Pr 20 - Mam Ostuncalco Bible

1Aju' q'e'n in naj tnab'l xjal tu'n;

exqa matxi' kyk'wa'n nim nche elxja'ja' tu'n;

qa ntx'ujti minti' nximan ti'ju' ntb'incha'n.

2Iky ttx'u'jil nimaqkawil kse'n b'alun ntzanun;

alkyete' matxi' yekunte nelje tchwinqlal.

3Ninb'iltete xjalju' qama tnajsa'nju' wulji'n,

atzunte' xnak xipe' jyona' q'oj.

4Ate' ky'ej minti' nkjon;

ajtzun tpon tq'ijlalil njyon twa, ex mixti'x nknet tu'n.

5Ikyte ximju' e'wa'n kse'n jun nin a' nimin t-xe,

atzunju' xjal ati tnab'l neltnik' ti'j.

6Nimte' nkyma'n qa tnik'alkyi'j,

layxtzun knet jun qu'n jatu'n tok qeqk'u'j.

7¡K'iwla'n qe'kye' k'wa'lb'aj

qama che lpe ti'j kyman tnik'alkyi'j!

8Aju' nimaqkawil ajtkub' qe tu'n tkawin,

noq ajt-xi' tka'yi'n toj kywitzju' b'ajsal majx npon tnab'l alkye ti tpaj.

9Mix-a'lokye kq'malte: ẍtilunwe' wanmi,

ex mixti'we' wil, chiwt.

10Kab'e' ti'xti' nel tik'u'n Qman Dyos

aju' tqan peẍ min tz'aqli, exju' malb'il tuk'i'l sb'ub'l.

11Tu'nju' tu'me'l se'n nanq'ina' ku'xun

nq'ancha'lixa' qa tnik'alti'j.

12Aju' ẍkyinb'aj tu'n tb'in atzu'n witzb'aj tu'n tka'yin

kykab'ilx tb'inchb'aj Dyos qe'.

13Lalun wtanxi'xa tu'n lalun kub'aja;

iq'imila twatla, we'ktza prim ktenb'iltzun twatziya.

14¡Mya'x b'a'nte' tk'a'ẍa!, ntma'nju' loq'ol,

tb'ajlenxi'tzun loq'o'n inxpetzun ntzalaj ti'j.

15Nimxi'x toklen tyolju' ati tnab'l,

kyetwitz q'anpwaq ex txqan ab'j tb'anilqexi'x.

16Jun xjal makyej tziyal ch'ex te jun xjal minti' tojtzqi'n,

Q'imil jun tixtiya te, tu'n tkyejten anjtzb'il k'as.

17B'a'nlote' toj twitza tu'n taq'unana tk'i' sb'ub'l

yajxi'tel kb'el tchjo'na.

18Qa ati jun t-xima, tnejel b'inx tnab'la

qama txi'ya q'ojil jyonx tu'me'la b'a'nxi'x.

19Min newit jun ti'xti' tu'n jk'ulyol,

qu'mtzun lalun qe tk'u'ja ti'j jun jk'ulyol.

20Aju' k'wa'lb'aj taq'wix tyol kyi'j tman

kb'el yupj ttxa'n ttzaj tojxixtej qlolj.

21Aju' ti'xti' lwiy nkub'ti'j,

ajxi'x tjapun kanun mixya tzalajb'ilte'.

22Lalun tmaya qa k'okyel tq'o'na tu'me'l t-xel;

qek tk'u'ja ti'j Qman Dyos, qu'n ate kb'inchalte tu'n tkanb'ana.

23Inche tik'o'nte Qman Dyos tqan peẍ min tz'aqli;

exju' malb'il myab'a'n.

24Ate Qman Dyos nxb'etzanqe;

¿se'n taq'wi tu'n qb'inte jaqopomela'?

25myab'a'n txiqtziya'n jun ti'xti' te Qman Dyos

qa na'mxtoq qximan qa kb'entel mujqa lay.

26Aju' nimaqkawil ati tnab'l majx nche kub' tb'yo'n

b'inchal myab'a'n tu'n kb'aj jumajx.

27Aju' Xewb'aj tzaj tq'o'n Dyos teju' xjal

a spik'unju' nk'anti tojxi'x tanmi.

28Aju' nimaqkawil ati tnab'l ntk'u'jla'n ex nyolin ax

atzunte' tzuyb'il tkawb'ilju' b'a'nxix'.

29A kykuwalju' ku'xun atzu' ta' toju' kyipumal;

atzunkye' tijwnaq ninb'ilkye qama saqax kywi'.

30Aju' aj il tzmaxi' nok tnab'lju' ex b'anixa' toj tchib'l asyal ex k'ixb'len.