Zac 8 - Mam Ostuncalco Bible

Yol tzaj ttziya'n Qman Dyos tu'n tb'inchante

1Matzaj tq'o'n Qman Dyos nimtipumal pakb'ab'l weye' lu:

2Atzun lu nmane' ayine' Qman Dyos nimtipumal: Nchin xky'aqline' ti'j Syon, tx'u'j xky'aqli'n.

3K'anjetl wi'je' toj Jerusalen tu'n nnajane' toj. Ex atzunju' Jerusalen k'okyel tb'i nintnam japumnixi'x ti'j, exu' witz te Qman Dyos nimtipumal k'okyel tb'i witz xjan.

4Che kb'el qe jumajtlu' tijwnaq ichan ex qya kyoju' k'wik toj Jerusalen, teyile junjun k'okyelju' ktze te kyipumal tu'n tpaju' matxi' che tijin.

5Che nojelju' k'wik toju' nintnam kyu'n k'wal q'a ex txin ex che ẍchal toj.

6Ch'uẍ k'elela' toj kwitzu' jni'tl che kjelten toju' ntaname' toju' tq'ijlalil lu; atzun wewe' mya ch'uẍ k'elela'. Ayine' Dyos Manb'aj te tkyaqil ipumalj, nchin q'mante:

7Knkla'ju'ye' ntaname' te tipumalju' tnam te tjawetzq'ij ex teju' tnam te tkub'exq'ij.

8Ex ktzajel wiq'ine' toj Jerusalen tu'n tnajan atzu'. Kche okyeltzuntz te ntaname', chin okyele' te Kydyos axxi'x ex toj tnik'alilkyi'j, chi Dyos.

9Atzun ntma'n Qman Dyos nimtipumal kjalu: Kq'onk tilile', aye'ye' matxi' kb'ijuye' tpakb'al kyeju' sanjelal toju' tq'ijlalil lu, tzaj toju' q'ij tej tku'x q'o'nju' tq'uqlil tja Qman Dyos tej tkub' b'incha'n jumajtlu' tja Qman dyos te tkyaqil ipumalj.

10Qu'n mixtoqti' twi' kyk'u'j xjal ojtxi' exqe' alu'mj. Tu'n kpaju' ajq'oj, mixtoqti' nak'b'il kyeju' najlqe' toj, extzun ayine' ẍin b'inchante tu'n kyjaw miltz'uj junjun ti'j juntl.

11Atzun ja'lo, lay nb'inchatle' kyeju' ẍe kyejten toju' tnam lu, kse'n toju' tnejel q'ij. Ayine' Dyos Manb'aj nchin q'mante.

12Qu'n ktenb'il nak'b'il kxol. Che witzalju' tqan ub'a; exju' tx'otx', exju' twitz; ex ikxu' kya'j, exju' ta'l che'w. Ex kxe'l nq'o'nwe' lu kyeju' che kjelten toju' tnam lu.

13Ikse'nkye' aj Juda ex aj Israel, myab'a'n kyolinjtze' kxolju' txqantl nimaqtnam, ikxtzu'n che kletele wu'ne' ex che okyel nq'o'ne' te k'iwb'il ja'lo. ¡Lalun che xob'e'! ¡Kuwqexe' toj!

14A intma'n Qman Dyos nimtipumal ja'lu: Mataq kub' nximane' tu'n ttz'e'yset kwitzju' ojtxi' kychmane' tej tok kyq'o'nju' ntx'u'jile', ex mixti' anjtzti'j nk'u'je'.

15Atzun ja'lo, matxi' kub' nximane' tu'n tb'inchetju' b'a'n kyeju' aj Juda ex aj Jerusalen. Qu'mtzun lalun che xob'e'.

16A ati tu'n kyb'inchanteye' lu kukxju': Che yolinqeye' axi'x kxolilexe', che yolinqeye' toj tnik'alilti'j ex kyjyome' nak'b'il kyoju' ja te kawb'il;

17Lalun kb'incha myab'a'ne' te juntl expe' lalun txi' kma'n jun ti'xtiye' mya ax toj tb'i Qman Dyos. Qu'n majx nche elwik'o'ne' kykyaqil. Ayine' Dyos Manb'aj, nchin q'mante.

18Ate Qman Dyos nimtipumal tzaj yolin weye' kjalu:

19Ayeju' mewayi'n kyoju' tkyaji'n, tjweyi'n, twuqi'n ex tlajoji'n xjaw che jawil b'ent te tzalajb'il, te niq'ij tzalajb'ilxi'x kyeju' kyyajilb'en aj Juda. ¡Kyk'u'jlame' axi'x exju' nak'b'il!

20A ntma'n Qman Dyos nimtipumal ja'lu: Ate'xju' xjal najlqe' kyoju' txqan nintnam na'mx kyul.

21Kxe'ltzun kyma'n junjun nintnam kye juntl: ¡Qo'qeye' jyolte Qman Dyos nin tipumal ex qqanix te tu'n qtzaj tk'iwla'n! Aye'tzunju' txqantl kxe'l ktzaq'we'n kye: ¡Ex ikxqe' maqo'xqe'!

22Ex che b'ju'l txqan tnam ex nimaqtnam toj Jerusalen, jyolteju' Qman Dyos ex qanilte te tu'n kykub' tk'iwla'n.

23Tojtzunju' q'ij lu, lajoj najchaq xjal kyoju' txqantl tnam che okyel lutx'e tiju' ttxow jun aj Juda, ex kxe'l kma'n te: ¡Qajb'ilqe' tu'n qxiye' kyuk'i'le', qu'n matxi' qb'iye' qa ati Qman Dyos kyuk'i'le'!