1¡Nimxi'xte' ttx'u'jil Qman Dyos,
majx xkub' qyupe' tb'anil Syon tu'n!
Matz'el t-xitu'n tilb'il Israel tb'anilxi'x,
saj t-xon twitz kya'j tzmax twitz tx'otx';
miẍpeti' sajtna'ntlju' tkub'el tqan
tej saj ttx'u'jil.
2Kykyaqilxju' tja Jakob'
ẍeb'ajkub' t-xitu'n Qman Dyos;
toj jun kmujx saj ttx'u'jil xkub' t-xitu'n
tipumal Juda tb'anilxi'x tmyal;
Mache kutmessa'n ninkawb'il exqe' nimaq kyoklen kawil
majx ẍekub' ch'ixwi tu'n.
3Tej ttzaj tx'u'jil, kub' tnajsa'n
tkyaqil kyipumal aj Israel.
Min taq'tl tq'ob' te ipumalj qeye'
tej qokwe'ye' kywitz qajq'oje;
¡tzaj tq'o'n jun q'aq' tib'aj Jakob'
nkub' ttz'e'ysa'n tkyaqil matzel yal twitz!
4Naku'j jun ajq'oju' Qman Dyos,
xitqinu'n t-smaj, xitb'incha'n tten tq'ob';
ikxi'x kse'n jun ajq'oj,
b'ajkub' t-xitu'nju' tb'anilxi'xtoq;
tzaj ttzaqpi'n ttx'u'jil, naku'j q'aq',
tib'aju' t-xmuj Syonju' tmyal.
5Tb'incha Qman Dyos kse'n jun ajq'oj;
majx ekub't-xitu'n aj Israel;
e'kub' t-xitu'n kykyaqilju' tja nimaqkawb'il,
e'kub' t-xitu'n kyja xq'uqil nimaq kywe',
makyej tq'o'n Juda tb'anil tmyal
toj b'is ex oq'el.
6B'iyon toju' tja xjan kse'n jun eleq';
kub' t-xitu'n ja noka' b'uyjtib'il.
Tb'incha Qman Dyos tu'n tik'kyna'l ninq'ij
exqe' q'ij te ojlab'l toj Syon.
E'elt-suchu'n nimaqkawil ex pale
tu'n tkyaqil ttx'u'jil.
7Matz'el tik'o'n Qman Dyos qolb'eb'l te,
matz'el tik'o'nju' tja xjan;
matxi tq'o'n nimaqtapi kolb'ilte ti'ju' nintnam
toj kyq'ob'ju' ajq'oj.
¡Inxi'x jaw tq'ojq'ojel wi'yj toj tja Dyos,
kuxi'xtej jun ninq'ij!
8Kub't-xitu'n Qman Dyos
nintapi ti'jile Syon tb'anilxi'x tmyal.
B'ajkub' t-xima'n tu'n tkub' t-xitu'n
ex min sojlan ti'j, ma japun tu'n.
B'is ẍekyaja' tapi ex nimaqtapi tu'n,
matxi' che b'aj kub'niq'j.
9Mixti'tl tjpel nintnam ex mixti'tl jupb'ilte:
¡toqniqe'tl ex pak'a'jqe' twitz tx'otx'!
Ati tnimaqkawil exqe' tkawil kyxol witzleb'il;
mixti'tlte tkawb'il Dyos kye;
¡mixpeti'tlte yek'b'il mo witzik' tu'n Dyos
kyeju' kysanjelal!
10Nche kub' qe tijwnaq twitz tx'otx'
mixti'x nche yukchi toju' Syon tb'anil txin,
njax kyq'o'n quq toj kywi'
ex nok kyq'o'n kyi'j jochon.
Tzipli qe'ju' q'poj aj Jerusalen
tzmaxtzu' twitz tx'otx'.
11Mache kub'aj nwitze' tu'n oq'el
naku'xi'xtej k'elitz laqj wanmiye';
matxi' chin kub' numje'
tu'n tpaj xitjnitl ninkytanam nxjalile',
tej ẍe'xnka'yi'ne' neẍ inx che ch'u'n
expe' nche kyim tu'n we'yaj kyoj b'e.
