Is 13 - Mam Ostuncalco Bible

Tpakb'alilju' tzul ti'j B'ab'ilon

1Tpakb'alil ti'j B'ab'ilon, tzaj tq'o'n Qman Dyos te Isayiy tk'wal Amos kjalu:

2¡Kyq'onktze' jun t-sut tnam techlal q'oj twi' witz chik'li!

¡Kyq'onxe' chaq'b'il kye xjal te q'oj!

¡Kyek'unx kyq'ob'e' kye

tu'n kyul lq'e ttzi kyja nimaq kyoklen!

3Matxi' che tzaj ntxko'ne' kuwqe',

manchaq'e' kyeju' q'o'nkyib' q'ojil,

aye' nche tzalaj ajnkanb'ane',

tu'n kyb'inchanteju' tz'e'ysb'il witzb'aj wu'ne', chij.

4Njaw sich' kywi' witz,

naku'j nim xjal nche ẍch'in.

Q'ojq'oj toj kywi' nimaqtnam,

e'tnam matxi' b'aj kyb'u'yi'n kyib'.

Nche tnk'u'n Qman Dyos nimtipumal

ju' xjal b'antnitlkyten tu'n kyq'ojin.

5Che b'ju'l xjal te jun najchaq tnam

tzmax ti'jmix kya'j.

A Qman Dyos tzul kyuk'i'l taq'unb'il tu'n ttx'u'jil.

tzul xitulte tkyaqilju' tx'otx'.

6Che uxinqe'ye', qu'n ch'inxtl tul tq'ijlalil tu'n tul Qman Dyos,

tzul nxi'x tinun tuk'i'l nimtipumal.

7Majxtzun kb'el nuqtz'aj kyq'ob'ju' xjal kykyaqil

kykyaqilx kb'ajel kyipumal

8ktzajel tchi kyi'j.

k'okyel b'is ex jun nin k'ixk'oj kyi'j

kyxq'ipla'kyib' kse'n qya toj tk'ixk'ojal wnaq.

Che b'ajel sak'puj naqkyka'yla' toj kywitz

ex majx che b'elkyeqax tu'n kych'ixaw.

9Tzulte Qman Dyos,

tq'ijlalil ttx'u'jil, xob'ajilx inxi'x jayun,

majx kb'el chq'ajlajixu' tx'otx' tu'n

ex che b'ajel kykyaqil aj il ate' toj.

10Lay che k'antlju' che'w ex wotzche'w twitz kya'j;

kb'el yupju' q'ij akxtoq tjawu'l,

ex lay qoptz'aju' xjaw.

11Intma'n Qman Dyos kjalu:

Kb'el ntz'e'ysa'n kywitzju'ye' xjal tu'n tpaj kyil,

exqe' b'inchal myab'a'n tu'n tpaj kyil.

Kteneb'el ttxa'n nimjtib'il wu'ne' kyeju' nimal kyib',

che b'el nme'ssa'ne' pi'sqe' ex q'o'nkyib' toj il.

12Naqjte'xtl ichan che kjel anq'in wu'ne'

naqch'i'nxi'xtl kyetwitz q'anpwaq tz'umin toj tx'otx' Opir.

13Kyukcheltzun kya'jtz

ex k'elel lq'eju' tx'otx' toju' jata'

tu'n ntx'u'jile' ktzajel toju' tq'ijlalil lu,

tu'n ntx'u'jile' b'a'nxi'x.

14Ikyche okyela' xjal kse'n msat xla'ja'n kyu'n xjal,

mujqa kse'n txqan rit nche'x sputj,

ex mix-a'lo' kb'uyilkye.

Teyile junjun k'anjelti'j tojku' ttx'otx',

k'anjel oq toj ttanam.

15Kykyaqilju' mache elyal che b'elxyu'n tu'n kchil,

kykyaqilju' mache tzyet che kb'el b'yo'n.

16Kywitzku' che b'ela' pch'u'n tal kyk'wal twitz tx'otx';

kb'je'lex elq'a'n kyoj kyja

ex che b'ajel yaju'n kyxu'jil.

17Che okyel nchq'o'ne' tnam aj Medo kyi'j,

aye' xjal min nb'ajxkyk'u'j ti'j saqpwaq

ex min nche ximan ti'j q'anpwaq.

18Che kb'el kyb'yo'n ku'xun tu'n kysmaj.

lay tzaj q'aq'ankyk'u'j kyi'ju' akxtoq kyitz'ji

ex lay tzajlaqkyk'u'j kyi'ju' k'wal.

19Atzu'n B'ab'ilon, tb'anil xliky kye nimaqtnam,

u'wj ex kyninb'il kaldey,

kjelten kse'n Sodom ex Komor,

tej kykub' nxitu'ne'.

20Layx kub'naja'n jumajtl,

mix-a'lo'tl kb'el najan toj.

Lay che kub'tentlju' aj Arab'ya atzu',

ex lay che ponkyiq'i'ntl k'ik'lel kyrit toj.

21Twiẍ k'ul qe'tl che najal toj,

knojel kyoju' ja kyu'n xitx',

che najal toj k'ul chmek' toj,

ex che ẍchal chib' toj.

22Che ẍch'il xo'j kyoju' ja te kolb'il,

ex che tenb'el xo'j kyoju' tb'anil tja nimaqkawb'il.

Xi' tul q'ij te B'ab'ilon;

naq jte' q'ijtl tu'n tten.