1Nman Dyos, aya wipumale';
¡inchin laqje' ti'ja!
2Aya klol weye',
wewb'ile',
tzaqpil weye',
Nmane' Dyos,
aya pik te kolb'il wib'e',
aya kolb'ilweye',
aya ipumalj nklonweye',
jun wewb'ile' tb'anilxi'x.
3Nman Dyos, o'kxa b'a'n tu'n tjaw nimeta:
ajttzaj ntxko'na inchin tklo'na kye wajq'oje.
4Machin b'ajt-xwaku'ne' kamik kyoju' taqwil;
nna'ye' xob'ajilxju' tipumal.
5Machin b'ajtb'alq'i'ne' kamik kyoju' taqwil;
¡kxi'toq nxiqititine' tu'n toju' t-xpatxab'!
6Ntxoke' Qman Dyos toju' yajb'il,
xinqani'ne' o'nb'il te,
ex intzaj tb'i'ne';
¡ponju' tq'ojq'ojel nwi'ye' tzmax toj tja Dyos!
7Tzajtzun jun nin kyejnajnab'tz twitz tx'otx':
majxpe' eb'aj yukchi kyq'uqlilju' witz;
eb'aj yukchi b'a'nxi'x tu'n ttx'u'jil Qman Dyos.
8Intoq etz sib' toj ttxa'n,
atzu'n toj ttzi q'aq' te xitb'il;
¡b'je'tz t-xon ttxalq'aq' toj ttzi inxi'x ja'yon!
9El tjqo'n xb'alun twitz kya'j ex ku'tztzuntz.
¡Atitoq nimaq tnej muj tjaq' tqan!
10Jaxqe tib'aj jun kyerb'in, xi' lik'ik'intzuntz
tzaj lipantzuntz toj kyq'iq'.
11Ajb'enju' qlolj te tewb'il
exju' q'eqmuj tuk'i'l jb'al,
naku'j t-xmuj.
12Tzaj qoptz'aj jun q'ankyaq tzmax tk'etz;
ex tzaj saqb'aqun toju' muj ex ttxalq'aq' in ja'yon.
13Tb'incha Qman Dyos te jawnixi',
tu'n tb'injtzu' tq'ojq'ojel twi' ntinun tzmax toj kya'j;
tzaj tq'o'n saqb'aqun ex ttxalq'aq' njayun.
14E'tzaj t-xonju' tq'ankyaq naku'j talsmaj,
aye'tzu'n wajq'oje eb'aj oq ex eb'ajx slamj.
15Kyej q'ancha'lix t-xeju' ninnjab';
b'aj kyej q'ancha'lixju' tq'uqlil tx'otx'
tu'nju' tq'ojq'ojel twi' Qman Dyos xob'ajilx,
tu'nju' tzaj t-xupi'n kuw.
16Tzaj tnuqpi'n Qman Dyos tq'ob' weye' tzmax toj kya'j,
ex in jatz tiq'i'ne' toju' tnimal ninnjab'.
17Machin tkole' kyeju' wajq'oje kuwqe'
aye' ntx'a'lti'j kyk'u'j wi'je' ex nimxi'x kyipumal kye nwitze'.
18E' b'jo'k tzaqpaj wi'je' tej nkub' yajtiye',
atzunte Qman Dyos oninweye':
19in jatz tiq'i'ne' tu'n ntzaqpete';
¡intkole' qu'n intoq chin tk'u'jla'ne'!
20Matzaj tq'o'n Qman Dyos tu'me'l t-xel weye'
tu'nju' b'a'n nchin anq'ina'ye' twitz,
21kukxwe' nb'et toj tb'e Qman Dyos;
¡b'ajx kub'a' nxk'a'yi'nwe' wib' te Nmane' Dyos!
22Majx na'nqe' kykyaqilju' tchaq'b'il wu'ne';
¡mixti' jumaj matxi'wt che elwik'o'ne' tkawb'il!
23Nchin b'etwe' mixti' wile' twitz;
matxi' tz'el npa'nwib'e' ti'ju' taq'wixil.
24Matzaj tq'o'n Qman Dyos tu'me'l t-xel weye'
tu'nju' b'a'n nchwinqlale' twitz.
