Mt 2 - Mam Ostuncalco Bible

E'pon ajnab'lil te tjawetzq'ij ka'yilte Jesus

1Tej titz'ji Jesus toj tnam B'elen toj ttx'otx' Judey, atoq nimaqkawil Erodes inkawin. E'pon junjun ajnab'lil te tjawetzq'ij toj Jerusalen,

2ex xikyqani'n tpakb'alil kjalu:

—¿Ja tu'me'l ta'ju' nimaqkawil sitz'j kye aj Juda? Qu'n maqile' che'w xjawu'l ex maqotzaje' k'ulul te, chechij.

3Majx jaw xob'ju' nimaqkawil Erodes tej tb'inteju' lu, kyuk'i'lxi' najlqe' toj Jerusalen.

4Tchaq'tzun nimaqkawil tu'n kytxket kykyaqilju' kynejel pale exqe' xnaq'tzal kawb'il, ex xitqani'n kye jatu'me'l k'itz'jela'ju' Krist.

5Xi'tzun kytzaq'we'n te:

—Atzu' toj B'elen toj ttx'otx' Judey, qu'n ikju' tz'ib'a'n tu'n t-sanjelal Qman Dyos kjalu:

6Atzunta B'elen, toj tx'otx' Juda,

mya tal b'o'sta

kyxolju' nimaqtnam toju' tx'otx' lu;

qu'n toja k'eletza' jun kawil

kẍaqlulteju' ntaname' Israel, chiju' tz'ib'a'n, chechij.

7E'tzajtzun ttxko'n Erodes ajnab'lil toj ewaj, ex tb'i kye alkyexi'x q'ij tkub' tyek'u'ntib'ju' che'w.

8Lwiyxi'xtzun exi' tchq'o'nju' ajnab'lil B'elen, ex xitma'n kye:

—Kukxi'ye' atzu', ex che xjelune' tiju' k'wal sitz'j: ajtzun tel yal kyu'ne', ktzajel kyma'ne' weye'; tu'n nxi' ch'inwe' k'ulul te, chij.

9Tetzunj kyb'inte ajnab'lil tyolju' nimaqkawil exi'tzuntz. Atzunju' che'w kyil tjatz, xikyka'yi'n nejlitoq kywitz, ex tzmaxtzu' we'ya' tib'aju' najb'il jatoq ta'ju' ne'ẍ.

10Majx etzalaju' ajnab'lil b'a'nxi'x tej kyka'yintelju' che'w.

11Eb'jo'kxtzuntz tuja, kyilju' ne'ẍ tuk'i'l Mariy aju' ttxu, e'kub' mejetzuntz ex ek'ulun teju' ne'ẍ. Jatztzun kyiq'i'n q'anpwaq, sturak ex mir toju' tkb'el ex kyaj kyoyi'n te.

12Tzajtzun q'ma'n kyeju' ajnab'lil toj kywitzik' tu'n Qman Dyos tu'n lalun tz'anjtlkyi'j tk'etz Erodes, anjtzunkyi'j toj kytx'otx' toj juntl b'e.

Exi' oq Jse toj Ejipt

13Kyanjlenxi'tzun ajnab'lil, kub' tyek'u'ntib' jun tanjl Qman Dyos twitz Jse toj twitz'ik' ex tma te: We'ktza iq'inxju'ya ne'ẍ tuk'i'lju' ttxu, ex kutoqa kyuk'i'l toj Ejipt. Axtzu' tenku'ya tzmax ajnmanteye' teya, qu'n tajb'il Erodes tu'n tkub' tb'yo'nju' ne'ẍ, chij.

14Textzunju' qonik'an lu, exi' tiq'i'n Jse ne'ẍ exju' ttxu toj Ejipt.

15Axtzuntzu' e'kub'a' ten tzmax tkyim Erodes. B'aj ju' lu tu'n tjapunju' kyejni q'ma'n tu'n Qman Dyos tu'nelju' t-sanjelal kjalu: Toj Ejipt tzaja' ntxko'ne' nk'wale', chij.

Tchaq' Erodes tu'n kykub' b'yetu' ne'ẍ

16Tetzunj tka'yinte Erodes qa ma'toq kub' sb'u'n kyu'nju' ajnab'lil, tzaj txqan ttx'u'jil, tchaq'tzuntz tu'n kykub' b'yo'n kykyaqilju' k'wal na'mtoq kyel kab'e' ab'q'i toj B'elen exqe' najb'il ti'jile, qu'n ma'toq txi' t-xima'n tq'ijlalil tej tq'manjtz te kyu'nju' ajnab'lil.

17Iktzu'n japuna' q'ma'ntoqtl tu'n Jeremiy t-sanjelal kjalu:

18B'injtz tq'ojq'ojel wi'yj toj Rama,

oq'e'n ex uxi'n.

Atoq Rakyel intoq oq' kyi'ju' tal

ex mixtoqti' ntjo'n tu'n tq'uqb'qnjtz tk'u'j,

qu'n ma'toq che kyimju' tal, chiju' tz'ib'a'n.

Tej tanjtzkyi'j toj Ejipt

19Tkyimlenxi'tzun Erodes, kub' tyek'u'ntib' jun tanjl Qman Dyos toj twitzik' Jse, toj Ejipt, ex tzajtma'n te kjalu:

20We'ktza, iq'inxju'ya ne'ẍ exju' ttxu, ex kutanjti'ja Israel, qu'n matxi' che kyimju' kyajb'iltoq tu'n tkub' kyb'yo'nju' ne'ẍ, chij.

21Jawtzun we' Jse ex xitiq'i'n k'wal exju' ttxu toj Israel.

22Tetzunj tb'inte qa atltoq Arkelao tk'wal Erodes intoq kawin toj Juda, tzaj xob'il ti'j tu'n t-xi' atzu'; matxi'toqtzun tzaj q'ma'n te toj witzik' tu'n Qman Dyos, xi'tzuntz toju' tx'otx' Kaliley.

23Tetzunj tpon, kub' najan toju' tx'otx' Nasaret. B'aj tkyaqil ja'lu tu'n tjapunju' q'ma'ntl tu'n t-sanjelal Qman Dyos: qa k'okyel q'o'n tb'i Jesus aj Nasaren.