Est 9 - Mam Ostuncalco Bible

E'kanb'an aj Juda

1Tojtoq oxlajoj (13) tajlal tkab'lajoji'n (12) xjaw, ju' xjaw Adar, tu'n tjapunju' tchaq'b'il nimaqkwil, ex a q'iju' ntoq che ayonju' kyajq'oj tu'n kykub' kyb'yo'n aj Juda; wichiqa aye'tlkye kub'kyi'j kyu'n aj Juda.

2B'aj kyb'u'yi'n kyib' aj Juda kyoju' nimaqtnam jachaq najla'qe' kyoj kykyaqilju' tnej tx'ot'x in tkawi'n nimaqkawil Aswer, tu'n kyok tzaqpaj kyi'ju' kyajb'iltoq tu'n kykub' b'yonkye. Mix-a'lo'xte jun we' kywitz, qu'n nimtoq xob'il matxi'toq tz'ok kyoju' tnam kyu'n.

3Kykyaqilju' tzyul kawb'il kyoju' tnej tx'otx', e'kawil kyoju' tnej tx'otx', exqe' nimaq kyoklen toju' kawb'il, intoq che onin kyuk'i'lju' aj Juda tu'n kyxob'e'l te Mardokyey,

4qu'n jun nimaqxjal toq toju' tja nimaqkawb'il ex matxi'toq b'injtz tqanil ti'j kyoj kykyaqilju' tnej tx'otx', ex atl junjun q'ij xi'toq ttenxi'xtl tipumal.

5Tu'n k'uẍtx'e'nb'il eb'aja' kyb'yo'n aj Juda kyajq'oj; majx e'kub' kyb'ajsa'n kykyaqil ex kyb'incha kyi'j aju' kyajb'il.

6Junk'al jo'naq (500) ichan e'kub' kyb'yo'n o'kx toju' nintnam Susa;

7ex e'kub' kyb'yo'n Parsandata, Dalpon, Aspata,

8Porata, Adaliy, Aridat,

9Parmasta, Arisay, Ariday ex Vaysata,

10aye' lajoj tk'wal Aman, ju' ajq'oj kyi'ju' aj Juda; ex min b'ajx kyeku'n ti'xti' kye.

11Textzu'n q'ij lu, tej tb'inte nimaqkawil jte'ju' matxitoq che kyim toju' nintnam Susa,

12xitma'n te Ster ju' t-xu'jil;

—Matxi' che b'aj junk'al jo'naq (500) ichan exqe' lajoj tk'wal Aman kyu'n aj Juda toju' nintnam Susa. ¿Mitzunlo yatlte' kyoju' txqantl tnej tx'otx' nche nkawi'ne'? ¡Q'mantza weye' titi'tl tajb'ila, kxe'l nq'o'nwe'! chi nimaqkawil.

13Xi'tzun ttzaq'we'n Ster:

—Qa b'a'n toj twitza nimaqkawil, tu'n txiq'et anb'il kye aj Juda toj Susa tu'n kyb'inchante jumajtl najchi'j axju' matxi' kyb'incha kse'nxju' chaq'b'il, ex tu'n kyjaw yob'et kyxmilalju' lajoj tk'wal Aman, chij.

14Tchaq'u' nimaqkawil tu'n tb'inchet ikju'. B'je'x q'o'n tqanilju' chaq'b'il lu toj Susa, ex eb'jaw yob'a'n kyxmilalu' lajoj tk'wal Aman.

15B'aj kyb'uyi'n jumajtl kyib'ju' aj Juda najlqe' toj Susa toj kyajlajoj tajlal xjaw Adar, ex e'kub' kyb'yo'n o'lajnaqtl (300) ichan na'tz; ex min xikyeku'nju' ati kye.

16-17Ex b'aj kyb'u'yi'n kyib'ju' aj Juda najlqe'toq kyoju' txqantl tnej tx'otx', toj oxlajoj (13) tajlalxju' xjaw, tu'n kyklonte kyib' ex tu'n kyb'aju' kyajq'oj kyu'n; eb'aj b'eljojmutx' wuqk'al lajnaq (75,000) xjal kyu'n, ex min xikyeku'n ati kye. Tojtzun q'ij kyajlajoj tajlalju' xjaw e'ojlan ex kub'kyik'sa'n tuk'i'l tzalajb'il ex ninwan.

18Aye'tzu'n aj Juda toj Susa, b'ajna' kyb'u'yi'n kyib' toj oxlajoj (13) ex kyajlajoj (14) tajlalu' xjaw, e'ojlan toj o'lajoj tajlal xjaw, ex kub'kyik'sa'n kyuk'i'l nimaqwan ex tzalajb'il.

