1Tzaj yolin Qman Dyos weye', ex tma:
2ichan, chik'b'anxa kye aj Jerusalen taq'wixqe'xi'xju' ti'xti' matxi' kyb'incha.
3Q'manxa kye: a ntma'n Dyos ja'lu: Aj Kanaanta ttzajlena, Jerusalen, titz'jlenxa; amorey tmana atzu'n ttxuya itit.
4Min elk'pu'n taq'e'l tmuxa tej titz'jiya, ex min ku'x ichi'na, ex min okqcho'n atz'an ti'ja, ex min pasinjtza.
5Mix-a'lo' tzaj laqj tk'u'j ti'ja ex mix-a'lo' b'inchankye ti'xti' lu teya. Kyej xona toj kojb'il toju' q'ij tej ti'tz'jiya, qu'n intoq tzaj molmon kyk'u'j teya.
6Inik'e' tk'etza, ex tej nka'yinteye' ntxakajlaya toj chik', kub' nximane' tu'n tanq'ina.
7Nch'iysaya naku'j jun awal toj kojb'il. Ch'iytzuntza, matxitoq qyayixa. Eb'aj ch'iyju' timiẍa, ex b'aj ch'iy t-xya'mal. Extzun ẍb'iqlitoqa b'a'nxi'x.
8Inik' jumajtle' tk'etza, ex wila matxi'toq ch'iyxi'xa; matxi'toq pon tab'q'iya tu'n tok xmoxita. Xinlik'u'ne' ntxo'we' tib'aja, ex b'aj nktxu'na ẍb'iqliya, ex b'ant nyole' tuk'i'la; kyej b'antti'j qyol tuk'i'la, ex oka te weye'. Ayine' Dyos Manb'aj nchin q'mante.
9Ex b'aj wichi'na, b'aje'l nẍtilsa'ne' tik'len chik' ti'ja ex oknq'o'ne' k'ok'sb'il ti'ja;
10oknq'o'ne' t-xb'aluna tb'anil tilb'ilal ex oknq'o'ne' t-xajab'a tb'aniltz'u'n; xinq'o'ne' jun tpasa sed ex t-xb'aluna tz'umin chmob'ente;
11b'aj nb'incha'na kyoj tachb'ila, oknq'o'ne' xb'alun tqul tq'ob'a ex jun tuya tqula;
12oknq'o'ne' jun xmilq'ob'aj ttzi ttxa'na, e'toj t-ẍkyina ex jaxnq'o'ne' jun tb'anil koron toj twi'ya.
13B'aj ktxet ti'ja tu'n q'anpwaq ex saqpwaq; Sedqe' t-xb'aluna, tz'umin chmob'enkye ex xb'alun tb'anil tilb'ilal. Tb'anil wab'j toq twaya, tuk'i'l myel ex aseyt ti'j Olib'o. Tb'anilxi'x ka'yina tb'enta: oka te jun t-xu'jil nimaqkawil.
14B'injtz tpakb'alila kyoj nimaqtnam tu'nju' tb'anilxi'xa, tz'aqlixi'xa tu'nju' b'inchb'enkye tachb'ila. Ayine' Dyos Manb'aj nchin q'mante.
15Oktzun qe tk'u'ja ti'ju' tka'yinka tb'anilxi'x ex tu'nju' mab'injtz tpakb'alila, matz'oka te jun qya ajpajil, nxitq'o'n tib'a kye tkyaqil ichan nche ik' tk'etza.
16Jawtb'incha'na ja te k'u'lb'il kye witzleb' kywi'witz kyu'n t-xb'aluna ex tb'inchaya ajpajil kyoj.
17E'kub' tb'incha'na kyilb'ilal ichan kyu'n tachb'ila q'anpwaq ex saqpwaq xiwoyi'ne' teya, tu'n tb'inchanteya ajpajil kyuk'i'l;
18e'oktq'o'na t-xb'aluna tb'anil che ka'yin kyi'j ex b'ajkub' tq'o'na waseyte' ex nk'ok'sb'ile' kywitz.
