Nm 18 - Mam Ostuncalco Bible

Kyaq'unxi'x pale ex aj Leb'i

1Tzaj tma'n Qman Dyos te Aaron kjalu:

Kyib'aje' ta' kyuk'i'lju' tk'wala exqe' txqantl tyajajil Leb'i, ja tzajna' tyajila, qama b'aj jun ti'xti' ti'ju' ja xjan; atzu'n qa tilo jun ti'xti' myab'a'n makyb'inchaye' toju' kyaq'une' te pale, naq kyib'aje' ta' kyuk'i'lju' tk'wala.

2Ex q'manxa kye txqantl tyajajil Leb'i ja tzajna' tyajajila, tu'n kyonin tuk'i'la ex kyuk'i'l tk'wala toj ajb'eb'l twitzu' ja teju' yol kyejni b'entti'j.

3Kche ajb'el teya ex toju' ajb'eb'l teju' ja xjan, naqtzun o'kx mixti' tu'n kyoklq'e kyi'ju' ti'xti' inche ajb'en toju' ja xjan ex tk'etzju' q'olb'eb'l, qu'n qatzun min kche kyimele' kyuk'i'l.

4Ati tu'n kyten tuk'i'la toju' ajb'eb'l toju' Ja te Mujb'ab'ltib'il ex toj tkyaqilju' aq'untl kb'inchetel toj. Naqtzun o'kx mix-a'lo' jun xjal mya aj Leb'i kpomel lq'e kyk'etze';

5aye'kye' ati kyoklene' ti'ju' ajb'eb'l toju' ja xjan ex ti'ju' q'olb'eb'l. Laytzun tzajtl ntx'u'jile' kyi'j aj Israel.

6E' el npa'nju'ye' titz'ina aj Leb'i kyi'ju' txqantl aj Israel tu'n kyxi' nq'o'ne' kyeye', tu'ntzun kyajb'en toju' aq'untl toju' Ja te Mujb'ab'ltib'il;

7naqtzun o'kxta kyuk'i'lju' tk'wala kche aq'unale' te pale ti'j tkyaqilju' aq'untl ti'ju' q'olb'eb'l, mujqa ti'ju' kb'inchetel ti'jxi' xb'alun. Aye'ye' tu'n kyb'inchante aq'untl lu, qu'n ayine' ẍinx q'onte kyoklene' tu'n kyaq'unane' te pale. Qa alo' jun matb'incha jun aq'untl kse'nte pale, extzun mya pale, ati tu'n tkyim, chi Dyos.

K'a'chb'ilkye pale ex aj Leb'i

8Tzaj tma'n Qman Dyos te Aaron kjalu:

Matxi' che kyej nq'o'ne' oyaj nche tzaj q'o'n weye' toj tq'ob'a. Tkyaqilju' oyaj xjansa'n ntzaj kyq'o'n aj Israel weye', kxe'l nq'o'ne' teya ex kyeju' tk'wala, ju' ati kyoklene' ti'j, majx kjeltenju' nuk'b'il lu kukxju'.

9Teju'ya oyaj twitz awal k'ok'e'kywitz exju' chojb'il kb'el kyq'o'n aj Israel tu'n tpaj il, kyi'ju' chojb'il inche kub' tz'e'yset; tkyaqilju' oyaj xjansa'n lu teya ex kyeju' tk'wala.

10Kykyaqilju' q'a kyxole' b'a'n tu'n kywan ti'ju' oyaj lu, naq o'kx ati tu'n kywante toj jun najb'il xjansa'n, qu'n xjanqe'.

11Exqe'ju' oyaj nim kyoklen ktzajel kyq'o'n aj Israel weye', kxe'l nq'o'ne' teya, kyeju' tk'wala ex kyeju' tmyala najlqe'x tuk'i'la. Majx kjeltenju' lu te jun kawb'il. Alkyexku' xjal kyxolju' toj tjaya ẍtilsa'n tib', b'a'n tu'n twan ti'j.

12Exqe' tnejel kywitz awal che tzajel kyiq'i'n aj Israel weye' atl junjun ab'q'i, che kxe'l nq'o'ne' teya: tb'anil aseyt, tb'anil b'in ex triy.

13Exju' tnejel twitz kyawal ktzajel kyiq'i'n weye', che kxe'l teya. Alkyexku'tzun xjal kyxolju' toj tjaya ẍtilsa'n tib', b'a'n tu'n twan ti'j.

14Tkyaqilju' oyaj makyxjansa aj Israel nwitze', kxe'l teya.

15Kykyaqil tnejel kyk'wal aj Israel mujqa tnejel tal kyalu'n matzaj kyq'o'n weye', che kxe'l teya. Aye'tzu'n tnejel kyk'wal xjal ex tnejel kyal alu'mj tz'ilqe', kxe'l tqani'na jun kyxel.

