1 S 20 - Mam Ostuncalco Bible

Onin Jonatan ti'j Dab'i

1Etz oq Dab'i toj Nayot te Rama, xi'tzuntz jatoq ta' Jonatan, qanilte te:

—¿Titi' matxi' nb'inchaye'? ¿Titi' npaje'? ¿Titi'ju' wile' matxi' nb'inchaye' twitz tmana, tu'nju' inchin tjyo'ne' tu'n nkub' tb'yo'ne'?, chij te.

2Xittzaq'we'n Jonatan te:

—¡Awt Qman Dyos myonte! ¡Lay kub' b'yo'nta tu'n! B'i'na'ta tu'n qa mixti' jun ti'xti' intb'incha'n nmane', qa mixwitti' saj tma'n weye'. ¿Ti'wttzunlo kb'ela' tewi'n nmane' weye'? ¡Layna'te' ikju'!, chij te.

3Xi'tzun tma'ntl Dab'i:

—B'i'na' tu'nte tmana qa b'a'n qten tuk'i'la, exlo min tajb'il tu'n tb'inteya tu'n mitzaja' jun q'oj kyxole'. ¡Lu Qman Dyos in ka'yin axxi'x naq in nelje wi'je'!, chij.

4Xi'tzun tqani'n Jonatan te:

—¿Ti'tzun tajb'ila tu'n nb'inchanteye'?, chij.

5Atzunte Dab'i xittzaq'we'n:

—Najchi'jna' tq'ij ak'a'j xjaw ex qotenb'il toju' wan tuk'i'lju' nimaqkawil. Qu'mtzun, q'om oxe' q'ija weye' tu'n wewane',

6qatzun machin tzajtqani'ne' tmana, q'manxa te qama txinqani'n anb'ile' teya, qu'n ntoq ojqelanxi'x tu'n nxi'ye' toj ntaname' B'elen, kykyaqilju' toj njaye' nkub' kyik'sa'n ninq'ij tu'n tq'et chojb'il atl junjun ab'q'i.

7Qama ttzaq'we b'a'ntzunlotz, kqeb'iltzun nk'u'jtze'; qatzun matzajttx'u'jil, k'eleltzun tnik'tza qa tajb'il tu'n tb'inchante jun taq'wix weye'.

8Qu'mtzun b'inchama xtalb'il, ajb'el qinpena'we' teya expe' oje kyej b'entti'j qu'n twitz Qman Dyos tu'n qten toj b'a'nil. Qatzun ayine' tinpaje' chin tb'yonku'ya. Mya' ilti'jtz tu'n nxi' tiq'i'na twitz tmana, chij te.

9Xi'tzun ttzaq'we'n Jonatan:

—¡Lalun kub' t-xima'na ikju'! Qa manb'iwe' qa ikt-xim nmanjuye' ti'ja, kxel nma'we' teya, chij te.

10Xi'tzun tqani'n Dab'i te:

—¿Alkyetzu'n tzul q'malte weye' qa min xkub' toj twitz tmana?, chij.

11Xitmantl Jonatan te:

—Qo'ya wuk'i'le' toj kojb'il, chij.

Xi'tzun kyk'le'kyib'tz,

12atzuntzu' xa' tma'na' Jonatan te:

—Lu Qman Dyos nka'yin qa najchi'j mo kab'j, qloqxja'lu, knb'iye' titi' nt-xima'n nmane' ti'ja, tzultzun nsma'n tqanile' teya;

13qatzun tajb'il tu'n tb'inchante taq'wix ti'ja, extzun min xinma'n teya ex lay chin nonine' ti'ja, tz'e'ysanjtzku'wej nwitz. ¡Ex awt Qman Dyos tz'oninteya kse'n sonin ti'j nmane'!.

14Qatzun itz'qinxe' toju' tq'ijlalil lu, b'inchama xtalb'il weye' kse'nxju' xtalb'il ntk'mo'na te Qman Dyos. Qatzun nchin kyimkuye',

15-16ka'yinqexch'inta toj njaye'. ¡Aye'tzu'n tajq'oja che kyimxwit, ex awt Qman Dyos q'onte tu'me'l t-xel kye! chij.

Iktzu'n xa'ttziya'n Jonatan te Dab'i,

17ex tu'nju' kyexi'x kyten Jonatan tuk'i'l Dab'i, nakuj kyitz'inkyib', kyej tma'nxi'xtl tu'n tjapunju' tyol.

18Tmatzuntz:

—Najchi'j, ninq'ij tq'ij ak'a'j xjaw, mixna' a'lo'x kb'el qe toju' tq'a'jtza, mixloti'xte k'elela'ya.

19Tojixi'tzunlo toxi'n q'ij k'elelxi'x tnik'tzila. Qu'mtzun, kutxi'ya ewal jaxju' ewana'ya jumaj, ex atzu' tenku'ya tk'etzju' jun b'yuj ab'j.

20Kxe'l nxone' oxe' talsmaj toju' plaj lu, naku'xwitloj nchin xnaq'tzanwib'e' tu'n nnik'u'ne' b'a'nxi'x,

21kxe'l nma'ntzuntze' teju' nmajine': kutxi'ya jyolkyeju' talsmaj, nchiku'ye'. Qama txinma'ne' te: Xi' ta'qe' nqaku'ch'i'ntl tza'lu; lwix iq'inqe'tza', qa nchije' te. B'a'ntzun tetzuntza, qu'n mixti'te nb'aj. Axxi'x, nxinma'ne' teya twitz Qman Dyos.