25Nman Dyos, majx atita tuk'i'lju' majx ati tuk'i'la,
ex b'a'nta tuk'i'lju' xjal b'a'n,
26ax tyola tuk'i'lju' xjal ax yolin,
atzu'n teju' tx'yan tuk'i'l kuwa.
27Aya nklonkyeju' me's,
aye'tzu'n nkynima'n kyib' nche kub' tme'ssa'na.
28Nman Dyos, intzaj tq'o'na spik'un weye';
Nman Dyos, intzaj ttxqo'na spik'un weye' toju' qxopin.
29Tu'nju' t-o'nb'ila chin okyel tzaqpaje' q'ojil ti'ju' wajq'oje,
ex chin okyixe' tib'aju' nintapi kyi'jile nimaqkytanam.
30Ttzinunte' tb'eyil Qman Dyos;
ex b'a'n tu'n tqe qk'u'j ti'ju' yol ntzaj ttziya'n;
¡Inche tklo'nte Qman Dyos ju' inqe kyk'u'j ti'j!
31¿Alkye juntl dyos ti'jxi' Qman Dyos?
¿Alkye juntl dyos jaku' qoklet tu'n?
32Ate Dyos nq'onte wipumale',
tu'n b'a'n wela'ye' twitz,
33intzaj tq'o'n kyipumalu' nqane' tu'n wojqelane' kse'n msat,
ex tojawl ta'qine', qu'n tzyu'nqine' tu'n,
34nchin t-xnaq'tza'ne' te q'oj,
intq'o'n wipumale' tu'n tjk'etju' smaj q'ank'uxb'il wu'ne'.
35Aya nxq'uqin weye' ex nklonweye',
tzyu'nqine' tu'n tb'a'nq'ob'a;
ex tu'n t-xtalb'ila ẍin jawa' b'enta'ye'.
36Nqaku' sela' nb'eye' tu'na,
ex min ẍin jawtz'aqe'.
37Mankan toj kyq'iju' wajq'oje ex makub'kyi'j wu'ne',
ex tzmaxi' sanjtzwi'ju'ye' tej ẍeb'aj wu'ne'.
38Mache b'ajnpẍu'ne' ex min ẍeb'jawe'tl.
¡Mache kub' tz'aq tjaq' nqane'!
39Matzaj tq'o'na wipumale' toj q'oj;
mache kub'tzipeju' mib'a'n che b'in nwitze' tu'na,
40ex e'kub' oqju' wajq'oje nwitze'.
Iktzu'n ekub'a' nb'ajsa'ne' ntx'a'lti'j kyk'u'j wi'je'.
41Eqanin o'nb'il, ex mix-a'lo' oninkye;
ekub'san twitza Nman Dyos, ex minti' e'tzaj tb'i'na.
42¡E'kub'naj wu'ne' kse'n quq nxi' tiqa'n kyq'iq'!
¡Eb'aj nwab'e'ne' kse'n tz'is toj b'e!
43Machin tkola te jun tnam pi's,
machin nok tq'o'na te nejenel kyib'aj tnam
nche ajb'en xjal weye', ju' min ojtzqi'nqe' wu'ne'.
44Naqa xinma'ne', nche b'in weye';
e'najchaq xjal nche okslan weye',
45e'xjal te juntl tnam nche xob' weye'
ex nche lu'lun aj kyb'je'tz toju' kyewb'il.
46¡Nimanjtzxwit Qman Dyos! ¡Nimanjtzxwitju' klol weye'!
¡Jawxwit nima'n Dyos klol weye'!
47Ate Dyos xq'onte tu'me'l t-xel kyeju' wajq'oje
ex mache kyej tq'o'n tnam tjaq' nkawb'ile'.
48Ate nklonweye' te kytx'u'jilju' wajq'oje,
kyeju' nkych'uẍsa'n kyib' xjaw kyi'nkyib' wi'je'.
¡Aya Nman Dyos nklonweye' kyeju' xjal tx'u'jqe'!
49Qu'mtzun njaw wajwali'na kyxolju' tnam
ex nchin b'itzane' toj tb'iya.
50Intq'o'na tipumalju' nimaqkawil jawni t-sk'o'na tu'n tkanb'an;
In tk'u'jla'nju'ya Dab'i kukxju' kyuk'i'lju' tyajajil, chiju' b'itzal.
Who We AreWhat We EelieveWhat We Do
2025 by iamachristian.org,Inc All rights reserved.