16Ati tu'n tchjetju' kyxel tb'ajlenxi' jun xjaw kyitz'jlen, jwe' saqpwaq kchjetel, kse'nxju' pwaq toju' ja xjan, ch'inxmi tz'aqla' nik'jan ons talal.

17Aye'tzunju' tnejel kyal wakx, tnejel kyal rit mujqa tnejel kyal chib', lalun tk'ama kyxel. We qe'weju'ye', ati tu'n kykub' tb'yo'na; kb'el tq'o'na kychk'el tib'aju' q'olb'eb'l, atzunju' t-until kb'el ttz'e'ysa'na te jun oyaj tb'anil tk'ok'jal weye'.

18Atzunju' tchib'jil b'a'n tkyaj teya, exju' ttzitk'u'ju' alu'mj, qu'n a oyaju' tb'anil, exju' tkux toj tb'a'nq'ob'.

19Tkyaqilju' o'nb'il matz'el kypa'n aj Israel weye', kxe'l nq'o'ne' teya, kye tk'wala ex tmyala najlqe'x tuk'i'la. Jun kawb'ilte' lu majx kjelten. Jun yol kjel b'entti'j wu'ne' tejumajx tuk'i'la ex kyuk'i'l tyajajila, chi Dyos.

20Tzaj tma'ntl Qman Dyos te Aaron kjalu:

Lay txi'ta ttx'otx' ex tetzb'il kse'nkye' txqantl aj Israel. Ayine' chin okyel te teya ex tetzb'ila toj Israel.

21Atzu'n kye' aj Leb'i aju' tlajoji'n tnej tzul kyiq'i'n aj Israel ti'ju' kyawal ajtjaw, kxe'l nq'o'ne' kye te chojb'ilteju' kyajb'eb'l toju' Ja te Mujb'ab'ltib'il.

22Mixti' tu'n kyoklq'eju' txqantl aj Israel tk'etzju' Ja te Mujb'ab'ltib'il, qu'n juku' che b'incha'n il tu'n kykyim.

23O'qe'kxju' aj Leb'i che ajb'el toju' Ja te Mujb'alb'tib'il, ex kyib'aj ta' qa ati jun ti'xti' myab'a'n makyb'incha. Majx kjelten ja'lu te jun kawb'il kukxju', ex kjel kyma'ne' toj wiqi'nwiq kye kyk'wale'. Lay ten kye aj Leb'i kytx'otx' toj Israel.

24Matxi' txinq'o'ne' tlajoji'n tnej, ju' ati tu'n kyq'onte aj Israel weye' ti'ju' kyawal injaw, kye aj Leb'i. Qu'mtzun matxi' txinma'ne' kye qa mixti' tu'n tten kytx'otx' toj Israel, chi Dyos.

25Tzaj tma'n Qman Dyos te Moyses kjalu:

26Q'manxa kye aj Leb'i, aj kyk'monteju' tlajoji'n tnej kye aj Israel ti'ju' kyawal injaw, ju' oje txi' nq'o'ne' te kye, ati tu'n tel kypa'n jun tlajoji'n tnej tu'n ttzaj kyq'o'n weye'.

27Atzun ati tu'n kyq'onteju' weye', kse'nxju' ntzaj kyq'o'n aj Israel weye' ajttzaj kyq'o'n jun tnej ti'ju' kytriy mujqa ti'ju' ta'l ky-ub'a.

28Iktzu'n, k'elel kypa'n aj Leb'i kyoyaj weye' ti'ju' tlajoji'n tnej kxel kyq'o'n aj Israel kye, ex kxel kyq'o'n teju' pale Aaron.

29Ati tu'n tel kypa'n jun tnej tu'n kyq'onte weye' ti'j tkyaqilju' kxe'l q'o'n kye, ex aju' tb'anilxi'x kyxjansa' nwitze'.

30Ex q'manxa kye, telenxi' kypa'nju' tnej tb'anilxi'x weye', b'a'n tu'n tok kyq'o'nju' txqantl te kytriyku' ex kyb'inku'.

31B'a'n tu'n kywante exqe'ju' toj kyja toj alkyexku' najb'il, atzun twikyk'u'ju' tu'n kyajb'eb'l toju' Ja te Mujb'ab'ltib'il.

32Qa matxi'toq tz'el kypa'nju' tb'anilxi'x weye', b'a'n tu'n kywanteju' txqantl ex mixti' kyil tib'aj; qa makyb'incha ikju', lay kub' kytxa'ju'n oyaj xjan ntzaj kyiq'i'n aj Israel, ex mixti' tu'n kykyim, chi Dyos.