1Kjawil nnima'ne' Qman Dyos tkyaqil kmuj;
kchin b'itzale' kukxju' te.
2Inxi'x chin tzalajwe' ti'j Qman Dyos;
¡Kyb'ime' ex che tzalajxe', me's qe'ye'!
3Qo'qe' b'itzan junx,
ti'ju' nim toklen tb'i Qman Dyos.
4Inkub'sane' te Qman Dyos, ex intzaj ttzaq'we'ne',
ex machin tkole' te tkyaqil xob'ajil
5Okxi'x che tzalajelju'
tokkywitz ti'j Qman Dyos
ex layx tz'el kych'ixaw.
6Jaw ẍch'inju' prow lu, ex tzaj tb'i'n Qman Dyos
ex tkol toj tkyaqilju' yajb'ilte.
7In xq'uqinju' tanjl Qman Dyos ex inkolon
kyi'ju' nche niman te.
8Tz'elx kynik'e', qa b'a'n te Qman Dyos.
¡Tzalajb'il ta'te' xjal q'uqlok tk'u'j ti'j!
9Kynimanktze' Qman Dyos, xjansa'n kyib'e',
qu'n ntzaj tq'o'n tkyaqilju' ati tajb'en kyeju' nche niman te.
10Inche kub'prowixju' q'inun, ex nche ok toj we'yaj,
aye'tzu'n nche jyon ti'j Dyos, ktenb'il tkyaqilju' b'a'n kye.
11Che lq'etze' nk'wal, ex chin kyb'inku'ye':
che kxe'l nxnaq'tza'ne' tu'n kynimane' te Qman Dyos.
12¿Ma tajb'ila tu'n tanq'ina nimtoj?
¿Ma tajb'ila tu'n ttzalaja toju' chwinqlal?
13Jk'um taq'a kyi'j xlab'yol,
ex lalun chanyola.
14Pa'mil tib'a ti'ju' myab'a'n, ex b'inchamju'ya b'a'n;
jyomju'ya nak'b'il ex ljonxa.
15Ate Qman Dyos xq'uqilkyeju' tnik'alkyi'j
ex ntzaj tb'i'nju' kykub'sb'il.
16Inq'ojin Qman Dyos kyi'ju' b'inchal myab'a'n,
tu'n kynaj twitz tx'otx' ex tu'n miche tzaja' na'ntl.
17Intzaj tb'i'n te Qman Dyos tkub'sb'ilju' xjal tnik'alti'j,
ex intklo'n toj tkyaqilju' yajb'ilte.
18Nqaku' ta'te Qman Dyos klolkyeju' nche' b'isun
ex mixjaloja tu'n toka'qe kyk'u'j.
19Inik'ju' xjal tnik'alti'j toj chukchaq joyb'ilti'j,
atzunte Qman Dyos nklonte toj tkyaqil ja'lu.
20Tkyaqilju' tb'aqil xq'uqi'n tu'n Dyos;
ex mix-a'lo' jun kb'el toqinte.
21Aye'tzu'n aj il tu'nxju' kyil nche kyima';
kb'el tz'e'ysa'n kywitzju' ntx'a'lti'j kyk'u'j kyi'ju' tnik'alkyi'j.
22Atzunte Qman Dyos inklonkyeju' tmajen;
¡lay kub' ttz'e'ysa'n kywitzju' q'uqlok kyk'u'j ti'j!, chiju' b'itzal.
Who We AreWhat We EelieveWhat We Do
2025 by iamachristian.org,Inc All rights reserved.