12Intoq xikyma'n k'wal te kytxu kjalu:
¡Mixti'tl qwaye' ex qk'wa'ye'! chechij,
Nche kub' tz'aqtzuntz naku'j nche kub' b'yo'n
kyoj b'e toju' nintnam,
toj kyq'ob'u kytxu
ne'la' kyxew.
13¿Alxwit quk'i'l jaku' tz'oka' nq'o'ne'
qa ikyju'ya Jerusalen tb'anilxi'xa?
¿Titi' jun techlal jaku' kub' nq'o'ne' q'uqb'ab'l tk'u'ja,
aku'xi'xa tb'anil nintnam Syon?
Nimxi'xte' xitb'il ti'ja naku'j ninnjab';
¿Alxi'xkye kq'analteya?
14Naqx sb'ub'lqekye' yek'b'il mo witzik'
matxi' b'aj kyma'n t-sanjelala teya.
Min xkub' kychik'b'a'n tila
tu'n tch'exb'etju' tchwinqlala;
kyma witzik' mo yek'b'il te sb'ub'l teya,
ex mab'ajx toksla'na.
15Ajt-xika'yi'na kyu'n nche b'et toj b'e
nkypoq'cha'n toj kyq'ob' xmayb'il teya;
nche ẍut'in ex nkyukcha'n kywi',
inkyma'n ti'ju' tb'anil txin Jerusalen:
¿Ma atzun nintnam ja'lu intoq q'manjtz
qa tb'anilxi'x toj tkyaqil twitz tx'otx'? chechij.
16Kykyaqilju' tajq'oja
nche b'ajk'ab'j ti'ja.
Nche ẍut'inxi' ex nkyokcha'n kywitz, nkyma'n kjalu:
Majx matxi' kub'olj qu'ne'.
Matxi'pe'tzun japun toj tq'ij ja'lo;
¡ma'x qka'yi kse'ntoq kpomela' b'aj! chechij.
17Majapunte Qman Dyos t-xim,
ex ma japunju' tyol.
Mixti'x tzajlaq'jtk'u'j tej tkub' t-xitu'nju
ojetoq kub' t-xima'n tu'n t-xitet,
taq' anb'il tu'n kytze'n ajq'oj ti'ja
mache jawtlaq'b'a'n ajq'oj tu'n ẍekanb'an.
18¡Qaninx o'nb'ila te Qman Dyos,
aya tb'anil nintnam Syon!
¡Qojexwit ta'l twitza
q'ijtl ex qonik'an!
¡Lalunx qjena tu'n toq'a,
lalun che ojlanju' twitza!
19We'ktza qonik'an,
ẍch'ina tkyaqil kmoj;
qonku'ya tanmiya twitz Qman Dyos,
qojlku'j naku'j a' nb'et;
q'onqe'ktz tq'ob'a ex kub'sana te,
ex na'n Dyosa kyi'ju' tala,
nche kyim kyoj xky'ichb'e
toju' tnam tu'n we'yaj.
20Ximankupe'ya Nman Dyos
mix-a'lo'xte jun oje tb'inchaya ikju'.
¿Ma oktzun xe'l kych'yo'n txub'aj
kyne'ẍ inx che ch'u'n?
¿Ma atitzun tu'n kykub' b'yo'n
pale exqe' sanjelal toju' tjaya xjan?
21Woqliqe' ku'xun ex tijwnaq
kyoju' b'e toj tnam;
eb'ajkub' b'yo'n nku'xune ex nqpoje
tu'n k'uẍtx'e'nb'il.
E'tk'ixb'saya b'a'nxi'x tej ttzaj ttx'u'jila,
¡Mixti'x tzajlaqtk'u'ja tej kykub'tb'iyo'na!
22Mache tzaj tb'u'yi'na xob'el toj tkyaqil plaj,
naku'xi'xtej toj jun ninq'ij ẍeb'ju'la;
mix-a'lo'x jun tzaqpaj toj tq'ob'a
tej ttzaj ttx'u'jila, Nman Dyos.
E'b'aj kub' kyb'yo'n ajq'oju'
e'nch'isa'ye' ex e'nxnaq'tza'ye'.
Who We AreWhat We EelieveWhat We Do
2025 by iamachristian.org,Inc All rights reserved.
