Is 54 - Mam Ostuncalco Bible

Tk'u'jlalil Qman Dyos tejumajx

1Ẍch'ina tu'n tzalajb'il, qya min nalana ex mixti'qe' tala;

b'itzana b'a'nxi'x tu'n tzalajb'il,

aya b'ajx tz'itz'ja' jun tala,

qu'n intma'n Qman Dyos kjalu:

Nimxi'x talju' qya ik'u'n ktenb'il

kyetwitzju' qya ati tchmil, chij.

2Nimsanxju'ya tpach xb'aluna,

slik'unxa xb'alun ja najla'ya ex lalun xob'a;

jk'unqe'xa taq'e'l ex awanqeku'xa stak b'a'nxi'x,

3qu'n kb'el puqlita toj tnayaja ex toj tb'a'nq'ob'a;

kb'elkyi'j txqan nimaqtnam kyu'n tyajajila

che kb'el najan kyoju' nimaqtnam chq'ajlajqe' ja'lo.

4Lalun xob'a, lay tz'elta tch'ixaw;

lay tz'ok i'li'na ex mixti' tu'n tch'ixwa'ya.

K'ik'el tna'lte' tch'ixawa el ku'xuntoqa

ex lay tzajtna'ntla tch'ixawa el tej tkyim tchmila,

5qu'n kxelq'i'nta tu'n ch'isanteya te t-xu'jil.

A tb'iju' Dyos Manb'aj nimtipumal;

ate Dyos Manb'aj Xjan kye aj Israel klolteya,

aju' Dyos tib'aj tkyaqil twitz tx'otx'.

6Ikytoqju'ya kse'n jun xu'jilb'aj txinx

kyejni q'o'n ex inxi'x b'isun,

atzu'n ja'lo matxi' txkonjtztla tu'n Dyos janajb'ena'ya ex intma'n teya:

7Naq jun kmuj xkyej nq'o'na,

tu'ntzu'n nk'u'jlalile' nimxi'x qob'entel junmajtl.

8Naq jun kmuj ntx'u'jile' tzaj, kub' wewa'n jun kmuj wib'e' twitza,

ex tzaj laqj nk'u'je' ti'ja tu'n nk'u'jlalile' tejumajx.

Chi Qman Dyos klolteya.

9Kse'n xintziya'ne' te Noe,

qa lay tzajtl q'eqjab' tu'n tjawtl a' tib'aj tx'otx'.

ikytzu'n kxe'l nma'n jun nyole' ja'lo tu'n tjapun

lay tzajtl ntx'u'jile' tuk'i'la

ex lay chin q'ojintle' tuk'i'la.

10B'a'nqa matzik' kych'exb'e'nkyib'ju' witz toj jun plajtl

exqa mache tzaj niq'ju' ttxa'nwitz,

lay b'aj nk'u'jlanteya

ex lay kub' xitju' nyole' te nak'b'il kyejni b'entti'j tuk'i'la.

Chiju' Qman Dyos nq'aq'an tk'u'j ti'ja.

Aju' ak'a'j Jerusalen

11¡Qab'anx twitza nintnam, b'ajni yajtiya tu'n q'ankyaq,

mix-a'lo' q'uqb'al tk'u'ja!

Che kb'el nq'o'ne' ab'j tq'uqb'ila kyib'aj tb'anil ab'j

aye'tzu'n ab'j sapiro che ajb'el te tq'uqb'ila;

12che jawil nb'incha'ne' tjaya nimaq kywe' ab'j rub'i

aye'tzu'n ab'j rub'ilo che okyel te tjpel,

aye'tzu'n nimaqtapi ti'jile tb'anil ab'jile.

13Ayinwe' chin xnaq'tzalkye tk'wala;

kykyaqilxkye che anq'il b'a'n.

14Kkuwixela tu'n tnik'alilti'j,

lay kub'yaju'ntla ex lay xob'a,

ex lay jaw ximantla tu'nju' xob'ajil.

15Qa alkye sul q'ojil ti'ja, mya tu'n npaje',

ex kb'elti'ju' matz'ok tzaqpaj q'ojil ti'ja tu'na.

16Ayinna'we' ẍin ch'isanteju' xjal nnaq'unan ti'j k'uxb'il

aju' nnokx t-xupi'n q'aq' tu'n tk'ent

ex nche kub' tb'incha'n chukchaq aq'unb'il te q'oj;

ex ayine' ẍin ch'isanteju' xjal nxitun

tu'n kyb'aj t-xitu'n ti'xti';

17mixtzun a'lo'xi'te kub' b'inchante jun aq'unb'il

tu'n tkub' najsa'na tu'n.

Kjpetel kytzi kykyaqilju' poqol teya tu'na.

Awe' nxinq'o'n kyeju' nche ajb'en weye': aju' kanb'ab'l.

Ayine' Dyos Manb'aj nchin q'mante, chi Dyos.