1Jun q'ij xitma'n Jonatan tk'wal Sawul teju' onilte:
Kutzaja qo' ik'x jlajxi' a' q'ojil kyi'ju' xjal pilistey te q'oj toju' kyxmuj, chij.
Ex mixti' xitma'n te tman,
2qu'n matxitoq kub' kyq'o'n Sawul kyxmuj ttxa'nwitz, ex t-xe junwi' kranad toj er, kyuk'i'l Junk'al lajnaq (600) xjal te q'oj lepchqe'k ti'j.
3Atoq Ayiy iq'ilteju' t-ẍa'y pale, ju' tk'wal Aytub', tk'wal ttzik Ikab'ot, ju' tk'wal Pinees ex tchman Elyi pale te Qman Dyos toj Silo.
Mixtoqti' b'i'n kyu'n xjal qa matxitoq txi' Jonatan.
4Atzunte Jonatan intoq tjyo'n tu'me'l tu'n tpon tzmax jata' kyxmuj pilistey te q'oj. Atitoq tu'n kyex kyxol kab'e' nimaq pik, B'oses ex Sene kyb'i,
5jun toj tb'a'nq'ob'kya'j tu'me'l tnam Mikmas, atzu'n juntl toj tnayajkya'j tu'me'l tnam Kib'ea.
6Xi'tzun tma'n Jonatan teju' onilte:
—Kutzaja, qo' ik'x jlajxi', tzmax jata'qe' ma' xjal min nche niman te Dyos. Qaj k'onil Qman Dyos qi'j, qu'n mya' ch'uẍte' te tu'n qkanb'an kyuk'i'l ch'i'n mujqa nim xjal, chij.
7Xi'tzun ttzaq'we'nju' onilte:
—B'inchama tkyaqilju' nkub' t-xima'na, qu'n luqinwe' onilteya toj tkyaqilju' ktb'incha'ya, chij te.
8Xitzun tma'n Jonatan te:
—Qo'ik'ex jlajxi' ja ta'qe' ichan lu, ex kxel qyek'u'nqib' kye.
9Qama tzaj kyma'n tu'n qayon kye tu'n kyku'tz jata'qo', qo' kjelten axtzu' ex lay qo jax ja ta'qe'.
10Qatzun makyma tu'n qjax kyk'etz, qo jawix, qu'n jun techlalte' lu qa qo kanb'al tu'n Qman Dyos, chij te.
11Qu'mtzun, xikyek'u'nkyib' kykab'il kywitz pilistey q'ojil. Tetzunj kyka'yinte pilistey, kyma: Kyka'yinxpe'ye', ljo'n kyetzju' aj Eb'rey kyoju' jyom jae'wa'nkxa' kyib', chechij.
12E'tzaj ẍch'intzuntz kye Jonatan tuk'i'lju' onilte:
—¡Kukyjatze' ja to'qo'ye' qu'n kxe'l qla'ji'n jun ti'xtiye' kyeye'! chechij.
Xi'tzun tma'n Jonatan teju' onilte:
—Lpetza wi'je', qu'n che tzajel q'o'nkye' toj qq'ob' tu'n Qman Dyos, chij.
13Jaxtzun txakin Jonatan, lepchixju' onilte ti'j. Aye'tzu'n nche tzyet tu'n nche ku'tz ttoli'n, atzuntlju' onilte nkub' b'ajsankye.
14Qapelo junaq (20) ichan eb'aj toju' tnejel q'oj lu kyu'n Jonatan naq toj jte'x ky'jaj kojb'il.
15Majx oktchi kyi'j kykyaqilju' ate'toq toju' kyxmuj exqe' ate'toq ti'jxi'. Tzaj xob'il b'a'nxi'x kyi'ju' xjal ntoq che xq'uqin ex kyi'ju' b'je'xniqe' q'ojil toj k'ul. Tzaj kyajnajnab' ex tzaj jun nin xob'il kyi'j.
16Aye'tzu'n t-xjal Sawul intoq che xq'uqin Kib'ea kyxol tyajajil B'enjamin, kyil tej kyb'jaw tilju' pilistey.
17Xi'tzun tma'n Sawul kyeju' t-xjal ate'toq tuk'i'l:
—Kyka'yinxe' qa ato'yile qkyaqil, chij.
Atzunj telkynik' mix-a'lo'toq Jonatan tuk'i'lju' onilte.
18Xi'toqtzu'nta' Tkax Qman Dyos kyxol aj Israel toju' q'ij lu, xitma'n Sawul te Ayiy:
—Q'intzju'ya Tkax Qman Dyos tza'lu, chij.
19Tetzunj intoq yolin Sawul tuk'i'lju' pale, ljo'ntoq kyb'jaw tiljxi'xtlju' pilistey toju' kyxmuj. Xitma'ntzun Sawultz te pale:
—Lalun tzaj tiq'i'ntla, chij.
