Is 26 - Mam Ostuncalco Bible

B'itz te kanb'ab'l

1Tojtzu'n q'ij lu kxel b'itzetju' b'itz lu toju' tx'otx' Juda:

Ati junqe ninqtanam kuw;

tu'n qklet,

b'jaw tb'incha'n Qman Dyos nimaqtapi kuwsa'nqe'.

2Che kyjqomju'ye' ttzi tnam tu'n tokxu' jun nintnam tz'aqli

ntanq'i'n tyol Dyos.

3Nman Dyos, nche tk'u'na xjal b'a'n kychwinqlal toj nak'b'il,

qu'n q'uqlok kyk'u'j ti'ja.

4Majx q'uqlok kyk'u'j ti'j Qman Dyos,

qu'n a kolb'il tejumajx.

5Nche kub't-xonju' nkynima'n kyib',

ex nkutme'ssa'n nintnam ntnima'ntib'

majx nkub't-xon twitz tx'otx',

6tu'n tb'ajwab'e'n kyu'nju' prow

ex kyu'n minkynima'nkyib'.

7Tzinunte' kyb'eju' xjal tnik'alkyi'j;

nb'aj tplansa'na kyb'e, Taye.

8Ikxqe' q'uqli qk'u'je'

toju' b'e yek'u'n kyu'n tkawb'ila, Taye.

O'kxqe' qajb'il tu'n qximane' ti'ja.

9Nchin jiq'chane' tu'n tkyaqil nk'u'je' ti'ja te qonik'an;

nxi'x njyo'na tu'n tkyaqil nk'u'je'.

Ajkyok xjal twitz tx'otx' toj xjel tu'na,

k'elelkynik' ti'ju' tnik'alilti'j.

10Maskye matzajlaqj tk'u'ja kyi'ju' b'inchal myab'a'n,

layx che okkye' tnik'alkyi'j;

taq'wixi'x kyb'inchb'aj toj kytx'otx'ju' b'a'nxjalqe'

ex min nche ximan ti'j toklen Qman Dyos nimxi'x.

11Taye, b'incha'ntlte' tz'e'ysb'il kywitz tu'na,

aye'tzunkye min kyajb'il tu'n telkynik' ti'j;

oktzun k'elel kych'ixaw

ajkyka'yinte tk'u'jlalil nimxi'x ti'j ttanama.

¡Che b'ajxwit tu'n tq'aq'ju' ttx'u'jila!

12B'a'n ta'qo'ye' tu'na Nman Dyos;

a na'ta nb'inchankye

kykyaqilju' qaq'unb'ene'.

13Taye, aya nqnima'ne',

junxi'qe'tlju' matxi' che ok te qajawe',

extzun o'kxna'ta Dyos Manb'aj qib'aje'.

14Kyimniqe'nakye', lay che jaw anq'in;

naqna' xlekunqe'kye' ex lay che jawe'tl;

makub' ttz'e'ysa'na kywitz, mache kub't-xitu'na,

makub' tnajsa'na tkyaqilju' nab'ab'lkye.

15Tch'isaju'ya nintnam, Nman Dyos;

tch'isaya tu'n tnimanjtzju' tb'iya,

b'ajx tlaq'b'a'na tkyaqil tnaqachilju' tx'otx'.

16In qjyo'na Nman Dyos toju' qb'ise',

ajqtzaj ttzak'u'na toj chab'a yol.

17Ikyqo'ju'ye' twitza, Nman Dyos,

kse'n jun qya ch'onwi'

xi'tpon kmuj te tu'n titz'ji tal,

nxi'x tk'o'li'ntib' tu'n k'ixk'oj ex nẍch'in.

18Itz'ji qale', qna'ye' k'ixk'oj tej titz'ji

ob'anixe', naqtzun kyq'iq'te'.

Min sul kolb'il qu'ne' teju' tnam,

ex lay che itz'ji xjal tu'n kynajan twitz tx'otx'.

19Aye'tzunta tkyimni che anq'iltl,

che jawil anq'in jumajtl.

Ktzajel kyna'nkyib'ju' nche wtan toju' tx'otx',

ex che ẍch'il tu'n kytzalajb'il.

Qu'n ntzaj tq'o'na spik'un naku'j ta'l che'w

ex che jawitz anq'intlju' kyimni toj tx'otx'.

20Kutxi'ya ntanam, kutokxa toj tjaya,

ex jpumitza tjaya.

Ewan jun kmuja, tzmax ajtik' ttx'u'jil Qman Dyos.

21Qu'n k'eletz Qman Dyos toju' tja nimaqtkawb'il

tz'e'ysalte kywitz xjal twitz tx'otx'

tu'n tpaj kyil,

ex lay che kub'tewa'ntl tx'otx'ju' ati kyil

kche tyek'u'ju' b'yojxjali'n ẍe b'inchanjtz twitz.