1 S 16 - Mam Ostuncalco Bible

Xjansanjtz Dab'i te nimaqkawil

1Tzaj tma'n Qman Dyos te Samwel:

—¿Jtoj kyej tb'isuna ti'j Sawul? Min wajb'iltle' tu'n ttentl Sawul te nimaqkawil toj Israel. Qu'mtzun nojsanku'ya tuk'a wakx tu'n aseyt, ex kutxi'ya tja Jese, aj B'elen, qu'n matxi' jawnsk'o'ne' jun tk'wal tu'n tok te nimaqkawil, chij.

2Atzunte Samwel xittzaq'we'n:

—¿Se'ntzun chin xe'la'ye'? Qu'n qama tb'i Sawul, chin b'el tb'yo'ne', chij.

Atzunte Qman Dyos tzaj ttzaq'we'n te:

—Iq'inxa jun qpoj ttxu wakx ex q'manxa qa matxi'ya' q'olku'te te chojb'il nwitze'.

3Txkontztzuntza Jese ti'ju' chojb'il, kxe'lma'ntzuntze' teya titi' ktb'incha'ya. Kt-xjansa'ju'ya kxe'l nma'ne' teya tu'n tok te nimaqkawil, chi Dyos te.

4Tb'incha Samwel kse'nx tzaj tma'n Qman Dyos te. Tetzunj tpon B'elen, e'etzju' tijwnaq te nintnam k'molte intoq che xob'inin, ex xikyqani'n te:

—¿Ma toj b'anil sula'ya?, chechij te.

5—Tojna'tzun, chi Samwel xittzaq'we'n —Machin tzaje' q'ol jun chojb'il te Qman Dyos. Kyẍtilsam kyib'e' ex kukytzaje' wuk'i'le' tu'n txi' qq'o'nju' chojb'il junx, chij.

Kub' t-xjansa'ntzun Samwelju' Jese exqe'ju' tk'wal, ex exi' tk'le'n ti'ju' chojb'il.

6Tetzunj kyponju' tk'wal Jese, xitka'yi'n Samwel Elyab' ex kub' t-xima'n: Alote ichan ja'lu matxi' jaw t-sk'o'n Qman Dyos tu'n tok te nimaqkawil, chij.

7Atzunte Qman Dyos tzaj tma'n te Samwel: Lalun txi'twitza ti'ju' ka'yin mujqa ninxjal, qu'n min kub'tl toj nwitze'. Myate' kse'n ka'yi'n xjal; qu'n awe' in nka'yi'n aju' toj tanmi, chij.

8Tzajtzun ttxko'n Jese Ab'inadab', ex xityek'u'n te Samwel; atzunte Samwel tma:

Ex myate xjaw t-sk'o'n Qman Dyos, chij.

9Xi'tzun tyek'u'ntl Jese Sama te Samwel; ex myate', chi Samwel.

10Exi'tzun tyek'u'n Jese wuq tk'wal te Samwel, atzunte Samwel xitma'n te qa mixti' jun kyxol matxi'wt jaw t-sk'o'n Qman Dyos.

11Xitma'ntzuntz te:

—¿Ma o'qe'kxtzun tk'walju'ya?, chij.

—Atixju' ch'ip, ju' k'ik'lel rit, chi Jese xittzaq'we'n.

—Q'manxna'ya tu'n t-xitxokb'aj, qu'n lay tzyetju' qna'j Dyos qa minti' sul, chi Samwel te.

12Xi'tzun tchq'o'n Jese ttxokli. Majx qb'oxinju' tal ku'xun, b'a'n xjal ex tb'anil tka'yink.

Tzajtzun tma'n Qman Dyostz te Samwel:

—Aju' lu, xjansanku'ya tu'n tok te nimaqkawil, chij.

13Tzajtzun tiq'i'n Samwelju' aseyt, ex kub' t-xjansa'nju' ku'xun Dab'i te nimaqkawil kywitzkuju' ttzik. Textzunju' kmuj lu, ulju' t-xew Qman Dyos tib'aj. E'kyajtzun tq'olb'e'n Samwel, xi'tzuntz Rama.

Ajb'en Dab'i te Sawul

14Matxitoqtzun tz'el tpa'ntib' t-xew Qman Dyos ti'j Sawul, ex intoq yajlanjtz tu'n jun xewb'aj myab'a'n tzajni tq'o'n Qman Dyos ti'j.

15Qu'mtzun xikyma'nju' xjal intoq che ajb'en te:

—Ina' tlo'na taye, in yajlanjtza tu'n jun xewb'aj myab'a'n saj tq'o'n Qman Dyos ti'ja.

16Qu'mtzun qo' tchq'oma ayo'ye' ajb'el teya tu'n qjyonteye' jun xjal b'a'n chinb'an ti'j arpa, tu'n tchinb'an ajttzaju' k'ixk'oj ti'ja tu'nju' xewb'aj myab'a'n, tu'ntzun tel ti'ja, chechij te.

17—Kyjya'kna'ye' jun b'a'n chinb'al, ex kyiq'intze', —chi Sawul xittzaq'we'n.

18Xi'tzun tma'n junju' ajb'el:

—Oje wile' jun tk'wal Jese najli B'elen, b'a'n chinb'an; expe' jun b'a'n q'ojil mixti' in xob', inximan nejtl ajtel tma'n jun tyol; tb'anil ka'yin ex ati Qman Dyos tuk'i'l, chij.

19Exi'tzun tchq'o'n Sawul sanjelal tk'etz Jese tu'n txi' kyma'n te tu'n ttzaj t-sma'nju' tk'wal, aju' Dab'i k'ik'lel rit.

20Tzajtzun tchq'o'n Jese Dab'i ju' tk'wal tk'etz Sawul. Ex xi' t-sma'n Jese jun chej iqa'n wab'j tu'n, jun tz'u'n b'in ex jun tal chib'.

21Iktzu'n pona' Dab'i twitz Sawul ex kyejten ajb'el te, ex k'u'jlanjtz b'a'nxi'x tu'n Sawul ex oktq'o'n te tonil;

22Ex xit-sma'n Sawul jun tqanil te Jese, xitkub'sa'n te tu'n tkyej tq'o'n Dab'i tk'etz, qu'n b'a'n ela' toj twitz.

23Qu'mtzun, aj tyajlanjtz Sawul tu'nju' myab'a'n xewb'aj chq'o'n tu'n Qman Dyos, nokten Dab'i chinb'al ti'ju' arpa. Tu'ntzunju' lu intoq jaw tzalaj Sawul ex b'a'ntoq ch'i'ntl ntna'n, ex intoq kyej tzaqpi'n tu'nju' myab'a'n xewb'aj.