20Textzu'n kmuj lu b'aj kyb'u'yi'n kyib' Sawul kyuk'i'lju' t-xjal te q'oj, exi'tzuntz q'ojil. Aye'tzu'n pilistey kyib'xkyib' b'aj kyb'yo'n kyib', qu'n nimxi'xju' xob'il matxi'toq tz'okten kyi'j.
21Exqepe' aj Eb'rey te q'oj matxi'toq b'et q'ij ate'toq kyuk'i'l pilistey, xi'kyaq'a'tlkyib' kyuk'i'l aj Israel kyxjal Sawul ex Jonatan toju' kmuj lu.
22Tetzun kyb'inte jte'tl aj Israel b'ajxniqe' klolkyib' kywi'witz te Eprayin, qa intoq che oq pilistey, eb'ajxlpe q'ojil kyi'j.
23Tzmax toj B'et-ab'en pon kanuna'ju' q'oj, ex e'tkol Qman Dyos aj Israel toju' maj lu.
Tma Sawul jun tyol tu'n tjapun tu'n24Matxi'toqtzun che kub'numju' aj Israel toju' q'ij lu, qu'n mix-a'lo' jun matxi'toq txitwan jun piẍ wab'j, qu'n ojetoq che kub' tq'o'n Sawul tu'n tjapun jun yol kyu'n kjalu: Tzajxwit taq'wixil tib'aju' xjal qama txitwan ch'i'n twa na'mxtoq tex q'ij, qa na'mxtoq tkub'kyi'ju' wajq'oje, chij kye.
25O'kx kyponju' xjal te q'oj toj jun k'ul janqojla' ta'lkab' twitz tx'otx'.
26Tej kyokxju' xjal toju' k'ul, intoq qojliju' ta'lkab' twitz tx'otx'; ex mix-a'lo'te xinik'b'ente tu'n tpaj kyxob'el ti'ju' yol xikytziya'n.
27Atzunte Jonatan, mixna'ti' tb'iju' yol tmaju' tman tu'n kytziyanteju' xjal te q'oj, jawtiq'i'n ch'i'n ta'lkab' toj jun aq tu'nju' tch'ut ex xitlo'n, majxtzun oktl tipumal.
28Ex xitma'n jun xjal te q'oj te:
—Matxi tma'n tmana kyeju' xjal te q'oj tu'n kytziyante jun kyol, qa mixti' jun tu'n txi' twan jun ti'xti', qu'n qatzun min ktzajel taq'wix tib'aj. Qu'npe'na'tzun matxi' che kub' b'aju' xjal tu'n we'yaj, chij.
29Atzunte Jonatan xittzaq'we'n:
—Taq'wix xtb'incha nmane' teju' nintnam. Ka'nxa matxi' tz'ok wipumale' tu'nju' ch'i'n myel xb'aj wu'ne'.
30Mina'yate' naqwit mache wanju' xjal ti'ju' selkyiq'i'n kyeju' ajq'oj. ¡Ma'xi'xwitlo che b'o'ljkye' pilistey qu'n!, chi Jonatan te.
31Kub'kyi'j pilistey toju' q'ij lu kyu'n aj Israel, tzaj qe kyq'ojin Mikmas ex pon tzmax Ayalon. Matxi'xi'xtoqtzun che kub'numju' aj Israel te q'oj,
32eb'ajx tiljtzuntz ti'ju' matxi'toq tz'elkyiq'i'n kye ajq'oj, tzaj kyiq'i'n rit, ttxu wakx ex qpoj tman wakx, ex eb'aj kub' kyb'yo'n, xikych'yo'ntzuntz tuk'i'lxi' tchk'el.
33Ate'tzun junjun eb'ajx q'malte te Sawul:
—Luqe' xjal nche b'inchan il twitz Qman Dyos, qu'n nche ch'yon chib'j tuk'i'lxi' tchk'el, chechij te.
Atzunte Sawul tma:
—¡Majx pi'sqe'kye'! Kytolintze' jun nin ab'j tzalu.
34Che' yoline' kyuk'i'lju' xjal ex kymanxe' kye tu'n ttzaj kyiq'i'n teyile junjun, tman twakyix mujqa trit, tu'n kykub' kyb'yo'ne' ex tu'n telu' kychk'el ex tu'n kywane' ti'j, tu'ntzun lalun che b'inchan ile' twitz Qman Dyos tu'nwt txi' kych'yo'ne' tuk'i'lxi' tchk'el, chij.
Textzu'n qonik'an lu, teyile junjun xitiq'i'n jun tman wakx, ex kub' kyb'yo'n atzu'.
35Jawtzun tb'incha'n Sawul jun tnejel q'olb'eb'l te Qman Dyos.
36Tmatzuntz:
—Qo'qe' q'ojil kyi'j pilistey toju' qonik'an ja'lo, ex qiq'imitz tkyaqilju' ati kye tzmax ajqsqix, ex majx che qnajsanku' kykyaqil, chij.
Kykyaqil xikytzaq'we'n:
—B'inchama tkyaqilju' b'a'n toj twitza, chechij te.
