Jer 29 - Mam Ostuncalco Bible

Tuj Jeremiy kyeju' eb'je'xq'i'n

1-2Kyb'ajlenxi'tzun q'i'n nimaqkawil Jekoniy tuk'i'lju' ttxu, exqe' majin toj tja nimaqkawil, e'nejenel toj Juda ex Jerusalen, exqe' b'a'n che b'inchan chukchaq ti'xti' e' tx'nol k'uxb'il, xit-sma'n Jeremiy t-sanjelal Dyos jun tuj, tu'n tpon tzmax B'ab'ilon, kyeju' tijwnaq itz'qe'xtoq kyxolju' eb'ajxq'i'n, ex kyeju' pale, sanjelal exqe' xjal eb'ajx tiq'i'n Nab'ukodonosor tzmajx B'ab'ilon.

3Xisma'n u'j lu kyi'j Elasa tk'wal Sapan, tuk'i'l Kemariy tk'wal Ilkyiy, eb'ajx tchq'o'n Sedekyiy nimaqkawil toj Juda, yek'ulkyib' B'ab'ilon twitz nimaqkawil Nab'ukodonosor. Intma'n u'j kjalu:

4Lu ntma'n Qman Dyos nimtipumal kye kykyaqilju' eb'je'tz tiq'i'n toj Jerusalen tu'n kypon B'ab'ilon, ikjalu:

5Kyb'incha'nktz kyjaye' ex che tenku'ye'; kyawank tqan kylob'eje' ex che wanqe'ye' ti'j.

6Che mjeye', che tenx kyk'wale' e' kymyale', ikyqe'xju kyk'wale' che mje ex che tenx kyk'wal. Che chmet-xe' chixi' ex lalun kub'aj kyajlale'.

7Che aq'unanqe'ye' tuk'i'lju' nintnam jaẍe'xa' nq'o'na'ye', ex che kub'sanqe'ye' nwitze' ti'j, qu'n b'a'n che tenb'ela'ye' qa b'a'n ta'ju' nintnam lu.

8Inxi' woqxena'ne' kyeye', ayine' Dyos Manb'aj nim wipumale', ikjalu: lan kyaq' sb'u'kyib'e' kyeju' sanjelal exqe' npon kynab'l najlqe' kyxole', lalun che'x kyb'i'ne' kywitzik'.

9Axxi'x, chajyolilte' tqanil nb'ajx kyq'o'n toj nb'iye' kyeye', chi Dyos.

10Intma'n Qman Dyos kjalu: Ajtzun tjapun oxnaq lajoj (70) ab'q'i kyu'ne' toj B'ab'ilon, che tzajel nka'yi'ntle' ex kjapumelu' nyole' b'a'n kyeye' tu'n tanjtzkyi'je' toju' najb'il lu.

11Kanliwe' nwitz se'nju' nxime' kyeye', jun xim tu'n kytene' b'a'n ex mya toq'wix, tu'ntzun kyxi'ye' yajxi'tl toj q'uqb'an k'u'jal. Ayine' Dyos Manb'aj nchin yolin.

12Chin tzajel kyna'ntzuntze', che ultzuntze' k'ulul weye' ex che xelnb'i'ne'.

13Kchin kyjya'ye' ex chin knetele' kyu'ne', qu'n chin kyjya'ye' tu'n tkyaqil kyk'u'je'.

14Kxe'l nq'o'ne' anb'il tu'n njyete' kyu'ne', ex knb'incha'ye' tu'n kyetze' tjaq' yajb'il. Che eletz wiq'i'ne' kyoj kykyaqil najb'il jamache'xa' nsputi'ne', che nb'uyiye' ex che anjetz wiq'i'ntle' toju' najb'il lu jaẍe exa' wiq'i'ne'. Ayine' Dyos Manb'aj nchin yolin.

15Intzun kyma'ne': Mache tzaj tchq'o'n Qman Dyos t-sanjelal qxole' toj B'ab'ilon, chechije'.

16(Ntma'nte Qman Dyos ti'ju' nimaqkawil tokx toj tq'uqlil Dab'i ex kyi'ju' xjal najlqe' toju' nintnam lu, aye' kywitze'le' min eb'je'xq'i'n kyuk'i'le', kjalu:

17A nyol ju'ye' lu, ayine' Dyos Manb'aj nimwipumale': Che tzajel nq'o'ne' q'oj, we'yaj ex tx'u'j yab'il kyi'je'. Knb'incha'ye' tu'n kykyajtene' kse'nqe' lob'j iw q'anaqtl lu, taq'wixqexi'x layx b'ent kyxilo'yet.

