Sal 43 - Mam Ostuncalco Bible

1Nman Dyos, b'inchama tnik'alilti'j weye';

¡Chin tkloma kyeju' nche niman kye txqantl dyos!

¡Chin tkloma toj ttziju' chalyol ex teju' b'inchal myab'a'n,

2qu'n teya nchin k'uluna'ye' ex aya klol weye'!

¿Titiqu'n ẍin ela' tik'u'na?

¿Titiqu'n ati tu'n ntene' toj b'is

ex toj yajb'il kyu'n wajq'oje?

3Q'ontzju'ya t-spik'umala exju' tyola ax,

tu'ntzun woklpeye' kyi'j

tu'n npone' twi' witz xjan,

ja najla'ya.

4Kchin pomiltzuntze' twitzju' q'olb'eb'l teya Nman Dyos,

atzuntzu' chin b'itzala'ye' teya tuk'i'l tq'ojq'ojel chnab' arpa,

a na'ta Nman Dyos, intzalajsanweye'

5¿Titiqu'n kchin b'ela' numje'?

¿Titiqu'n kb'ajxe'la' nk'u'je'?

Matxi'na' tz'okqewe' nk'u'j ti'ja Nman Dyos,

chin b'itzale' teya kukxju'

¡Tena'ta nchin k'uluna'ye' ex aya klol weye'! Chiju' b'itzal.