Ec 5 - Mam Ostuncalco Bible

Ati tu'n tjapun qyol nxiqtziya'n twitz Dyos

1Aj txi'ya toj tja Dyos, ka'yinxa tu'me'l: lq'eka ex b'ina tu'n tkyaqil tk'u'ja te Dyos, kyetwitz tu'n tkub' tq'o'n chojb'ila kse'n nkyb'incha'n xjal mixti' kynab'lju' min nnel kynik' qa ilu' nkyb'incha'n.

2Lalun txi'naj ttziya'n jun tyola tu'n ttziya mujqa tu'n tnab'la te Qman Dyos, qu'n toj kya'j ta'te Qman Dyos, atzunta twitz tx'otx'. Qu'mtzun o'kxte q'manxju'ya aju' kb'entel tu'na,

3qu'n qa nqo ximan nim inokok toj qwitz, exqa nim nqo yolin ati maj myab'a'ntlju' qyol nxiqma'n.

4Ajttziyante jun tyola twitz Qman Dyos, lwiyxi'x japun tu'na, qu'n min ntzalaj kyi'ju' mixti' kynab'l. Japunx tu'na aju' oje tmaya,

5qu'n ate b'a'nju' min nxiqtziya'n kyetwitz nqtziya'n extzu'n lay japun qu'n.

6Lalun taja tu'n tb'inchan ila tu'n ttziya, qu'n jaku' tmatla twitzju' t-sanjelal Qman Dyos qa naq xtzpeta ti'j tyola. ¿Tiqu'n k'okyela' tq'o'na ttx'u'jil Qman Dyos tu'nju' kxel ttziya'na naq tu'n tkub' t-xitu'nju' matxi' b'ent tu'na?

7Qu'mtzun, tu'nju' nim txqan ti'xti' inokok toj twitza ex nim txqan tyola ex milchaqx ti'xti' mixti' kynab'l, ati tu'n tnimana twitz Qman Dyos.

Mixti'xte b'a'n toju' Chwinqlal

8Lalun jaw lab'tiya qama tila nche yajlanjtzju' prow toj jun tnam exqa min nb'inchanjtz tnik'alilti'j ex min nnimajtzju' kyoklen, qu'n jun xjal nim toklen toj kawb'il inkub' jpu'n til tu'n juntl nimxi'x toklen, e'tzun txqantl nimxi'xtl kyoklen nche kub'jpu'nte kyilju' kab'e' lu.

9¡Inq'manjtztzuntz ti'j ja'lu qa xi'tch'iyju' tnam exqa nnajb'enju' nimaqkawil toj kojb'il!

10Aju' xjal majx tok tk'u'j ti'j pwaq, mixti'x nqe tk'u'j; aju' majx tok tk'u'j ti'j q'inumal, naq ch'i'nte' ati te toj twitz. Ex ikx mixti'x ttx'o'lajil ja'lu,

11qu'n qa nimxi'x ati, ex nimxi'xtl nnajset. ¿Ti'tzu'n k'ajb'ela' tu'n tten txqan q'inumal, ti'jxi'tlju' ati qe?

12Aju' nnaq'unan, b'a'ntzun qa nwan b'a'nxi'x mujqa min, inwtan b'a'nxi'x, atzu'n q'inun min nnok twatl tu'n tpaju' tq'inumal.

13Matxi' wile' jun ti'xti' majx b'isb'ajilxi'x twitzju' tx'otx' lu: qa nimxi'xju' q'inumal, myab'a'n nnela' teju' tajaw,

14qama tzaj jun k'aẍjel twitz kub'l, kb'elb'aju' q'inumal, extzunqa ati jun tk'wal, mixti'tlte kjel tq'o'n te.

15Ikxtzu'n kse'n tej tul twitzju' tx'otx', ikxtzu'n k'anjela' ti'j: naq chle'n tq'ob' kse'nx itz'ja', ex mixti'xte' kxe'l tiq'i'n ti'ju' taq'unb'en.

16Axxi'x b'isb'ajilx te'lu: ikxju' kse'n ula' twitz tx'otx', ikxtzun k'anjela'ju'. ¿Ti'tzun xtkanb'a tu'n txqan taq'un xtb'incha mixti'tl tz'oka'?.

17Noqwittzun o'kxju', toj qlolj xtena' toj tkyaqil tchwinqlal, toj yajb'il, k'ixk'oj ex ma ku'x tq'o'n q'oj toj tk'u'j.

18Matxi' tz'el nnik'e' ti'j ate b'a'nju' ex tzalajb'ilxi'x tu'n qwan ex tu'n qk'wan, tu'n qnik'b'ente twitzlalilju' qaq'un inxi'x qo'elb'aj tu'n tb'inchet toju' jte' q'ij qchwinqlal ntzaj tq'o'n Qman Dyos, qu'n ana' xqo tzaja' q'o'na'ju'.

19Toj juntl tu'me'l, kykyaqilju' xjal ntzaj tq'o'n Qman Dyos txqan kyq'inumal, ex ntzaj tq'o'n anb'il kye tu'n kynik'b'ente, qu'n ana' tzaj tq'o'n Qman Dyos kye tu'n kynik'b'ente txqan kyaq'unb'en.

20Ina' tzaj tq'o'n Qman Dyos tzalajb'il toj kyanmi, min nb'ajxtl kyk'u'j ti'ju' tq'ijlalil kychwinqlal.