1Matz'el tqanil qa ati jun kxole' makub' t-xu'jla'n ttxub'l. Mixyab'a'nte' ajpaji'n lu, mixpenati' nb'aj kxol witzleb'il.
2¡Extzun inxi'x jaw knima'n kyib'e'! ¡In pe'wtlo tzaj kb'ise' tu'n! Ati tu'n tex xla'jet te' xjal nb'inchante lu kxole'.
3Atzunwe', maskye mix-a'lo' qine' kxole', ntinwe' kyuk'i'le' toj wanmiye'; ku'wtloj antine' kxole', matxi' txinma'nwe' kb'inchetel ti'ju' xjal lu.
4Chin tenb'elwe' kyuk'i'le' toj xewb'aj ajkyb'uyinte kyib'e', ex ktenb'el tipumal Qajaw Jesus kyuk'i'le'. Tojtzun tb'i Qajaw Jesus,
5tu'n t-xiq'etju' ichan lu te tajaw il, tu'n tyajti t-xmilal, tu'ntzun tanjtzti'j tanmi ex tu'n tklet ajtul Qajaw.
6Mixya tu'me'l tu'n tjaw knima'n kyib'e'. B'i'ntl kyu'ne' aju' q'ma'n: Tu'n ch'i'n ttx'amal ntx'amseta' tkyaqilju' q'otj, chij.
7Qu'mtzun kq'omixe' tx'am lu kyi'jxi'ye' nche kub'o'lje' tu'n, tu'n kyoke' kse'n wab'j nb'inchet ti'j tq'otjel ak'a'j. Ikyqe'ye' se'n wab'j mixti' ttx'amal nxi' wayet toj tq'ij Tzaqpib'l. Qu'n a Krist, qpoj tman rit te Tzaqpib'lqe, kyim te chojb'il tu'n qpaj.
8Ati tu'n tkub' qik'sa'nqe Tzaqpib'lqe tuk'i'lju' wab'j mixti' ttx'amal tu'nju' ax mixti' tq'oj, mya tu'n ojtxi' ttx'amal ex mya tuk'i'l ttzu'wal myab'a'n ex pi'sil.
9Xintz'ib'a'ne' kyeye' toju' juntl wuje' tu'n lalun kmujb'a kyib'e' kyuk'i'lju' nche'x toj ajpaji'n.
10Mya xa'nma'nju'ye' tu'nwt majx tu'n tel kypa'n kyib'e' kyi'ju' nche'x toj ajpaji'n, mo pi'sqe', mo eleq' qe', mo witzleb'ilqe', tu'n tb'ant te'lu ati tu'n kyik'e' jun elx twitz tx'otx'.
11Aweju'ye' xinma'n kyeye' tu'n lalun kmujb'a kyole' kyuk'i'l, tu'nwt tok kq'o'n june' nche'x toj ajpaji'n, mo pi'sqe', mo witzleb'ilqe', mo txkol ilqe', mo tx'ujtenilqe', mo eleq' qe', te kytzike' mo kyitz'ine'. Mixpeti' tu'n kwane' junx kyuk'i'lju' xjal lu.
12-13Mixti'we' woklen tu'n nyolin kyi'ju' na'mx kyokslan; ate Dyos q'malte se'n che kjela'. Aye'tzunkye' nche yolintle' kyi'ju' ate' kxole'. Qu'mtzun kyiq'imixe' aj il lu kxole'.
Who We AreWhat We EelieveWhat We Do
2025 by iamachristian.org,Inc All rights reserved.
