Ez 38 - Mam Ostuncalco Bible

Aju' Kok ajb'el te Dyos

1Tzaj yolin Qman Dyos weye', tma:

2Ichan, ka'yinxa tu'me'l tx'otx' Makok, ex yolin toj nb'iye' ti'ju' Kok, nejenel nim toklen toj Mesek ex Tub'al.

3Q'manxa te: Axtma Dyos ja'lu: Kok, nejenel nim toklena toj Mesek ex Tub'al, chin okyele' ajq'oj ti'ja.

4K'anjelti'ja wu'ne', k'okyel nq'o'ne' xokb'il toj ttziya, k'eletza wu'ne' kyuk'i'l kykyaqilju' tcheja, exqe' tchejila tb'anil kyxb'alun, aju' nin tnej xjal te q'oj q'i'nile chukchaq kyk'uẍtx'e'nb'il ex kykolb'il.

5Che k'le'nilekyib' kyuk'i'l xjal aj Persya, aj Etyopiya ex aj Lib'ya, kykyaqilx atiyile kykolb'il ex k'o'ẍ k'uxb'il toj kywi',

6ex kykyaqilju' xjal te q'oj aj Komer ex aj B'et-tokarma te najchaqxi'x toj tb'a'nq'ob'kya'j, aye' txqan tnam mujlikyten tuk'i'la.

7B'inchan tib'a ex q'inqe'tza tq'ojb'ila, kyuk'i'l kykyaqil t-xjala te q'oj ate' tuk'i'la; q'inqe'xa tjaq' tchaq'b'ila.

8Tb'ajlenxi' b'a'npun ab'q'i ktk'ma'ya chaq'b'il tu'n tokxa toj jun tx'otx' ten toj q'oj, ex matxi' tzul dyos tuk'i'l; jun tnam b'ajx sputj kyoj txqan nimaqtnam ex ojetoq kub'naj tejumajx, ex matxi'toq tb'uyitltib' kywi' witz toj Israel. Matxitoq tz'anjtz kyi'j kyoj txqan tx'otx', ex nche najantl kykyaqil toj nak'b'il.

9Kpomela, naku'j muj jupli, tu'n tkub' noj toju' tx'otx' tu'na ex kb'el ttzyu'na naku'j kyq'iq' jb'ala kyuk'i'l kykyaqil t-xjala te q'oj exju' ttanama nim txqan kyb'aj.

10Kxe'l nma'ne', ayine' Dyos Manb'aj: Che b'eltnk'u'n t-xima myab'a'n toju' tq'ijlalil lu.

11Oktma'ya: kb'el ntzyu'ne' jun tx'otx' mixti' klolte, janajla'qe' xjal toj nak'b'il ex min nxikyk'u'j, kykyaqil kyoj nimaqtnam mixti' nintapi kyi'j, mixti' kyjpel ex mixti' xtanb'ilkye.

12Kb'je'letz welq'a'ne' toj; chin okyel tzaqpaje' kyi'j nimaqtnam jawniqe' b'incha'ntl kyu'n xjal kub'ni kyb'u'yi'ntlkyib' tzajniqe' kyoj chukchaq nimaqtnam, ate' kywakyix ex txqantl ti'xti' kye ex najliqe' toj nky'ajchaq twitz tx'otx'.

13Kxel qani'n teya kyu'n xjal aj Sab'a, aj Dedan, exqe' xk'aẍlil aj Tarsis ex kye txqantl nimaqtnam, kjalu: ¿Ma matzula elq'al? ¿Mache tzaj tb'u'yi'na t-xjala te q'oj tu'n taq'pon tq'ob'a ex tu'n kyb'je'tz telq'a'na saqpwaq ex q'anpwaq, e'wakx ex txqantl ti'xti' qeye', tu'ntzun t-xitiq'i'na txqan q'inumal nimxi'x? chechi.

14Yolintzuna toj nb'iye' te Kok, q'manxa te: Chi Dyos kjalu: Ajtanq'in ntaname' Israel toj nak'b'il, kxe'la ti'j

15Tzajx toj ttx'otx'a najchaqxi'x toj tb'a'nq'ob'kya'j, kyuk'i'l txqan t-xjala te q'oj kuwqe', kyuk'i'l txqan t-xjala kyi'j chej,

16kq'ojiltzuntza ti'ju' ntaname' Israel. Kb'el noj twitz tx'otx' tu'na Kok, naku'j q'eqmuj. Tojtzun mankb'il q'ij lu ktzajel wiq'i'na ti'ju' ntx'otx'e', tu'ntzun tel kynik' txqantl nimaqtnam weye' ajnyek'unteye' woklene' xjan ti'ja.

17Ayine' Dyos Manb'aj nchin q'mante: Ti'j toqa nchin yolina'ye' ojtxi', tej intoq chin yoline' kyu'nel nmajine', aye' nsanjelale' toj Israel; kyma tpakb'al ojtxi' qa oktoq nchq'a'ya tu'n tula q'ojil ti'j Israel.

Tz'e'ysb'il twitz Kok

18Ayine' Dyos Manb'aj nchin q'mante: Ajtok Kok toj Israel, tzul ntx'u'jile' b'a'nxi'x.

19Kxe'l nma'ne' toj ntx'u'jile', tzun jun kyajnajnab' kuwxi'x toj Israel toju' tq'ijlalil lu.

20Che lu'lulju' kyiẍ toj ninnjab' nwitze', e'pich' twitz kya'j, e'tojk'ul txkup exqe' nche qititinje, ex kykyaqil xjal twitz tx'otx'. Che b'elniq'ju' witz, che b'eltz'aqu' pik ex kykyaqil nimaqtapi che kb'eltz'aq.

21-22Tzul nq'o'ne' tkyaqil k'ixk'oj tib'aj Kok, kxob'elxi'x kyu'n. Kntz'e'ysa'ye' twitz tu'n yab'il ex b'yonkamik. Ktzajel nq'o'ne' kyq'iq' jb'al, saqb'aqun, q'aq' ex ttxtajil q'ol tib'aj, kyib'aj t-xjal te q'oj ex kyib'aj txqan xjal k'le'nqe' tu'n, ex che q'ojilju' t-xjal kyxolx tu'n k'uẍtx'e'nb'il. Ayine' Dyos Manb'aj nchin q'mante.

23Ikytzu'n knyek'u'ye' wipumale' ex xjan qine', kye txqan tnam. Kxel nyek'u'n wib'e' kye, k'eleltzun kynik'tz qa ayine' Dyos Manb'aj, chi Dyos.