Sal 91 - Mam Ostuncalco Bible

Ate Qman Dyos kolb'ilqe

1Aju' nnajan tjaq' t-xlekumalju'

Qman Dyos ati toj kya'j te tkyaqil ipumalj,

2kxe'l tma'n te Qman Dyos: Aya jun kolb'ilweye',

jun ja te kolb'il wib'e', ¡Ndyose', ja q'uqloka' nk'u'je'! Chij.

3O'kxte ktzaqpilteya

kye xpatxab' ate' toj ewaj ex kyeju' yab'il b'iyul,

4kb'ajel tktxu'n ti'ja kyu'n t-xik',

ex kkletila kyjaq' b'a'nxi'x.

¡Kkletela tu'nju' tyol njapun, kse'n tu'n jun kolb'il!

5Lalun xob'a teju' xob'ajil toj qonik'an,

ex kyeju' talsmaj nche tzaj xon te q'ijtl,

6ex kyeju' yab'il nche b'et toj qxopin,

ex kyeju' kamik nche b'iyun te q'ijtl;

7qu'n che kb'eltz'aq kab'k'al lajnaq (1,000) tu'n kamik toj tnayaja

ex junmutx' jok'al (10,000) toj tb'a'nq'ob'a

atzunta mixti' k'ik'ela'ya.

8Kche tka'yi'ya tu'n twitza:

aj tq'onjtz ju' tu'me'l t-xel kyeju' b'inchal taq'wix.

9Qu'n matxi'na tz'ok tq'o'na Qman Dyos te tewb'ila,

aju' Dyos te toj kya'j te klolteya,

10lay tzaj jun ti'xti' taq'wix ti'ja

ex lay ponju' yab'il toj tjaya;

11qu'n che tzajel tchq'o'n tanjl

xq'uqilteya jaxjaku' matxa'ya.

12Kxe'l q'i'na kyu'n toj kq'ob'

tu'ntzun lalun che pon takpuju' tqana ti'j ab'j.

13Kb'entel tb'eta kyxol b'alun,

kyxol kan ex kyxol nimaqtxkup.

14Knkla'ye',

kb'el nq'o'ne' ja lay che pon kanun txqantl ti'j,

qu'n ojtzqi'nqine' tu'n, ex nchin tk'u'jla'ne'.

15Ajttxokon weye', kxe'l ntzaq'we'ne';

¡ayinku'we' chin tenb'il tuk'i'l!

Knkla'ye' toj b'is

ex kjawil nwab'a'ne' tuk'i'l oklenj;

16ktzalajel wu'ne' toj jun tchwinqlal nimtoj:

¡kntzalajsa'ye' toju' kolb'il wu'ne'! Chi Dyos. Chiju' b'itzal.