19Aju' wab'j xinq'o'ne' te twaya, ti'j tb'anil arin nb'anta', exu' aseyt ex ta'lkab' xinq'o'ne' teya, kub'tq'o'na kywitz te oyaj tb'anil tk'ok'jal. Ayine' Dyos Manb'aj nchin q'mante.
20Exqetzu'n tala q'a ex txin e'nk'walaye' tuk'i'la, e'xitq'o'na te chojb'il kye witzleb' naku'j kywa. ¿Manaq ch'i'nju' xb'inchaya soka te jun qya ajpajil,
21expe' mache'x tq'o'na nk'wale' tu'n kykyim tz'e'ysa'nqe' te ninb'ilkye witzleb'?
22Tu'nju' tchwinqlala taq'wixi'x toj ajpaji'n min na'ntl tu'na tej ne'ẍtoqa ẍb'iqliya, akxtoq in patajlaya toju' tchk'ela.
23A nma'nju'ye' lu, ayine' Dyos Manb'aj: ¡Layxwita! tib'ajxi'tlju' taq'wix matxi' b'ajtb'incha'n,
24mab'jaw tb'incha'na jatu'n tq'onteya k'u'lb'il kye witzleb' toj tkyaqil najb'il tb'anilqe ex tu'n txitq'o'n tib'a toj ajpajil.
25E'b'aj tb'incha'na najb'il lu toj tkyaqil kyajb'e, matz'okju' tilb'ilala tb'anilxi'xte taq'wixil, nxitq'o'n tib'a kye kykyaqilju' nche b'jik' tk'etza toj tajpaji'na kukxu'.
26Matb'inchaya ajpaji'n kyuk'i'l tb'esina, aye' aj Ejipt nim kyipumal toj ajpaji'n, matz'ok tq'o'na ntx'u'jile' tu'nju' ljo'n tb'inchanteya tajpaji'na.
27Jawtzun wiq'i'n nq'ob'e' tu'n ttz'e'yset twitza: Matz'el wiq'i'ne' twaya, matxi nq'o'na toj kyq'ob' nimaqtnam pilistey, nche ik'onteya tu'n tpaju' tchwinqlal ch'ixb'ilx.
28Extzun min xqe tk'u'ja ti'ju' lu, mataq'tib'a tu'n tb'inchanteya ajpaji'n kyuk'i'l aj Sirya; ex mixjun xqe tk'u'ja.
29Ex matxi tljo'ntla ajpaji'n toj B'ab'ilon, kytx'otx' xk'aẍlel; ex mixjun kyej qe tk'u'ja tu'nju' lu.
30Ayine' Dyos Manb'aj, nchin q'mante: ¡Yo'loktoqxi'xju' yab'il toj tanmiya tu'n tb'inchanteya tkyaqilju' ajpajil lu ex mixti'x nch'ixwiya toj!
31Jawtb'incha'na jun q'olb'eb'l tojile janche pona' b'aju' b'e ja ta'qe' najb'il q'ancha'lxi'x, jatu'n tk'uluna'ya kye witzleb' ex tu'n tq'ontetib'a toj ajpaji'n. Mitzun juntb'incha'na kse'nkye ajpajil: ¡Min ntqani'na chojb'ilte!
32Aju' qya nin niman te tchmil, nche tk'mo'n txqantl ichan.
33Inxiq'o'n jun medi kye kykyaqil qya ajpajilqe'; atzunta inpe' xitq'o'na oyaj kye kykyaqilju' tajpaja ex nxitchjo'na kye tu'n kyb'ajtzaj toj tkyaqil plaj b'inchal il tuk'ila.
34Junxi'tl ntb'incha'na toju' tajpaji'na kyetwitzju' nkyb'incha'n txqantl qya: mix-a'lo' njyonteya tu'n tb'inchan il tuk'i'la ex min ntzaj kychjo'n ichan teya, ape'ta nxichjonkye. ¡O'kxtzunte' tu'n lu junxi'tla!
