1Matxi'toqtzun ten wuq xjawju' tkax Qman Dyos toj kytanam pilistey.
2E'b'ajtzajtzun kytxko'n pilistey pale exqe' ajpkab' ex xikyqani'n kye:
¿Titi' qse'ye' ti'ju' tkax Dyos Manb'aj? Kymantze' kse'n tu'n tanja' qanjsa'n ti'je' jatoq ta', chechij.
3Xi'tzun kytzaq'we'n:
—Qama tz'anj kyajsa'n ti'ju'ye' tkax Kydyos aj Israel, lalun tz'anj kyq'o'ne' naqkukx, kyq'onx jun oyaje' tu'n tpaju' taq'wix xkyb'inchaye' teju' Dyos. Che b'anixeltzuntze' ex kkaneb'el toj kywitze' tiqu'n na'mx tq'jenju' tz'e'ysb'il kywitze', chechij.
4Xi'tzun kyqani'n pilistey:
—¿Ti'tzun b'a'n tu'n txi' qq'o'ne' tu'n tpaju' taq'wix xqb'inchaye'?, chechij.
Xi'tzun kytzaq'we'nju' pale:
—Jwe' tilb'ilal tx'a'k q'anpwaq, jun tu'n junjun nejenel pilistey; ex jwe' tilb'ilal ich' q'anpwaqx, qu'n matxi' che tak'e' kyuk'i'lju' nejenel kyeye' tu'n junx yajb'il.
5Qu'mtzun kyb'inchanku'ye' kyilb'ilalju' tx'a'k ex kyilb'ilalju' ich' nche yajun toju' tx'otx', ex kynimanktze' Dyos Kydyos aj Israel; qape'tzunlo lay ttz'e'ysatl kywitze', exqe' kydyose' ex kytx'otx'e'.
6Lalun kub' kypi'sa'n kyib'e', kse'n b'ajkye aj Ejipt exju' nimaqkawil kye, qu'n e'etz kytzaqpi'n aj Israel tzmaxi'j ttzaj tq'o'n Dyos tz'e'ysb'il kywitz.
7Kyb'inchanku'ye' jun karet ak'a'j; ex kyiq'intze' kab'e' ttxu wakx tzma nche alan ex b'ajx che iqana', ex che kyq'onkye' tu'n txi' kyjk'u'nju' karet, ex lalun kyaje' tu'n kyxilpeju' kyal kyi'j, kyq'onqe'kje' kyal toj kyja.
8Kyiq'intzju'ye' tkax Dyos Manb'aj ex kyq'onkxe' toj karet, ex kyq'onqeku'ye' ti'xti' q'anpwaq kxe'l kyq'o'ne' tu'n tpaju' myab'a'n xkyb'inchaye' toj jun kax, toj jun plajtl. Ex kytzaqpinxe' karet tu'n txi' tjunal.
9Kyka'yinxtzuntze' b'a'nxi'x: qama txi'ju' karet tu'me'l B'et-semes, tojxju' ttx'otx', tu'ntzun Qman Dyostz saja' yajb'il lu qib'aj; qatzun myatzu' xxa', k'elel qnik'tz qa myate xkub' tz'e'ysante qwitz, noqtzunlo soktz'aqxi'tz qi'j, chechij.
10Kyb'inchatzunju' ichan lu ikyju'. Tzaj kyiq'i'n kab'e' ttxu wakx akxtoq nche ch'iy kyal, ex tkyejlenxi' kyjpu'nju' kyal toj kyja, e'okkyk'lo'n ti'ju' karet;
11ex jax kyq'o'nju' tkax Qman Dyos toju' karet, tuk'i'lju' kax ja tku'qexa' tilb'ilal ich' ex tx'a'k q'anpwaqqe'.
12E ik'b'ettzun kye wakxtzu' toju' b'e inxi' B'et-semes, intoq che jaq'un ex axtoqte kyb'eju' ljo'n, mixti' elkypa'n kyib' ti'j. Exi'tzu'n lpe pilistey kyi'j tzmax jata' nqach te B'et-semes.
13Aye'tzunju' xjal najlqe'toq B'et-semes, ju' intoq che jon triy toju' b'ya', tej txi' kyka'yi'nju' kax e'jaw tzalaj b'a'nxi'x.
14Tej tponju' karet toj tnajb'il Joswe te B'et-semes, we' atzu'. Atitoqtzun jun nin ab'j atzu'. Aye'tzunju' aj B'et-semes kub' kysi'wi'nju' ttzeylal karet, ex e'kub' kyq'o'nju' ttxu wakx te chojb'il k'ok'sb'il twitz Qman Dyos.
15Matxi'toqtzun ku'tz kyiq'i'n aj Leb'i tkax Qman Dyos exju' kax jatku'qexa'ju' ti'xti' q'anpwaq, ex matxi'toq jaxkyq'o'n tib'aju' nin ab'j; kub' kyq'o'nju' aj B'et-semes chojb'il k'ok'sb'il ex junjuntl chojb'il twitz Qman Dyos toju' q'ij lu.
16Aye'tzu'n jwe' nejenel kye pilistey, tb'ajlenxi' kyka'yi'n ja'lu, anjkyi'j Ekron texju' q'ij lu.
17Aye'ju' jwe' tilb'ilal tx'a'k q'anpwaq tzaj kyq'o'n pilistey tu'n tpaju' kyil twitz Qman Dyos, kyu'n junjunju' tnam Asdod, Kasa, Askalon, Kat ex Ekron;
18aye'tzu'n ich' q'anpwaq kyinx kyajlalju' kse'n kyajlalju' nimaqkytanam jwe' kynejel pilistey, ayileju' nimaqtnam jpu'mile kyi'j tu'n nimaqtapi exqe' kojb'il mixti' tapi kyi'j. Majx kyej tenju' nin ab'j ja kub'a' q'o'n tkax Qman Dyos toj ttx'otx' Joswe, ju' aj B'et-semes.
19Eltzun tiq'i'n Qman Dyos kychwinqlal oxnaq lajoj (70) aj B'et-semes tu'n tpaj ku'x kyka'yi'n toju' kax. Eb'aj oq'u' tnam tu'n tpaj txqan xjal eb'aj kyim kyxol tu'n Qman Dyos.
20Kymatzu'n aj B'et-semes; ¿Alxi'xkye k'anq'il twitzu' Qman Dyos xjan lu? ¿Jawtzunlo jakxe'la'tl tu'n lalun ten qxol?, chechij.
21Ex xikysma'n tqanil lu kyeju' xjal aj Kyiryat-jeraym: Matxi' tzajkyansa'n pilistey tkax Qman Dyos; qu'mtzun kukytzaje' q'ilte, chechij.
Who We AreWhat We EelieveWhat We Do
2025 by iamachristian.org,Inc All rights reserved.