1Toj tlajoji'n xjaw te tb'eljoji'n ab'q'i nkawin Sedekyiy toj Juda, ul Nab'ukodonosor, nimaqkawil aj B'ab'ilon, kyuk'i'l kykyaqilju' t-xjal te q'oj ti'j Jerusalen, ex b'akytxoli'n ti'j.
2Toj b'eljoj tajlaj tkyaji'n xjaw te tjunlajoji'n (11) ab'q'i nkawin Sedekyiy, eb'jo'kxju' xjal ajq'oj toju' nintnam,
3ex eb'jo'kx kykyaqilju' nejenel kye t-xjal nimaqkawil aj B'ab'ilon ex e'kub'ten ttzixi'xju' tnam. Aye' Nerkal-sareser, Samkar-neb'o, Sarsekyim, nimaqxi'x kyoklen toju' kawb'il, ex juntl Nerkal-sareser, nimxi'x toklen.
4Tetzunj kyka'yinte Sedekyiy nimaqkawil kyuk'i'lju' t-xjal te q'oj, eb'je'tz oq toju' nintnam. Qonik'an kyb'je'x toju' b'e kyk'etz tawal nimaqkawil, toj ttzi tnam kyxolju' kab'e' nimaqtapi, exi'tzuntz toju' b'e toju' b'ya' ttzi nin a' Jordan.
5-6Aye'tzu'n kaldey te q'oj eb'ajxlpe kyi'j, ex kub'ti'j Sedekyiy kyu'n toj plan tx'otx' te Jeriko. Tzyet kyu'n ex xikyiqi'n twitz nimaqkawil Nab'ukodonosor, atitoq Rib'la, toju' tx'otx' Amat. Atzuntzu' tmaya' Nab'ukodonosor tu'n ttz'e'yset twitz: tma tu'n kyb'je'l toqi'n kywi' tk'wal Sedekyiy twitzku', ex kykyaqilju' nimaqxjal toj Juda.
7Atzu'n ti'j Sedekyiy, tchaq' tu'n kyb'je'tzq'i'n twitz ex tu'n tb'aj xwaku'n toj xpatx'k'uxb'il ex tu'n txiq'i'n B'ab'ilon.
8Okkyq'o'n kaldey tq'aq'alju' tja nimaqkawb'il ex kyq'aq'alju' ja toju' nintnam, ex kub' kyniq'u'n nintapi ti'j Jerusalen.
9Yajxi'tzuntl, tzaju' Neb'usaradan, chaq'ul kye xq'uqil nimaqkawil, eb'je'xtiq'i'nju' xjal najlqe' toju' nintnam ate'xtoq, exqe' ojetoq kyaq'kyib' kyuk'i'l kaldey, ikytzu'n tkyaqilju' tnam eb'ajx tiq'i'n B'ab'ilon,
10O'qe'kx junjun prowqe'xi'x mixti' ati kye e'kyaj tq'o'n toju' tx'otx' Juda, ex b'ajx tq'o'n kyawal ex kytx'otx' te kyawb'il toju' q'ij lu.
Xitzaqpi'n Jeremiy11Taq' Nab'ukodonosor nimaqkawil aj B'ab'ilon, chaq'b'il te Neb'usaradan, chaq'ul kye xq'uqil nimaqkawil, ti'j Jeremiy kjalu:
12Kjel nq'o'ne' tu'n t-xitka'yi'na ex lalun tz'oktena yajulte, q'onxa te tkyaqilju' matqani teya, chij.
13-14Kychaq'tzun Neb'usaradan kyuk'i'l Neb'usasb'an ex Nenkal-sarieser, kab'e' nimaqxi'x kyoklen toju' kawb'il, ex kkyaqilju' ajb'el te nimaqkawil aj B'ab'ilon, tu'n tetz q'i'n Jeremiy toju' tpen kyja xq'uqil ex kyej kyq'o'n te Kedaliy tk'wal Aykam ex tchman Sapan, tu'n t-xitiq'i'n tja. Ikytzu'n kyejten Jeremiy najal kyxolju' twnaqil.
Yol tziyanjtz te Eb'ed-melek15Tzaj yolin Qman Dyos te Jeremiy tej jpu'nxtoq tpen kyja xq'uqil, ex tma te:
16Kutxi'ya q'malte te Eb'ed-melek aj Etyopiy kjalu: Lu xtma Qman Dyos nimtipumal nche ajb'en aj Israel te kjalu: Knb'incha'we' oje nmaye' tu'n ttzaj taq'wix ti'ju' nintnam lu. Oktla'ya ajtb'aju' lu.
17Atzunta knkla'ya, tu'n lan kub' tz'aqa toj kyq'ob'ju' xjal na'j nxob'a kye. Ayine' Dyos Manb'aj nchin yolin.
18Knkla'ya tu'n lalun kub' b'yo'na. Kb'entelta toq b'a'na, qu'n matz'ok qe tk'u'ja wi'je'. Ayine' Dyos Manb'aj nchin yolin, chiku'ya, chi Dyos.
Who We AreWhat We EelieveWhat We Do
2025 by iamachristian.org,Inc All rights reserved.