35Qu'mtzun, qya ajpajil, b'intza nyole':
36Ayine' Dyos Manb'aj nchin q'mante: Matxi' tz'el tilsa'n tch'ixawa b'a'nxi'x, matxi' kub'tyek'u'ntib'a toju' ajpaji'n kyuk'i'lju' tajpaja ex kyuk'i'l kykyaqil twitzleb'i'n taq'wixqe'xi'x ex matxi' tz'el qojli kychk'elju' tala tu'na ẍekub' tq'o'na te chojb'il.
37Qu'mtzun che b'ajel nb'u'yi'ne' kykyaqilju' ichan matxi' che b'aj tzalaj tu'na, kykyaqilju' ẍe tk'ujlaya ex kykyaqilju' ẍe el tik'una; che b'ajel nb'uyi'ne' ti'jileya, ex kywitzku' kb'el nẍb'iqb'a'na tu'ntzun tka'yinjtza kyu'n ẍb'iqliya b'a'nxi'x.
38K'okyela toj xjel wu'ne' tu'n tpaj pa'jmjeb'le'n ex b'yojwnaqi'n, ex kb'el nb'yo'na tuk'i'l tx'u'jilj ex xk'yaqli'n.
39Kjel nq'o'na toj kyq'ob', tu'n tb'aj kyxitu'n janajpajina'ya ex ja noka' tk'u'lb'ila kye witzleb'. Che b'je'lel kyiq'i'n t-xb'aluna exqe' tachb'ila tb'anilqe', ex majx kjel ẍb'iqb'a'na kyu'n.
40Che jawil ti'ju' tnam ti'ja kyu'n, kb'ajel xona toj ab'j, ex kb'el b'yo'na tu'n k'uẍtx'e'nb'il.
41K'okyel kyq'o'n kyq'aq'alju' tjaya ex kb'el tz'e'ysa'n twitza kywitz txqan qya. Kmankulju' tajpaji'na wu'ne', ex lay txitq'ontl mediya kye tichana.
42K'elel b'ajtzun ntx'u'jiltze' ti'ja ex lay chin xky'aqlintle', kqeb'el nk'u'je' ex lay chin tx'u'jintle'.
43Matzik' tna'l tu'na tej q'poj toqa, ex machin tk'ixb'saya kyu'nju' tb'inchb'aja mixyab'a'n ex taq'wixqe'xi'x; qu'mtzun, kb'el ntz'e'ysa'n twitza tu'n tpaju' tchwinqlala lu. Ayine' Dyos Manb'aj nchin q'mante.
Ikyqe'x talju' kse'n txub'aj44Kykyaqilju' amiw tu'n kymanteju' nq'umli, kkyma' ti'ja: Ikyx txub'aju' kse'n tal.
45Alb'aja te jun txub'aj neltik'u'n tchmil exqe' tal, ikyqe'xju' titz'ina mo ttzika nelkyik'u'n kychmil exqe' kyal. Itit te' kytxuye' kykyaqilxe', atzu'n kymane' amorey.
46Toj tb'a'nq'ob'kya'j ta'ju' ttzika ju' nintnam Samarya, kyuk'i'lu' tkojb'il; atzun toj tnayajkya'j ta' titz'ina ju' nintnam Sodom, kyuk'i'lju' tkojb'il.
47Ex ikx xitb'incha'nju'ya kse'nkye, ax xitb'incha'nju'ya kse'n nkyb'incha'n taq'wixi'x. Ex min xqe tk'u'j tu'nju' lu, taq'wixi'xtl pe'ta tb'inchb'aj kyetwitzju' kyb'inchb'aj.
