Lv 11 - Mam Ostuncalco Bible

Ẍtilun txkup ex tz'il(Dt 14.3-21)

1-2Tzaj tma'n Qman Dyos te Moyses ex te Aaron tu'n t-xi' kyma'n kye aj Israel ikjalu:

Aye' txkup ja'lu b'a'n tu'n kyxi' kych'yo'ne' kyxol kykyaqilju' ate' twitz tx'otx',

3aye' inche kok'san ex pa'ch kyxky'eq;

4naqtzun oqe'kx txkupju' mixti' tu'n kyxi' kych'yo'ne', maskye inche kok'san mujqa pa'ch kyxky'eq:

Aju' kamey, qu'n mya pa'ch t-xky'aq, maskye in kok'san. Ati tu'n tok kyu'ne' te tz'il txkup.

5Exju' ẍiky, qu'n mya pa'ch t-xky'aq, maskye nkok'san. Ati tu'n tok kyu'ne' te tz'il txkup.

6Exju' toj k'ul ẍiky, qu'n mya pa'ch t-xky'aq, maskye in kok'san, ati tu'n tok kyu'ne' te tz'il txkup.

7Aju' b'och, minti' in kok'san, maskye pa'ch t-xky'aq, ati tu'n tok kyu'ne' te tz'il txkup.

8Lalun txi' kych'yo'ne' kychib'jilju' txkup lu, expe' lalun txi' kytzyu'nju'ye' t-xmilal kyimnitl. Ati tu'n kyok kyu'ne' te tz'il txkup.

9O'qe'kxju' txkup ati tal kyxik' ex ati tal kyxk'owil kuw b'a'n tu'n txi' kych'yo'ne' kyxolju' txkup ate'qe' toj a', toj ninnjab' mujqa toj nimaq a'.

10Aye'tzunju' mixti' tal kyxik' ex mixti' kyxk'owil kuw toj ninnjab' mujqa toj nimaq a', k'ok'e' mujqa nimaq, ati tu'n tok kyu'ne' te tz'il txkup.

11Mixti' tu'n txi' kych'yo'nju'ye' kychib'jil; ati tu'n kyel kyik'o'nju'ye' txkup lu, ex ati tu'n tel kyik'o'nju'ye' kyxmilal kyimniqe'tl.

12Kykyaqilju' txkup mixti' tal kyxik' ex mixti' kyxk'owil kuw toj a', ati tu'n tel kyik'o'ne'.

13Aye' pich' ja'lu mixti' tu'n kych'yone', expe' kche elel kyik'o'ne': t'iw, toqil b'aq, t'iw tib'aj ninnjab',

14milano ex tkyaqil kyyajil alkon,

15tkyaqil kyyajil joj,

16ab'estrus, xitx', kab'yota, ex tkyaqil kyyajajil q'anjel,

17tukru, kormoran, ib'is,

18sisne, pelikano, k'utz,

19siwenya, tkyaqil tyajil gars, ab'ub'iya ex sotz'.

20Ex kykyaqil tal txkup b'o'sqe' nche lipan ex nche b'et, ati tu'n tel kyik'o'ne',

21aye'tzu'n b'a'n tu'n kyxi' kych'yo'ne', aye' mujli kykux tuk'i'l kyqan tu'n tb'ent kyxlik'pun twitz tx'otx', maskye inche lipan ex inche b'et.

22Kyxoltzu'n ja'lu b'a'n tu'n t-xi' kych'yo'ne' tkyaqil kyajajil ẍt'ikt'u'l, e'nimaq ẍt'ikt'u'l, ex txil.

23Aye'tzu'n txqantl tal txkup nche lipan ex nche b'et, ati tu'n tel kyik'o'ne'.

24Aye' ti'xti' ja'lu che kjel tz'ilixe' tu'n: alkyete matxi ttzyu'n t-xmilal junju' txkup lu kyimnitl, kjelten tz'il tzmaxi'j ajqok yupj.

25Alkyete majaw q'inte junju' txkup lu kyimnitl, kttx'ja'ju' ti'j ex kjelten tz'il tzmaxi'j ajqok yupj.

26Kykyaqil txkup, mya pa'ch kyxky'eq ex mixti' inche kok'san, ati tu'n kyok kyu'ne' tz'il txkupqe', ex alkyete matz'ok tzyunkye, k'okyel tz'il.

27Alkyexku' txkup kyaje' tqan ex ajtb'et xi'nkub'a' talal tib'aju' t-xky'aq, ati tu'n tok kyu'ne' te tz'il txkup; ex alkyexku' matz'ok mkonte t-xmilal junju' txkup lu kyimnitl, k'okyel tz'il tzmaxi'j ajqok yupj.