19Aye'tzu'n aj Juda najlqe' kyoju' tnam ex kojb'il mixti' tapi kyi'j, kub'kyik'sa'n q'ij kyajlajoj tajlalju' xjaw Adar tuk'i'l tzalajb'il ex ninq'ij, ex eb'aj oyin kyxolilex.

Ninq'ij Purim tb'i

20B'ajkub' ttz'ib'a'n Mardokyey tkyaqilju' b'aj lu, ex b'ajx t-sma'n u'j kye aj Juda najlqe' kyoju' tnej tx'otx' nche tkawi'n nimaqkawil Aswer, e'nqaku' ta'qe' ex najchaq ta'qe',

21tuk'i'lju' chaq'b'il tu'n tkub' kyik'sa'n q'ij kyajlajoj ex o'lajoj tajlalju' xjaw Adar atl junjun ab'q'i,

22tu'nju' aye' q'iju' tej kyb'aju' ajq'oj kyu'n, ex ax jawju' kych'exb'etju' b'is ex oq'el toj k'ixk'oj te tzalajb'il ex ninq'ij kye. Ati tu'n kykub' ik'setju' q'ij lu kyuk'i'l nimaqwan ex tzalajb'il, ex tu'n kyq'on oyaj jun te juntl ex tu'n txikyq'o'n kykotzju' prow.

23Majx kyej tenju' lu kyu'n aj Juda tu'n kyb'inchante ex tu'nju' b'ajx ttz'ib'a'n Mardokyey kye.

24Qu'n ojetoq kub' t-xima'n Aman, ju' kyajq'oj, tu'n kymankun kykyaqil aj Juda tu'n, ok toj sqach tu'n tkyaj jun q'ij tu'n kykub' tb'yo'n kykyaqilx,

25tetzu'nj tpon Ster twitzu' nimaqkawil, tchaq' nimaqkawil toj u'j qa tkyaqilju' myab'a'n matxi'toq kub' t-xima'n Aman tu'n tb'inchante kyi'ju' aj Juda tu'n tkub' tz'aq tib'ajx. Ikytzu'n e'jaw Jtz'o'n Aman kyuk'i'lu' tk'wal ti'ju' jitz'b'i'l te b'iyb'il jawtb'incha'n.

26Qu'mtzun ok kyb'iju' q'ij lu te Purim, qu'n a tnab'lju' b'a'npun pur.

Qu'mtzun, kse'nxju' tuj Mardokyey kye exu' matxi'toq kyil ex e'ik'a',

27kyej kyq'o'n aj Juda ja'lu tu'n kyb'inchante kukxju' ex kye kyyajajil, ex kye kykyaqilju' makyaq'kyib' toju' kyokslab'l aj Juda: ilti'j tu'n tkub' kyik'sa'n kab'e' q'ij lu atl junjun ab'q'i toju' tajlal xjaw q'ma'ntl, kse'nju' chik'b'ab'l matxi'toq b'ajx q'ma'n kye;

28ex tu'n kytzaj na'nju' q'ij lu ex tu'n kykub' ik'sa'n kyu'nile junjun wiq kyyajajil, kyu'n junjun k'loj kywitze'l kyib', tojile junjun tnej tx'otx' ex junjun nimaqtnam, tu'n lalun kub' naju' nab'ab'lte kyxol aj Juda ex kyxolju' kyyajajil.

29Kub' kytz'ib'a'n Ster tmyal Ab'yayil ex Mardokyey aj Juda, juntl u'j tuk'i'l oklenj ti'ju' tq'ij purim, tu'n tkuwsetxi'xju' tnejel,

30ex b'ajx kysma'n kye kykyaqilju' aj Juda kyoju' qaqnaq wuq (127) tnej tx'ot'x nche tkawi'n nimaqkawil Aswer, kyuk'i'l yol te b'a'nwnaqil ex ax,

31tuk'i'lju' chaq'b'il tu'n tik'setju' tq'ij purim toju' tajlal xjaw q'ma'ntl, kse'nxju' ojetoq kychaq' Mardokyey exu' Ster t-xu'jil nimaqkawil kye ex kyeju' kyyajajil. Ex ok kytz'aqtza'n junjuntlju' nuk'b'il kyi'ju' mewayi'n ex oq'el.

32Ex aju' tchaq'b'il Ster kuwsan kyeju' nuk'b'il tu'n kyoklpe ti'j ajtkub' ik'setju' tq'ij Purim. Tkyaqil ja'lu ku'x tz'ib'a'n toj jun u'j.