18Kb'el nljo'n toj kyq'ije' tu'n q'oj, wepyaj ex tx'u'j yab'il. Knb'incha'ye' tu'ntzun majx taq'wix che elela'ye' toj kywitz kkyaqil xjal kyoj kykyaqil nimaqtnam ajkyok ka'yi'ne' kyu'n, ex che okyel nq'o'ne' te yek'b'il qanb'en myab'a'n ex ch'xawil, taq'wixi'x che elela'ye' kye ex che b'ajel xob' kyeye' kyoj kykyaqil nimaqtnam ja mache b'ajx nsputi'ne'.

19Qu'n min xxikyb'i'ne' b'ajx woqxena'ne' kyeye' kyu'nelju' nmajine', aye' nsanjelale', kukxtoq kytzaj nchq'o'nju'ye' ti'j juntl ex ti'j juntl ex ti'j juntl, mixti'xtoq nche kub'kyb'i'ne'. Ayine' Dyos Manb'aj nchin yolin.

20Kyb'inxtzunju'ye' nyole' ja'lo, kykyaqile' eb'je'x wiq'i'ne' toj Jerusalen ex eb'ajx wiq'i'ne' B'ab'ilon, Chi Dyos.)

21Lu ntma'n Qman Dyos nimtipumal, ti'j Akab' tk'wal Kolayiy, ex ti'j Sedekyiy tk'wal Maaseyiy, ju' ate'qe'k q'mal chajyolil kyeye' toj tb'i Qman Dyos: Knb'incha'ye' tu'n kykub'tz'aq toj tq'ob' nimaqkawil Nab'ukodonosor aj B'ab'ilon, ex tu'n kykub' tb'yo'n kywitzku'ye'.

22Qatzun matzaj kytxko'n aj Juda b'ajxniqe q'i'n B'ab'ilon taq'wix tib'aj jun, kkyma': Tzajxwit tq'o'n Qman Dyos tib'aja kse'n tb'incha kyi'j Sedekyiy ex Akab', aye' eb'aj tk'a'sa'n nimaqkawil aj B'ab'ilon toj q'aq', chechiku'.

23A kb'ajelju' kyi'j tu'n tpaju' myab'a'n b'aj kyb'incha'n toj Israel: e'ajpajin kyuk'i'l kyxu'jil kywnaqil ex b'ajx kyma'n chajyolil toj nb'iye' mya chq'o'nqe' wu'ne' tu'n kymante. Kanliwe' nwitz. Ayine' Dyos Manb'aj nchin yolin, chi Qman Dyos, chiju' u'j.

Tpakb'al te Semayiy

24Tchaq' Qman Dyos te Jeremiy tu'n txitma'n te Semayiy aj Neelam:

25Matma Qman Dyos nimtipumal ikjalu: Xit-sma'na jun u'j tojx tb'iya kye kykyaqil xjal najlqe' Jerusalen, ex te pale Soponiy tk'wal Maaseyiy, ex kye kykyaqil txqantl pale. Xittz'ib'a'na te Soponiy ikjalu:

26Matxi' tz'ok q'o'na te pale t-xel Joyada tu'n Qman Dyos, tu'n toka nim toklena ka'yilte tja Dyos. Qama tzul jun okni toj twi' ex matz'okten yolil naku'j t-sanjelal Dyos, k'okyex t-xmo'na toju' tze ex kjelt-xmo'na kyu'n xpatx'k'uxb'il.

27¿Tiqu'ntzun b'ajx txa' ttzak'u'na Jeremiy aj Anatot, ju' matxi' tz'okten yolil kywitze' naku'j t-sanjelal Dyos?

28Ulpena' t-sma'n jun u'j qeye' toj B'ab'ilon, intma'n kjalu: Che tenb'elkye' nimtoj ti'jxi' qtanam, kyb'incha'nktz kyjaye' ex che najanqe'ye' na'tz, kyawank kylob'aje' ex che nik'b'enqe'ye' ti'j, chij.

29Xit-ẍch'i'n pale Soponiy u'j te Jeremiy.

30Tzajtzun yolin Qman Dyos te t-sanjelal kjalu:

31Chq'onx tq'omliya kye kykyaqilju' b'je'xniqe' qa ayine' Dyos Manb'aj in nma'ne' kjalu: Matxina' yolin Semayiy aj Neelam toj nb'iye' kyeye' extzun mya chq'o'n wu'ne', ex matz'okten q'ol jun q'uqb'ab'l kyk'u'je' mya ax,

32kb'el ntz'e'ysa'ne' twitz Semayiy kyuk'i'lju' tyajajil, ayine' Dyos Manb'aj. Lay che ten tk'wal toju' ntaname', ex lay ten toju' tzalajb'il kxe'l nq'o'ne' teju' ntaname', qu'n matz'ok ajq'oj wi'je' kyu'nju' tyol. Ayine' Dyos Manb'aj nchin yolin, Chi Dyos.