'ojin Ab'imelek ti'ju' nintnam Sikyem, tzmax tkub'ti'j tu'n. Kub' t-xitu'ntzun nintnam ex e'kub' tb'yo'n kykyaqilju' xjal najlqe' toj, ex kub' tchto'n atz'an toj tkyaqilju' nintnam.

46Tetzunj kyb'inte xjal aj Majdal-sikem titi' matxitoq tb'incha Ab'imelek, exi' klolkyib' toju' ja kuwsa'n toj tja kydyos El-b'erit.

47Tetzunj tb'inte Ab'imelek qa kykyaqil b'u'yi'ntoq kyib' atzu',

48xi' kyuk'i'lju' t-xjal te q'oj twi' witz Salmon ex tzaj ttx'e'mu'n jun tq'ob' tze tu'n jun k'uxb'il; jax tq'o'ntzuntz ti'j tqul ex xitma'n kyeju' t-xjal tu'n kyb'inchante kse'nxte.

49Kykyaqilx tzaj kytx'e'mu'n tq'ob' tze ex e'oklpe ti'j Ab'imelek, tetzunj kypon tk'etzju' tja kydyos xjal nimin twe', b'jo'k kyb'u'yi'n tkyaqilju' tq'ob' tze ex okkyq'o'n tq'aq'al, iktzu'n eb'aj kub'a'kyb'yo'n aj Miwdal-sikyem, ichan ex qya, qapelo kab'k'al lajnaq (1,000) kyb'aj.

50Xi'tzun Ab'imelektz kyuk'i'lju' t-xjal te q'oj ti'ju' nintnam Teb'es, b'aj kytxoli'n kyib' ti'jile ex tzyet kyu'n.

51Atitoq jun ja nimin twe' te kolb'il toj nky'ajchaqju' nintnam lu, atzuntzu' e'okxa' kykyaqilju' xjal najlqe' toju' nintnam ewal toj, e'ichan ex qya. B'je'tz kyjpu'nju' ja b'a'nxi'x ex e'jax twi'xi' ja;

52aye'tzunkye Ab'imelek kyuk'i'lju' t-xjal e'pon tzmax ttziju' ja nimin twe' ex e'oktzaqpaj q'ojil ti'j. Kxi'toqtzun toktq'o'n Ab'imelek tq'aq'al,

53tej tku'tz t-xon jun qya jun ab'j te cheb'l tib'aj, tojkuxi'x twi' kub'a' tz'aq ex majx el k'ab'chaju' twi'.

54Lwiyxi'xtzun tzaj ttxko'n Ab'imelek jun tonil toju' q'oj ex xitma'n te: iq'i'nktza tk'uẍtx'e'nb'ila ex chin tb'yoku'ya, qu'n min wajb'ile' tu'n tq'manjtz qa jun qya xkub' b'yonweye', chij. Tzajtzunju' onilte aq'pon t-xyu'n tu'n k'uẍtx'e'nb'il, iktzu'n kyima'.

55Tetzunj kyka'yinte aj Israel matxitoq kyim Ab'imelek, ajnkyi'j kyja.

56Ikytzu'n tchoja' Ab'imelekju' til tb'incha ti'j tman tu'n Dyos tej kykub' tb'yo'nju' oxnaq lajoj (70) ttzik ex titz'in.

57Ex tb'incha Dyos tu'n tkub' kychjo'n xjal aj Sikyemju' kyil. Iktzu'n japuna'ju' kyej tqani'n Jotam tk'wal Jedeon kyib'aj.