Sal 40 - Mam Ostuncalco Bible

Nchin tzalaje' tu'n nb'inchanteye' tajb'ila, Nman Dyos(Sal 70)

1Matz'ok qe nk'u'je' ti'j Qman Dyos,

ex tzaj tb'i'nju' tq'ojq'ojel nwi'ye' tej nkub'sane' te;

2machinjatz tiq'i'ne' toju' jul te kamik,

machin tkole' tu'n lalun chinx mulq'aje' toj sob'on.

Machin kub'twab'a'ne' tib'aj pik;

machin tkuwsa'ye' toj nb'eye'.

3Makub' tq'o'n ak'a'j b'itz toj ntziye',

jun b'itz te ajwalb'ilte Qman Dyos.

Nim xjal eb'jaw lab'ti tej kyka'yinte ja'lu

ex okqe kyk'u'j ti'j Qman Dyos.

4¡Tzalajb'ilte' teju' xjal q'uqlok tk'u'j ti'j Qman Dyos

ex min ntmujb'a'ntib' kyuk'i'lju' pi'sqe' twitz Qman Dyos

ex kyuk'i'lju' nche k'ulun kywitz txqantl dyos!

5Taye, Nman Dyos,

nimte' ti'xti' tb'anilqexi'x matxi' che tb'inchaya

nimju' t-xtalb'ila qib'aje'.

¡Mixti' juntl kse'n aya!

Naqwit b'ajx npakb'a'ne' ex tu'n nyoline' kyi'j,

layxlo b'aj nchik'b'anteye' tkyaqil.

6Min ntzalajta kyi'ju' chojb'il

ex kyi'ju' oyaj twitz awal k'ok'e'kywitz;

ex b'ajx tzaja' tqani'na jun chojb'il k'ok'sb'il

e'oyaj tu'n tnajset il.

Mape' che tjaqju'ya nẍkyine' tu'n nb'inteye' tyola.

7Qu'mtzun oje nmaye': Luqine' lu,

kse'nx tz'ib'a'n toju' tu'jil nyolin wi'je'. Nchije'.

8Inchin tzalajwe' tu'n nb'inchanteye' tajb'ila Nman Dyos;

¡majx na'nqe'ju' t-xnaq'tzb'ila wu'ne'!

9Oje txinma'ne' kywitzku' ttanama nim kyajlal

qa aya tz'aqlixi'x.

¡Nman Dyos, ojtzqi'n tu'na minti' ẍin kyej numeye'!

10Min xkub' njpu'ne' kolb'il tz'aqlixi'x tu'na;

matxi' txinma'ne' qa in japun tyola ex ati kolb'il tu'na.

B'ajx kub'a' wewana'ye' tk'u'jlalila exju' tyola ax,

kywitzju' ttanama nim kyajlal.

11Atzunta Nman Dyos, ¡lalun txi' tewa'n twitza weye'!

¡Chin tkloma tu'nju' tk'u'jlalila ex tu'nju' tyola ax!

12Matxi'na' chin ik'xi'ye' kyoj txqan yajb'il

layxpena' b'ent kyajlet wu'ne'.

Matxi' chin kub'jitz'liye' tu'nxju' wile';

¡expe' matxi' che naju' nwitze'!

Nimxi'x kyajlalju' wile' kywitzju' t-xya'mal nwi'ye',

expe' matxi' chin kub' numje'.

13Najsama Nman Dyos, ¡kuttzaja kolpilweye'!

Taye, ¡Lwix kuttzaja onilweye'!

14¡Che kub'xwit ch'ixwi ex che kub'xwit oq

ju' kyajb'il tu'n nb'o'lje' kyu'n!

¡Che kub'xwit oq toj kych'ixaw

ju' kyajb'il tu'n nb'o'lje' kyu'n!

15¡Che kub'xwit oqju' nche xmayin wi'je'

toj kych'ixaw!

16Aye'tzu'n nche jyon ti'ja

che tzalajxwit;

exqe'ju' nche tzalaj ti'ju' kolb'il tu'na

kymaxwit kukxju': ¡Nim toklen Qman Dyos! Chechiwt.

17Lalun tzik'nna'le' tu'na, Nman Dyos

qu'n prowqine' ex nchin b'isune'.

A na'ta onilweye' ex klol weye';

¡Lwix kuttzaja, Nman Dyos!, Chiju' b'itzal.