Is 44 - Mam Ostuncalco Bible

In japunte Qman Dyos Tyol, O'kxte Dyos

1Chin tb'itza ja'lo, Israel, tyajajil Jakob',

nmajine' sk'o'n wu'ne'.

2Ayinweju'ye' Dyos Manb'aj, ch'isalteya,

b'inchanteya na'mxtoq titz'jiya ex onilteya.

Lalun xob'a, Jesurun, tyajajil Jakob',

nmajine' sk'o'n wu'ne',

3qu'n kb'etel tnimal a' wu'ne' toj chq'ajlaj,

e'tal a' toju' ttx'otx' tzqij.

Kxe'l nq'o'ne' ak'a'j kychwiqlalju' tyajila,

che b'elnk'i'wla'ne'.

4Ex che ch'iyil kse'n itzaj chab'a a'li'n tib'aj,

kse'nqe' chjaj ate' ttzi a'.

5Chilo jun: Te Qman Dyos qinwe',

juntl k'okyel tq'o'ntib' te tyajajil Jakob',

juntl k'okyel tq'o'n ti'j tq'ob': Te Qman Dyos,

ex k'okyel tq'o'n tb'i Israel tmoju' tb'i.

6Chi Qman Dyos, nimaqkawil

ex tzaqpilte Israel, Dyos nimtipumal, kjalu:

Ayine' tnejel ex b'ajsb'il;

mixti' juntl dyos wi'jxi'ye'.

7¿Alkye juntl ikxju' kse'n ayine'?

Tu'n tyolin ex tu'n ttzaj tchik'b'a'n weye'.

¿Alkye oje q'mante atxi'x t-xetnejel ti'ju' tzul,

ex ntma'n ti'ju' kb'ajel?

8Qu'mtzun, ¡kuwqe'xe', lalun che xob'e'!

Ikynmaju'ye' ex xinma'ne' matxi' b'et q'ij,

ex kanli kywitze'.

¿Ma atitzun juntl dyos wi'jxi'ye'?

Mixti'te' juntl kolb'il; mixti'te juntl wojtzqi'ne'.

Yol Ti'ju' witzleb'i'n

9Mixti'xte jun b'inchal witzleb' ati toklen, ex mixti'x kyoklenju' witzleb' nxi'x che laqj ti'j. Moẍqe'kye' nche niman kye ex xnakqe', qu'mtzun k'elel kych'ixaw.

10Alkyete nkub' tb'incha'n jun tilb'ilal toj q'aq' tu'n tniman te naku'j dyos, naq nex tq'ij.

11Kykyaqilkye' nche niman te k'elel kych'ixaw. Naq xjal qekye' nche b'inchan witzleb'. Naqwit che ok kykyaqil toj xjel, k'elel kych'ixaw ex k'okyeltchi kyi'j.

12Qka'yikpe' titi' nb'ajte jun tx'nol k'uxb'il: ntzaj tiq'i'n ttx'inb'il, ajtzun ttz'e'yju' k'uxb'il tu'n toj q'aq', nokten tx'nolte tu'n pojb'il tu'n tb'enti tu'n. In aq'unan tuk'i'l tipumal. Qatzun min xwanju' tx'nol k'uxb'il, nkub'aj tipumal, exqa min xk'wan, nkub'sikti.

13Mujqa qka'yinx titi' ntb'incha'n b'inchal tilb'ilal: nkub' techa'n tu'n trekl, nkub' t-sqitu'n tilb'ilal tu'n tzetz'ib'b'il ex o'nb'il te sqitb'il, in aq'witzuntz b'inchalte tu'n josb'il; ikytzu'n nkub'a' tb'incha'na' jun tilb'ilal xjal, in okxtq'o'ntzuntz toj jun ja te k'u'lb'il.

14Mujqa, ati jun matxitawa'n tze k'ute, nch'iytzuntz tu'n jb'al, yajxi'tzuntel ati tze k'ute tu'n tkub' tik'sa'n. Qatzun tajb'il tzis mujqa k'ol, nche t-xq'uqi'n toj k'ul tzmax ajkylamix.

15Ex najb'en kyu'n xjal te si; nxikyiq'i'n jni' te kyq'eẍ; nxikyiq'i'n jni'tl te t-siyil kywa; atzun jni'tl najb'en kyu'n tu'n tkub' kyb'incha'n jun tilb'ilal te kydyos, ex nche kub' meje k'ulul kywitz.

