Is 51 - Mam Ostuncalco Bible

Yol q'uqb'ab'l tk'u'j Jerusalen

1Intma'n Qman Dyos kjalu:

Kyb'intzpe'ye' kykyaqile' kyajb'ile' tu'n kyanq'ine' toj ttxolilti'j

ex nche jyone' wi'je'.

Kyka'yinxpe'ye' pik jaẍe' ela' iq'i'ne',

exju' lukb'en ja e'etza' q'i'ne';

2kyka'yinxpe'ye' Ab'raam, ju' kymane',

ex Sara, ju' ja e'ela' itz'ja'ye'.

Tjunaltoq tej ntxkonteye',

kub'tzun nky'i'wla'ne' ex nim tyajajil e'tzaj nq'o'ne'.

3Chin okyele' majx b'a'n tuk'i'l Syon,

aju' nintnam majxtoq kub'ni xitj.

K'okyelju' tzqij tx'otx' toj chq'ajlaj wu'ne' kse'n jun awal,

kse'n awal kub' nq'o'ne' toj Eden.

nim tzalajb'il ktenb'el atzu',

k'okyel b'itz ex chnab' te ninb'il.

4Chin kyb'intzpe'ye', tnam,

chin kyb'intze' nimaqtnam:

kxel nchik'b'a'ne' nxnaq'tzb'ile'

ex kkyq'a' nchaq'b'ile' spik'un kyoju' tnam.

5Naqch'inxtl nkanb'ane',

ch'inxtl tul kanunju' kolb'il wu'ne',

che nkawi'ju'ye' tnam tuk'i'l wipumale'.

Che ayolju' tnam ttzi ninnjab' wi'je'

ex kqeb'il kyk'u'j ti'ju' wipumale'.

6Che ka'yinxe' twitz kya'j,

ex che ka'yinku'ye' twitz tx'otx':

kb'el najte' kya'j kse'n sib',

kb'elb'aju' tx'otx' kse'n jun xb'alun

ex che kyimelju' xjal najlqe' twitz kse'nqe' us.

Atzunwe' kolb'il wu'n tejumajx,

ex mixti' b'ajsb'il teju' kanb'ab'l wu'ne'.

7Chin kyb'intzpe'ye', aye'ye' b'i'n tnik'alilti'j kyu'ne',

tnam ntnima'nju'ya nxnaq'tzb'ile'.

Lalun che xob'e' teju' i'lb'il kyu'n xjal,

lalun che jaw b'isune' tu'nju' kyol kuw,

8qu'n che b'ajelkye' kse'n nb'aj jun xb'alun tu'n pok',

kse'n lan b'ajni wan tu'n ẍchuq'.

Atzunwe' nkanb'ab'l tejumajxte',

majx ktenb'elwe' kolb'il wu'n, chi Dyos.

9Iq'i'nktz jumajtlju' tq'ob'a Nman Dyos,

tenx tipumala;

iq'i'nktz tib'a kse'n tb'inchaya ojtxi'

toju' tq'ijlalil ojtxi'xi'x.

B'aj tpẍu'na Raab', nin txkup toj ninnjab';

10kub' tzqiju' ninnjab' tu'na,

aju' a' jaloja t-xelo,

ex tb'inchaya b'e t-xe ninnjab'

tu'n kyik'tzju' e'tzaqpet tu'na.

11Ikytzu'n k'anjetza'kyi'ju' kolpi'n tu'n Qman Dyos,

nche ẍch'in tu'n tzalajb'il aj kyokx toj Syon;

ktzalajel kywitz kukxiju',

okxi'x che tzalajel ex b'a'n che tenb'ela',

mixti'tlte k'ixk'oj ex oq'e'n kye.

12Ayinku'we' chin q'olte tipumala.

¿Alqetzun kxob'ela'ya? ¿Ma kye xjal?

¿Ma kyeju' xjal nche kyim, ikyqe' kse'n k'ul?

13¿Ma oktzun k'ik'el tna'l Qman Dyos tu'na, ju' ch'isanteya,

ju' xislik'unte kya'j ex kyej tkuwsa'n tx'otx'?

¿Ma oktzun klu'lula tkyaqil kmuj,

te kytx'u'jilju' nche yajun,

naq nche ayon tu'n tk'ulb'ana kyu'n?

¿jatzunta'ju' kytx'u'jil lu?

14Alkyete nyajti toju' yajtib'il,

lwiyxi'x ktzaqpetel;

lay kyimte' toju' jul qxopin

ex ktenb'el twa kukxju'.

15Ayinwe' Dyos Manb'aj kyib'aje',

a nb'iju'ye' Dyos Manb'aj nimtipumal;

ayine' nxiyukchante ninnjab'

ex e'jaw tinunju' ttolob',

16xinslik'u'ne' kya'j

ex kyej nkuwsa'ne' tx'otx'.

Kub' nq'o'ne' nyole' toj ttziya

ex nkola toj nq'ob'e'.

Aya ntaname', nchije' te Syon.

17Na'ntztib'a Jerusalen, lwix we'ktza.

Matzikxju' ttx'u'jil Qman Dyos tu'na

kse'n jun xjal nxitk'wa'n q'e'n,

nxitk'wa'n tzmax ajtb'aj tu'n,

tzmax ajttzyet twi' b'a'nxi'x.

18Mix-a'lo' jun kb'entel t-xiẍaqlunteya,

kyxol kykyaqilju' tk'wala;

mix-a'lo' jun kxel xqnonteya

kyxol kykyaqilju' tk'wala ẍe'ch'iy tu'na.

19Mache tzaju' kab'e' xitb'il lu tib'aja:

makub' xitu'n ttanama ex mab'je'x iq'i'n tkyaqil ti'xti' toj,

ex mache b'ajkyimju' twnaqila tu'n we'yaj ex toju' q'oj.

¿Alkye ktzajel laqj tk'u'j ti'ja?

¿Alkye kq'uqb'alte tk'u'ja?

20Mixti'x kyipumalju' tk'wala

kse'nqe' pich' matxi' che kyej toj xpatxab',

woqo'jqe' jaxjaku' kyoj xky'ichb'e,

k'ixb'iniqe' tu'n ttx'u'jil Qman Dyos,

tu'nju' tzak'b'il tu'n Dyos.

21Qu'mtzun, b'intzju'ya lu, nintnam kub'ni b'o'lja,

aya ntx'ujtiya, mya tu'n b'in;

22Lu ntma'n Qman Dyos,

aju' nkolon kyi'ju' ttanam, ikjalu:

K'elel wiq'i'ne' k'wab'j lu toj tq'ob'a

matxi' tx'ujtiya tu'n;

lay k'wantla ti'ju' ntx'u'jile'.

23Kxe'l nq'o'ne' kyeju' ẍe yajun teya,

kyeju' ntoq kyma'n teya:

Xonku'tib'a twitz tx'otx', qo ik'ele' tib'aja, chechij;

atzunta ku chija, kub' t-xon tib'a twitz tx'otx'

tu'n tkub' wab'e'na kse'n quq.