1 P CHIK'B'AB'L - Mam Ostuncalco Bible
CHIK'B'AB'LAju' u'j lu xisma'n kyeju' okslal najlqe'toq toj tkyaqil twitz tx'otx' kse'nqe' junjuntl u'j, naqtzun ate' u'j lu xi' xa' q'o'na' kye okslal najlqe' toj tnayajkya'j toju' tx'otx' b'o's Asya (1.1-2) aye' intoq ljonjtz toj kyq'ij ex intoq che yajti tu'n tpaj okslab'l. Aju' kub' tz'ib'a'nte u'j lu nokten q'uqb'alte kyk'u'j ex kuwsalkye, ex nxitna'n kye kse'n ẍekleta' tu'n Dyos ex matxi' tzaj tq'o'n jun kychwinqlal q'uqlixi'x tk'u'jlalil (1.3-12): Naqx tu'n tkamik Jesukrist ex tu'nju' jaw anq'in kyxol kyimni. Ex a q'uqb'ab'lxi'x qk'u'ju' tziya'n qa tzul jumajtl. Tu'nju' nche yajti okslal nela' tnik'tzil qa ati kyokslab'l, tojtzu'n joyb'ilkyi'j ati tu'n kyanq'in kse'n matxi' kub' kyxjansa'nkyib' tuk'i'l Krist ex te Dyos qe'tl (1.13—2.10).Tu'nju' ma'toq kyb'i qa ate Krist ojexi'x yajti, kymatzuntz qa maskye ikxkye che yajtel naqx tu'n tb'inchetju' b'a'n ex myaju' myab'a'n, ex tu'n tik'x tkyaqilju' yajb'il kyu'n naqx tu'n okslab'l. Aju' tz'ib'alte u'j lu intq'o'n nab'l kyeju' majen ex kyeju' kyajaw, ex kyeju' mjeb'niqe', ex kye kykyaqil okslal nxa' toqxenina' tu'n tten kyk'u'jlalil kyxol (2.11—4.19). Te b'ajsb'iltzun nyolin kyeju' tijwnaq nche aq'unan kyxol okslal, ex kyeju' ku'xun, ex majx nxi' tq'uqb'a'n kyk'u'j kykyaqil qa ate Dyos kb'el k'iwlankye ex ktzinjsalkye naqa sik'xju' yajte'n kyu'n (tnej jwe').
