Ez 30 - Mam Ostuncalco Bible

Tz'e'ysb'il twitz Ejipt

1Tzaj yolin Qman Dyos weye' ex tma:

2Yolina ichan toj nb'iye' ex q'manxa:

A ntma'n Dyos ja'lu:

Che' ẍch'ine' tu'nju' tq'ijlalil

3matxi' tzulkanun;

¡Xi' tul lq'e tq'ij Qman Dyos!

¡jun tq'ijlalil b'isb'ajilx kyeju' nimaqtnam!

4Tzulju' q'oj ti'j Ejipt.

Ajtzun kyb'ajkub' b'yo'n txqan xjal,

ajkyb'ajx elq'a'n kyq'inumal,

ex ajtkub' xitu'n Ejipt tuk'i'lxi' tq'uqlil,

kjawil lu'lun Etyopiy.

5Ex kb'elkyi'ju' aj Etyopiya te q'oj toju' q'oj

exqe' aj Lib'ya, aj Lidya,

ex kykyaqil aj Arab'ya, aj Kub' ex kye txqantl tnam,

exqe' kye txqantl tnam mujb'a'nkyib' tuk'i'l.

6A ntma'n Qman Dyos ja'lu:

Che kyimelkye'

nche b'aj onin tuk'i'l Ejipt toj q'oj,

tzajx Mikdol ponx Asuwan.

Kjel me'setju' tnimjtib'il Ejipt tu'n toklen.

Ayine' Dyos Manb'aj nchin q'mante.

7A Ejiptju' kjel b'o'ljxi'x kyxol kykyaqil nimaqtnam, ex che kjel xitjxi'xju' tnam toj.

8Ajtjaw nk'ant-sa'ne' tx'otx' lu tu'n q'aq' ex ajkykyaj xitj kykyaqilju' nche' onin tuk'i'l, k'eleltzun kynik'tz qa ayine' Dyos Manb'aj.

9Ajtpon tq'ijlalil tz'e'ysb'il twitz Ejipt, che xe'lnchq'o'ne' sanjelal toj ninnjab' tu'n kyjaw lab'ti xjal aj Etyopiya tzalajb'il ta'qe', k'okyeltzun tchitz kyi'j. Naqx tu'n tulkanuntlju' tq'ijlalil lu.

10Nxinma'ne', ayine' Dyos manb'aj: K'ajb'el Nab'ukodonosor, nimaqkawil aj B'ab'ilon, wu'ne', tu'n t-xitet tq'inumal Ejipt.

11Kxe'l kyuk'i'l t-xjal te q'oj, ju' txkup xjalqe'xi'x, xitulteju' tx'otx'. Che q'ojil ti'j Ejipt tuk'i'l k'uẍtx'e'nb'il, ex kjel noj toju' tx'otx' kyu'n kyimni.

12Kb'el ntzqijsa'ne' nin a' Nilo, ex kxe'l nq'o'ne' tnam toj kyq'ob' xjal b'inchal taq'wix; kjel xitju' tnam lu ex tkyaqilju' ati toj wu'ne', toj kyq'ob' najchaq xjal. Ayine' Dyos Manb'aj matxi' chin yolin.

13Nxinma'ne', ayine' Dyos Manb'aj:

che kb'el nxitu'ne' witzleb'

ex che b'el nb'ajsa'ne' mya dyosqe' toj Menpis.

Lay ten juntl kawil toj Ejipt,

ktenb'il xob'ajil toju' ttx'otx' wu'ne'.

14Kjel nxitu'ne' toj tnayaj Ejipt, k'okyel nq'o'ne' tq'aq'al Soan

ex kb'el ntz'e'ysa'ne' twitz Teb'as.

15Ktzajel b'aj ntx'u'jile' tib'aj Sin, tkuwal Ejipt, ex kb'el nxitu'ne' tq'inumal Teb'as.

16K'okyel nq'o'ne' tq'aq'al Ejipt ex kjawil t-xb'aq'u'ntib' Sin toj k'ixk'oj; che okyex lku'n xopa'j toj nintapi ti'j Teb'as, ex q'ijtl ku'xi'x che pomel q'ojil ti'j Menpis.

17Che kyimelju' ku'xun aj On ex aj B'ub'astis toj q'oj, aye'tzu'n txqantl xjal najlqe' atzu' che kxe'lq'i'n toj kars.

18Ajtkub' nxitu'ne' tipumal Ejipt ex ajkyb'aju' tkuwal majx ntnima'ntib' kyu'n, kyupjel q'ij toj Tapnes, kb'el jupli jun muj ti'j Ejipt, ex che b'ajxe'l q'i'n xjal najlqe' kyoju' nimaqtnam toj kars.

19Kb'el ntz'e'ysa'ne' twitz Ejipt, oktzun k'elel kynik'tz qa ayine' Dyos Manb'aj, chi Dyos.

20Tzaj yolin Qman Dyos weye' toj wuq tajlal tnejel xjaw te tjunlajoji'n (11) ab'q'i, tma:

21Matxi' tz'el ntoqi'ne' tq'ob' Paraon, nimaqkawil aj Ejipt, ex mix-a'lo' matxi' tz'ok q'anante mo ptzonte tu'n, tu'n ttentl tipumal ex tu'nwt ttzyetlju' k'uẍtx'e'nb'il tu'n.

22Qu'mtzun inma'ne', ayine' Dyos Manb'aj: chin okyele' ajq'oj ti'j Paron, nimaqkawil toj Ejipt. Che elel ntoqi'ne' kab'e' tq'ob', aju' b'a'n exju' toqnitl, knb'incha'ye' tu'n tel tz'aqju' k'uẍtx'e'nb'il toj tq'ob'.

23Che b'ajex nsputi'ne' aj Ejipt kyoj txqantl nimaqtnam, ex che b'ajex nsputi'ne' kyoj chukchaq tx'otx'.

24Ex kxe'l nq'o'ne' tipumal tq'ob'ju' nimaqkawil aj B'ab'ilon, ex kb'el nq'o'ne' nk'uẍtx'e'nb'ile' toj tq'ob'. Kche ntoqi'ye' tq'ob' paraon, kjel tentzuntz twitzju' tajq'oj ajtna'nte k'ixb'nitl.

25Kxe'l nq'o'ne' kyipumal tq'ob'ju' nimaqkawil aj B'ab'ilon ex che elelwiq'i'ne' tq'ob' paraon. Ajt-xinq'o'ne' nk'uẍtx'e'nb'ile' toj tq'ob' nimaqkawil aj B'ab'ilon ex ajtjaw ti'n ti'j Ejipt, oktzun k'elel kynik'tz qa ayine' Dyos Manb'aj.

26Che b'ajex nsputi'ne' aj Ejipt kyoju' txqantl tnam ex nimaqtnam, oktzun k'elel kynik'tz qa Dyos Manb'aj, chi Dyos.