28Ex alkyexku' majaw q'inte t-xmilal junju' txkup lu kyimnitl, ati tu'n ttxjonteju' ti'j ex kyjelten tz'il tzmaxi'j ajqok yupj. Qu'n ati tu'n kyokju' txkup lu tz'ilqe' kyu'ne'.

29Aye' txkup ja'lu nche qitinje twitz tx'otx', ati tu'n kyok kyu'ne' tz'ilqe': Saqb'in, ich' ex tkyaqil kyyajil txkup nche qititinje.

30Exqe'ju' salamankyesas, kokodrilo, lakart, xmatx, ex kamalyon.

31Ayetzun txkupju' che okyel kyu'ne' te tz'il kyxol kykyaqilju' txkup twitz tx'otx'. Alkyetzunte matz'ok ttzyu'n junju' txkup lu kyimnitl, kjel tz'il tzmaxi'j ajqok yupj.

32Ex ikx qama tz'ok tiqli junju' txkup lu kyimnitl ti'j jun ti'xti', kjel tz'ilix tu'n. Qa jun ti'xti' tze mujqa xb'alun, mujqa jun ti'xti' tz'u'n, mujqa kostal, mujqa alkyexku' aq'unb'il, ati tu'n tku'x q'et toj a' ex kjel tz'il tzmaxi'j ajqok yupj; yajxi'tzuntel kjel ẍtilun.

33Qatzun nab'en ma ku'x tz'aq junju' txkup lu toj jun tx'otx' k'wil, tkyaqilju' ati toju' k'wil kjel tz'ilix, ex kb'el pa'yetju' k'wil.

34Ex tkyaqilju' wab'j qama kub'ju' a' setz toju' k'wil lu tib'aj, kjel tz'ilix; ex tkyaqil k'wab'j ati toj, kjel tz'il.

35Tkyaqilju' ti'xti' qama kub' tz'aq junju' txkup lu kyimnitl tib'aj, kjel tz'il; jun chuj mujqa tkub'el q'aq', ati tu'n kykub' xitet. Ati tu'n tok kyu'ne' tz'il, qu'n tz'ilte'.

36Atzun teju' t-xiklil a' mujqa xoch janjatza' a' te k'wab'j kjelten ẍtilun kukxju'; atzunju' matz'ok mkonkyeju' txkup kyimniqe'tl kjelten tz'il.

37Qama kub' tz'aq junju' txkup lu kyimnitl tib'aj jun ij ju' kxel awet, lay kyej tz'ilixju' ij;

38qatzun makub' tz'aq junju' txkup lu kyimnitl tib'aj jun ij ak'sa'ntl, kjel tz'ilix.

39Qatzun nab'en makyim jun alu'mj b'entnitlti'j tu'n t-xi' kych'yo'ne', alkyete matxi tzyunte kjelten tz'il;

40alkyetzunte matxi' ch'yonteju' alu'mj kyimnitl, ati tu'n ttxjonteju' ti'j ex kjelten tz'il tzmaxi'j ajqok yupj; ex ikxju' matz'ex q'inteju' alu'mj kyimnitl, ex ati tu'n ttxjonteju' ti'j ex kjelten tz'il tzmaxi'j ajqok yupj.

41Mixti' tu'n t-xi' kych'yo'ne' jun txkup nqititinje twitz tx'otx'; ati tu'n tel kyik'o'ne'.

42Kykyaqilju' txkup nche qititinje twitz tx'otx', mixti' tu'n kyxi' ch'yet, b'a'ntzun ntjqu'n tk'u'j ajtb'et mujqa nb'et kyu'n kyaje' mujqa txqantl kyqan, qu'n tz'il txkupqe'.

43Qu'mtzun lalun kub' kytz'ilsa'n kyib'e' ex lalun che oke' kse'nqe'ju' txkup lu tz'ilqe'.

44Qu'n ayine' Dyos Manb'aj. Ati tu'n kyoke' ẍtilun ex xjan, qu'n xjan qinwe'. Lalun kytxa'jla kyib'e' tu'n junju' txkup nqititinje twitz tx'otx'.

45Ayine' Dyos Manb'aj, inetz q'inkyeye' toj Ejipt tu'n kyajb'ene' weye'. Qu'mtzun ati tu'n kyoke' xjan qu'n xjan qinwe', chi Qman Dyos kye Moyses ex Aaron.

46Aye' nuk'b'il ja'lu kyi'ju' txkup, pich' ex kykyaqilju' najliqe' toj a', ex kykyaqilju' txkup nche qititinje twitz tx'otx',

47Tu'ntzun tel kynik'tzilju' ẍtilunqe' kyi'ju' tz'ilqe', ex tu'n tel kynik'tzilju' b'a'n tu'n kych'yet exqe' myab'a'n tu'n kych'yet.