16Mujqa nik'janju' tze nokxtq'o'n jun xjal toj q'aq', nokxtk'a'sa'n tchi' tib'aj, ajtzun tb'ent nxitwan ex nqe tk'u'j. Ex nq'eẍnen ti'j, intma'n: ¡Tb'anilxi'x ato'qo' ti'j q'aq', xi'nmoq'tiwe'! chij.

17Intzun kub' tb'incha'n jun tilb'ilal tdyos ti'ju' jni'tl tze, nkub' meje k'ulul twitz, ex nkub'san te kjalu: ¡Chin tkloma, qu'n aya ndyose'! chij.

18Mixti' b'a'n kyu'nkye' xjal lu, ex min nkane toj kywitz; moẍ kywitz min nb'ent kyka'yin, xk'ub' kywi', min nkane toj kywitz.

19Min nche kub'ten ximal, mixti'x kynab'l tu'n tkane toj kywitz ex tu'nwt kymante: Nik'janju' tze sokx nq'o'ne' te si, mantzq'ajsaye' wab'j tib'aju' ttxalq'aq'il ex mank'a'saye' chib'j ex matxi' nwane'; ti'jtzunju' jni'tl makub' nb'incha'ne' jun ti'xti' taq'wixi'x lu, ¡naq jun piẍ tzete' nchin k'ulune' twitz!, chechiwt.

20Axxi'x ikte' kse'n qama txiqwan tza'j. Q'ol sb'u'qib' te chajyolilte'. Lay b'ent kyklonte kyib'ju' xjal lu. Layx kane toj kywitz qa naqx chajyolilju' tzyu'n kyu'n.

Kub' tnajsa'n Qman Dyos kyil aj Israel ex e'tkol

21Kyna'ntze' aj Israel, tyajajil Jakob';

qa aye'ye' nmajine';

nmajin qe'ye', ayine' nkub'inchankyeye'.

Lalun tzik'nna'le' kyu'ne' aj Israel.

22Matxi' b'ajkub' nnajsa'nwe' kyile',

kse'n nkub'naju' muj.

Kutanjtztlkyi'je' nk'etze', ojena' che ntzaqpiye', chi Dyos.

23¡Ẍch'ina Kya'j tu'n tzalajb'il tu'nju' matxi' tb'incha Qman Dyos!

¡Che ẍch'ine' tu'n tzalajb'il, t-xe tx'otx'!

¡Che ẍch'ine' tu'n kytzalajb'ile',

e'witz ex nimaq k'ul kyuk'i'lju' nimaq tze,

qu'n matxi' tzaj tyek'u'n Qman Dyos tajwalil

matzaqpet Israel tu'n, aju' tnam tyajajil Jakob'!

24A ntma'n Qman Dyos tzaqpilteya,

ju' b'inchanteya na'mxtoq titz'jiya, kjalu:

Ayinweju'ye' Dyos Manb'aj, b'inchante tkyaqilju' ti'xti',

ayine' nxislik'unte kya'j ex kyej nkuwsa'ne' tx'otx'

ex mix-a'lo' jun onin wi'je'.

25Min nq'o'ne' anb'il

tu'n kyjapun kyolju' sanjelal chalyolqe';

inkub' ntzaksa'ne' kynab'lju' ajnab'lil.

Inb'incha'ne' tu'n lan che kane ajnab'lil tekyib'

ex tu'n tokju' kyojtzqib'l mixti'x tajb'en.

26Atzu'n kyyolju' nmajine' in nb'incha'ne' tu'n kyjapun

ex tu'n telb'a'n kyximju' chq'o'nqe' wu'ne'.

Che najal jumajtlkye' xjal toju' nintnam Jerusalen

ex che jawil b'incha'n jumajtlju' nimaqtnam toj Juda.

Knb'incha'ye' tu'n kyjawe' jumajtl toju' xitb'il.

27Jaku' txinma'ne' tu'n tkub' tzqiju' ninnjab'

ex tu'n kykub'tzqiju' nin a'.

28Inxi' nma'ne' te Siro: Aya nk'ik'lele',

kxe'l tb'incha'nta tkyaqilju' matxi' nma'ne' teya, nchije';

ex nxinma'ne' te Jerusalen: Kjawil b'inchet jumajtlta, nchije';

atzu'n teju' ja te k'u'lb'il: Che b'elix q'et tq'uqb'ila, nchije'.