Sal 86 - Mam Ostuncalco Bible

O'kxta Dyos

1Q'aq'antz tk'u'ja Nman Dyos, chin tb'itza,

qu'n nchin b'isune' ex prowqine';

2Chin t-xq'uqima, okslan wnaq qina'we' teya.

Ateju'ya Dyos ink'lu'na;

¡chin tkloma ayine' tmajena q'uqli nk'u'je' ti'ja!

3Nman Dyos, q'aq'antz tk'u'ja wi'je',

atl kmuj nchin kub'sane' teya.

4Nman Dyos, q'uqb'antz ch'i'nwe' nk'u'j ayine' tmajena,

qu'n teya nchin kub'sanaye'.

5Qu'n majx b'a'nta Nman Dyos, ex nkub' tnajsa'na il;

nim tk'u'jlalila kyi'ju' nche kub'san teya.

6Taye, b'intzju'ya nna'j Dyose',

¡b'intzju'ya nkub'sb'ile'!

7Inchin kub'sane' teya toju' yajb'ilweye',

qu'n inchin tzajttzaq'we'na.

8¡Mixti' juntl dyos kse'n aya, Nman Dyos!

¡Mix-a'lo' juntl ikx tb'inchb'enju' kse'nta!

9Nman Dyos,

aya kub' b'inchankyeju' nimaqtnam,

ex che b'ju'l tk'etza tu'n kyk'ulun teya

ex tu'n tjaw kynima'n tb'iya.

10Qu'n o'kxta Dyos;

¡nim toklena ex nche tb'incha'na ti'xti' te lab'te'n!

11Nman Dyos, yek'untza tb'eyila weye',

tu'ntzun nxilpeye' ti'ja toj ttxolilti'j.

Chin toniya tu'n nnimanteju'ye' tb'iya

12Taye ex Ndyos,

kjawil wajwali'na tu'n tkyaqil wanmiye'

ex kjawil nnima'ne' tb'iya kukxju'.

13¡Nimxi'xju' tk'u'jlalila wi'je'!

¡Machin tkola tu'n lalun chinxe' toj muqb'il!

14Nman Dyos,

jun k'loj xjal mixti' kynab'l ex tx'u'jqe',

ex mixti' tchiylala kye,

matxi' che okmiltz'uj wi'je' ex kyajb'il tu'n nkub' kyb'yo'ne'.

15Atzunta Taye,

jun Dyosa tb'anilxi'x ex inlaq tk'u'ja.

ati tpasensi, nim tk'u'jlalila exju' tyola ax.

16Chin tka'yitza, ¡q'aq'antz tk'u'ja wi'je'!

¡Chin tkloma ayine' tmajena! ¡q'ontza tipumala weye'!

17Q'ontz jun yek'b'il chik'lixi'x weye' ti'ju' t-xtalb'ila,

ex che kub'xwit ch'ixwiju' ntx'a'lti'j kyk'u'j wi'je' ajtokkyka'yi'n.

¡Nman Dyos, inchin tzaj toni'na ex ntq'uqb'a'na nk'u'je'! Chiju' b'itzal.