1Nman Dyos, Nman Dyos,
¿tiqu'n ẍin kyeja' ttzaqpi'na?
¿titiqu'n minti' ntzaja' klol weye'?
¿titiqu'n minti' ntzaj tb'i'nju'ya nkub'sb'ile'?
2Taye,
intzaj ntxko'na q'ijtl ex qonik'an, ex min nchin tzaj ttzaq'we'na;
¡mixti'x nchin ojlane'!
3Xjan na'ta Nman Dyos;
aya nkawin ex nima'na kyu'n aj Israel.
4Okqe kyk'u'ju' qmane' ti'ja;
qe kyk'u'j ti'ja ex e'tzaqpet tu'na;
5e'qanin o'nb'il teya, ex aya tzaqpinkye;
okqe kyk'u'j ti'ja ex min e'kyaj tkolb'e'na.
6Naqna' jun xton qinwe', mya jun ichan;
¡matxi' chin okye' te kytzeb'l xjal!
7Nchin xmayinjtze' kyu'nju' nche okka'yin weye';
nxi' kyokcha'n kytzi ex kywi'
8ex inkyma'n:
Q'uqlitoq te'lu tk'u'j ti'j Qman Dyos;
tzajku'na'tzuntz klolte.
Ina' laqj ti'j, klonjtz ku'natzuntz tu'n, chechij.
9Ikytzu'n Nman Dyos:
tb'inchaya tu'n witz'je' ti'j ntxuye';
tu'na nnojlana'ye' ttzitk'u'j.
10Atxi'x na'mxtoq witz'jiye',
inkub' q'o'ne' toj tq'ob'a;
tej atinqintoqe' toj t-xmilal ntxuye',
ti'ja q'uqla' nk'u'je'.
11Lalun tz'el tpa'ntib'a wi'je',
qu'n xi' woke' toju' yajb'il
ex mix-a'lo' jun klol weye'.
12Txoli'ntl kyib'ju' wajq'oje wi'je' naku'j tman wakxqe',
ikyqe' kse'n tman wakx toj B'asan tx'u'jqe';
13nche tzanun naku'j b'alun,
inxi' kyk'ab'a'n toj kytzi ex ntzaj kyxonkyib' wib'aje'.
14Ikyqinju'ye' kse'n a' kub' ẍa'lj;
qutz'jni qe'ju' nb'aqile'.
Inkub' yulju' wanmiye' woje'
kse'n ser.
15Matxi tzqiju' ntziye' naku'j jun xk'o'n;
matxi' tz'oklak'e waq'e' toj nk'o'ne'.
¡Matxi' chin kyej tq'o'na ex machin ponxe' twitz kamik!
16Naku'j tx'yan qe'ju' b'inchal taq'wix
matxi' tz'ok kytxoli'n kyib' wi'je';
matxi' b'aj kyk'ixb'sa'n nq'ob'e' ex nqane'.
17¡Jaku' b'ent kyajletu' nb'aqile' wu'ne'!
Majx tokkywitzju' wajq'oje wi'je';
18matxi' b'ajx kysipa'n nxb'alune' kyxol,
ex nche' ẍchan alkye kkanb'al ti'j.
19Atzunta Nman Dyos, aya wipumale',
¡lalun txi' lq'eya!, ¡lwix kuttzaja onilweye'!
20Chin tkloma tu'n lan chin b'aje' tu'n k'uẍtx'e'nb'il,
lalun taja tu'n nkub' kyb'yo'ne' twak'utz lu,
21chin tkloma toj kytziju' b'alun lu,
¡chin tkloma te kyuk'aju' tman wakx lu!
22Kxe'l nyoli'na kyeju' witz'ine' ex ntzike',
kjawil nnima'na toju' b'u'yb'ilkyib'.
23¡Che b'itzan qe'ye' te Qman Dyos!, aye'ye' nche nimane' te.
¡Che nimanqe'ye' te, kykyaqile' tyajajil Jakob'!
¡Che k'ulun qe'ye' te, kykyaqile' tyajajil Israel!
24Qu'n minti' nche eltik'o'n
ex min nnik'tna'lu' yajb'ilkye prow tu'n,
ex minti' nkub' ewan kywitz.
¡Inche tzaj tb'i'n aj txi' kyqani'n o'nb'il te!
25Kjawil nb'itza'ne' tyola njapun;
kywitzju' ttanama nim kyajlal,
kywitzju' nche niman teya
kjapumelju' nyole' xintziya'ne' teya.
26Che wanqe'kye', ju' nche yajlanjtze',
che nojxe' b'a'nxi'x;
che b'itzan qe'ye' ju' nche jyone' ti'j Dyos,
ex che anq'inxwite' b'a'npun ab'q'i.
27Kykyaqil kyyajajil xjal ex kykyaqil nimaqtnam,
e'xjal toj tkyaqil twitz tx'otx':
kyna'ntze' Qman Dyos, ex kukytzaje' tk'etz;
¡che mejeku'ye' twitz!
28Qu'n ate Qman Dyos nimaqkawil,
ex ate nkawin kyib'aj kykyaqil nimaqtnam.
29Che tzipeku'ye' ex che k'ulun qe'ye' o'kxte
kykyaqile' b'a'n te'qe'ye',
kykyaqile' ju' k'anjetl kyi'je' toj tx'otx',
qu'n mixti' kychwinqlale' kyu'nx kyib'e'.
30Kche k'ululkye' nyajajile' te Qman Dyos
ex kche yolil ti'j toj tkyaqilju' kychwinqlal;
31kxe'l kyoli'nju' tkawb'il ex taq'unb'en
kyeju' che itz'jel yajxi'tel, chiju' b'itzal.
Who We AreWhat We EelieveWhat We Do
2025 by iamachristian.org,Inc All rights reserved.