Atzunju' pale tma:
—Nej qqanix te Qman Dyos qa b'a'n, chij.
37Xi'tzun tqani'n Sawul te Qman Dyos:
—¿Ma b'a'n tu'n qxi'ye' q'ojil kyi'ju' pilistey? ¿Ma che tzajel tq'o'na toj qq'ob'e'? chij.
Atzunte Qman Dyos min tzaj ttzaq'we'n toju' q'ij lu.
38Qu'mtzun tma Sawul:
—Kykyaqile' nejenelqe'ye' kye xjal te q'oj, che lq'etze' tzalu, ex kyka'yinxe' alkyeju' matxi' b'inchan il ja'lo.
39¡Axxi'x kntziya'ye' twitz Qman Dyos klol kye aj Israel, b'a'ntzun qa aju' nk'wale' Jonatan, kb'el b'yet!, chij.
Mix-a'lo' jun kyxolju' xjal te q'oj xitzaq'wente;
40qu'mtzun xitma'n Sawul kye kykyaqil aj Israel:
—Che tenku'ye' tza'lu, atzunwe' tuk'i'lju' nk'wale' Jonatan, qob'eltene' toj jun plajtl, chij.
—B'inchamju'ya b'a'n toj twitza, chechiju' t-xjal xikytzaq'we'n.
41Tmatzun Sawul:
—Nman Dyos, ¿tiqu'n na'mx ntzaj ttzaq'we'na, ayine' tmajina? Qa ayine' ati npaje' mujqa aju' nk'wale' Jonatan, a Urim kb'eltz'aq; qatzun aye' aj Israel ati kypaj, a Tunin kb'eltz'aq, chij.
Atzuntzu' kub'a' tz'aq kyi'j Sawul tuk'i'l Jonatan, kyajtzun tnamtz mixti' til.
42Tmatzuntl Sawul:
—Kyka'yinxe' alqi'j makub' tz'aqa' qxole' tuk'i'lju' nk'wale' Jonatan, chij.
Atzu'ntzu' pon tz'aqa' ti'j Jonatan,
43xi'tzun tma'n Sawul te Jonatan:
—Q'mantza weye' titi' xtb'inchaya, chij.
Atzunte Jonatan jawtz tma'nju' til:
Jaw wi'ne' ch'i'n ta'lkab' tu'n twi' nch'ute' ex xinlo'ne'. Luqinwe' lu, chin kyb'yonku'ye', chij.
44Atzunte Sawul jawtma'n kuw:
—¡Kub'xwit ttz'e'ysa'n Qman Dyos nwitze' kuwxi'x, qa min xkyima Jonatan! chij.
45Atzu'n tnam xikytzaq'we'n te Sawul:
—¡Tiqu'ntzun kkyimel Jonatan, ma myatzun tu'n ẍe kanb'ana' aj Israel! ¡Mixti' tu'n tkyimte'! ¡Lu Qman Dyos nka'yin, mixti' tu'n tkub' tz'aq jun t-xya'mal twi' twitz tx'otx'! Qu'n aju' xtb'incha ja'lo, mab'ent tu'n tu'ntonb'il Qman Dyos, chechij.
Iktzu'n kleta' Jonatan tu'nju' tnam.
46Atzunte Sawul kyej ttzaqpi'n tu'n tq'ojin kyi'ju' pilistey, e'anjtzun pilistey toj kytx'otx'.
47Toklenxi'tzun Sawul te nimaqkawil kyib'aj aj Israel, q'ojin toj tkyaqil plaj kyi'ju' tajq'oj, aye' aj Moab', aj Amon, aj Edom, exju' nimaqkawil toj Sob'a exqe' pilistey. Jaxjaku' nxa', intoq kanb'an.
48B'aj tb'u'yi'n jun tnej xjal te q'oj, ex kub'kyi'j aj Amalek tu'n. Iktzu'n e'tkola' aj Israel kyeju' eleq'.
49Aye' tk'wal Sawul ja'lu: Jonatan, Isb'i ex Malkyiswa. Aye'tzu'n kab'e' tmyal aye': Merab' ju' tzikb'aj, ex Mikal i'tz'inb'aj.
50Aynoam toq tb'iju' t-xu'jil Sawul, tmyal Aymaas. Atzu'n nejenel kye t-xjal te q'oj Ab'ner tb'i, tk'wal Ner, ttzik mo titz'in tman Sawul.
51A Kyis tman Sawul, atzu'n Ner tman Ab'ner, kykab'ilx tk'wal Ab'yel qe'.
52Majxtoq kuwju' q'oj kyi'j pilistey toju' tq'ijlalil Sawul: Qu'mtzun o'qekxju' ichan kuwqe' ex min nche xob' nche t-xnaq'tza'n Sawul te t-xjal te q'oj.
Who We AreWhat We EelieveWhat We Do
2025 by iamachristian.org,Inc All rights reserved.