22Qatzun matxinma'ne' te: Xi' ta'qe'ju' talsmaj max chix, qa nchije' te, Kutxi'tzuntza qu'n tajb'il Qman Dyos tu'n toqa.

23Qu'n twitzku'te' Qman Dyos qtziyaya' qyol kyejni b'entti'j, chij te.

24Xi'tzun Dab'i ewal toj kojb'il, tetzunj tponju' tq'ij ak'a'j xjaw, kub'qeju' nimaqkawil wal ti'j mes.

25Kub' qe twitz ja, jaxu' nkub'a' qe. Atzunte Jonatan kub' qe twitz, atzunte Ab'ner ttxlaj Sawul. Atzunju' tq'uqb'il Dab'i mix-a'lo' kub' qe toj.

26Mixti'te Sawul tma toju' q'ij lu, qu'n kub' t-xima'n qa b'aj tz'ilix tu'n jun ti'xti' exqa tu'nju' lu laytaq ten.

27Ex ikx toj tkab' q'ij teju' ninq'ij, mix-a'lo'x kub' qe toj tq'uqb'il Dab'i. Xitqani'ntzun Sawultz teju' tk'wal:

—¿Tiqu'n mixti' ulju' tk'wal Jese wal ewi ex ja'lo?, chij

28Atzunte Jonatan xittzaq'we'n:

—Tzaj tqani'n Dab'i anb'il weye', qu'n nojqelanxi'x tu'n txi' B'elen.

29Kub'san weye' tu'nt-xi' nq'o'ne' anb'il tu'n txi', qu'n nkub' kyik'sa'n toj tja jun chojb'il toj ttanam ex tchaq'ju' ttzik tu'n txi'. Expe' tzaj tma'n weye' qatoq kxe'l xb'etzalkyeju' twitze'l. Qu'mtzun mixti' xkub' qe wal tuk'i'la nimaqkawil, chij.

30Tzajtzun ttx'u'jil Sawul ti'j Jonatan, ex tma:

—¡Tal ttxu tx'yan! ¡chita qa min b'i'n wu'ne' qa kyexi'x ttena tuk'i'lu' tk'wal Jese, ma min nche ch'ixwiye' tuk'i'l ttxuya!.

31Qa min xb'ajte' ichan lu twitzju' tx'otx', nneljeti'ja tuk'ilju' tkawb'ila tu'n. ¡Qu'mtzun chq'onxa tjoyli ex q'intza, qu'n ati tu'n tkyimte' lu!, chij te.

32Atzunte Jonatan xittzaq'we'n te:

¿Tiqu'ntzun kkyimela'? ¿ti'tzu'n matxi' tb'incha?, chij.

33Oktzun t-xnik'cha'n Sawul tk'uẍtx'e'nb'il ti'j Jonatan. Kanetzuntz toj twitz qa a tajb'il tmanju' tu'n tkub' tb'yo'n Dab'i.

34Jawtzun we' Jonatan ti'j mes tuk'i'l ttx'u'jil, ex mixti' wan ti'ju' wab'j toj tkab' q'ij, qu'n ojexi'x b'isun ti'j Dab'i, ex matxi'toq tz'ok q'o'n ttx'u'jil tu'n tman.

35Tetzun prim te jun q'ijtl, ex Jonatan tuk'i'l jun tmajin ku'xunx toj kojb'il tojxu' kmuj b'entniti'j kyu'n tuk'i'l Dab'i,

36tchaq'tzuntz te:

—Kutxi'ya ojqel jyolkye talsmaj kxe'l nxone', chij.

Xi' ojqelantzun majentz, atzunte Jonatan xi't-xon jun talsmaj kuw, tu'n tpon tz'aq najchaq.

37Tetzunj tponju' majen ja kub'a' tz'aqu' talsmaj, xit-ẍch'in Jonatan kuw teju' tmajen:

—¡Xi'ta'qekye' talsmaj max chij!, chij.

38Xit-ẍch'i'n jumajtl Jonatan teju' tmajin:

—¡Lwixi'x kutxi'ya, lalun kub' we'ya!, chij.

Jawtiq'i'n tmajin Jonatan talsmaj ex tzaj tiq'i'n teju' tajaw,

39ex mixti' eltniky' ti'j, qu'n o'qekxkye Jonatan ex Dab'i b'ilteju' techlal.

40Yajxi'tzuntel e'xitq'o'n Jonatan taq'unb'il te q'oj teju' tmajin ex xitma'n te tu'n kyxitiq'i'n toj nintnam.

41Naqtzun nb'ent tanjti'ju' majin, etz Dab'i ti'jxi' jun b'yoj ab'j, ex majx kub'joqe oxmaj twitz Jonatan. B'ajtzun kychle'nkyib', eb'aj oq' ex okkyma'tzi'nkyib', ojexi'x kub' toq'je'n Dab'i.

42Yajxi'tzuntl xitma'n Jonatan te Dab'i:

—Kutxi'ya toj b'anil, qu'n toj tb'i Qman Dyos oje qmaya' qyol, ex oje txiqqani'n te tu'n tten quk'i'l tejumajx, ex kyuk'i'lju' tyajajila ex kyuk'i'lju' we', chij te.

Kub'tzun b'etz tu'n Dab'i, atzunte Jonatan anjtzti'j toj nintnam.