48Axxi'x kxe'l nma'ne' wu'nxe', ayine' Dyos Manb'aj: min xkyb'inchakye' titz'ina Sodom kyuk'i'l tkojb'il kse'n xtb'inchaya kyuk'i'l tkojb'ila.
49A ilju' tb'incha titz'ina Sodom kyuk'i'lju' tkojb'il, jaw kynima'n kyib' tu'nju' nim kywa ati ex tkyaqil atiyile kye, ex mixti'x e'onin ti'ju' prow ex ti'ju' ati nojqelan te.
50E'b'jo'k txkupqe' ex kyb'incha ti'xti' ik'o'nqe' wu'ne'; qu'mtzun e'kub' nxitu'ne', kse'n matxi' tila.
51Atzunte Samarya, mixpeti' xtb'incha nik'jan kse'n tila xtb'inchaya. Matxi' che tb'inchaya ti'xti' taq'wixi'x kyekywitz; qama che oknmujb'ane' kyuk'i'l, naku'j mixti'kye kyil.
52Ati tu'n tkub' me'seta tu'n tpaj taq'wixqe'xtlju' il ẍe tb'inchaya twitzju' kye titz'ina ex ttzika, naku'j mixti'kye kyil. Ati tu'n tel tch'ixawa ex tu'n tkub' me'seta, mana' tz'el naku'j mixti' kyilju' titz'ina ex ttzika kyekywitzju' tila.
53K'anjel wanjsa'n ti'ju'ye' b'a'n te Sodom ex Samarya, ex kyeju' kykojb'il; ex ikxta k'anjel wanjsa'n ti'ju'ye' b'a'n teya,
54naq aju' ati tu'n tkub' me'seta ex tu'n ch'ixwiya teju' xb'aj tb'incha'na, tu'ntzun toka te q'uqb'al k'u'jb'aj kye.
55Ajtzun tanjtz junmajtl ti'ju' b'a'n kye Sodom ex Samarya ex kyeju' kykojb'il kse'nxju' tnejel, ex ikxta kyuk'i'lju' tkojb'ila tzul jumajtlju' ati teya.
56Intoq xmayina ti'ju' tz'e'ysb'il twitzju' titz'ina Sodom, tej tjaw tnima'n tib'a,
57na'mxtoqtzun kyelpun chik'puju' tila; atzu'n ja'lo niljiya kyu'n nimaqtnam Edom ex Pilistya, ex kykyaqilx tb'esina, ¡Kykyaqilju' xjal twitz tx'otx' nche el ik'unteya!
58Ja'lo ati tu'n tik'xju' tz'e'ysb'il twitza tu'na tu'n kypaju' tb'inchb'aja taq'wixqe'xi'x. Ayine' Dyos Manb'aj nchin q'mante.
59Nxinma'ne' ayine' Dyos Manb'aj: kb'el ntz'e'ysa'n twitza, min xjapunju' tyola tmaya nwitze' tu'na, min xjapunju' tyola kyajni b'antti'j wuk'i'le.
60Ayintzunwe' ktzajel nna'ne' nyole' kyejni b'entti'j tuk'i'la tej txintoqa, ex kjel b'ent jun nyole' tuk'i'la tejumajx.
61Ajkyxi nq'o'ne' ttzika ex titz'ina te tala, maskye mya nyolju'ye' kyajni b'ent tuk'i'la, ktzajel tna'na tb'inchb'aja nejtl ex kb'el ch'ixwiya tu'n tpaj.
62Ktzajex jumajtlju' nyole' tuk'i'la, k'eleltzun tnik'tza qa ayine' Dyos Manb'aj.
63Ktzajel tna'na, kb'el ch'ixwiya b'a'nxi'x ex kb'el tme'ssa'ntib'a, laype' yolintla ajtkub' nnajsa'ne' tkyaqilju' matxi' tb'inchaya. Ayine' Dyos Manb'aj nchin q'mante, chi Dyos.
Who We AreWhat We EelieveWhat We Do
2025 by iamachristian.org,Inc All rights reserved.
