1Chi Qman Dyos weye': B'a'nqa e'ten Moyses ex Samwel nwitze' tzalu, layx tzaj laqjwe' nk'u'j ti'ju' tnam lu. Q'manxa tu'n kyex nwitze' ex tu'n kyxi'.
2Qatzun matzaj kyqani'n teya ja che kxe'la', q'manxa kye toj nb'iye':
Aye' axkyeju' tu'n kykyim tu'n tx'u'j yab'il,
tu'n tx'u'j yab'il che kyimela';
aye'tzu'n axkyeju' tu'n kykyim toj q'oj,
tojx q'oj che kyimela';
aye'tzu'n axkyeju' tu'n kykyim tu'n we'yaj,
tu'n we'yaj che kyimela';
aye'tzu'n axkyeju' tu'n kyexq'i'n toj juntl tnam,
che elexq'i'n.
3Ayine' Dyos Manb'aj nchin yolin: Kyaje' chukchaq tz'e'ysb'il kywitz ktzajel nq'o'ne': Che ul b'iyb'aj toj q'oj, che b'ajel tzaqu'n kyu'n tx'yan, che ul k'utz ch'yolkye, che b'ajel ch'yo'n kyu'n tojk'ul txkup.
4Knb'incha'ye' tu'n ttzaj xob'el kyi'j kykyaqil nimaqtnam twitz tx'otx' tu'nju' knb'incha'ye' kyi'j, tu'n tpaju' matxi' tb'incha Manases, tk'wal Esekyiy, toj Jerusalen, nimaqkawil toj Juda.
5¿Alxi'xkye ktzajel q'aq'an tk'u'j ti'ja Jerusalen?
¿alkye ktzajel laqj tk'u'j ti'ja?
¿alkye kb'ajextk'u'j tu'n tq'aneta?
6Machin kyej tkolb'e'na, matzaj tmiltz'u'n ttze'lti'ja weye'
ayine' Dyos Manb'aj nchin yolin.
Qu'mtzun matxi' b'aj npasense',
matzaq'pon nq'ob'e' tu'n tz'e'yset twitza ex makub' nxitu'na.
7Mache'x nsputi'ne' t-xjala kse'n tqan triy,
mache b'je'tz wiq'i'ne' kyoju' nimaqtnam toju' tx'otx';
makub' nxitu'ne' ntaname', mixti'qe'tl tk'wal ẍekyaj
qu'n min xkyaj ttzaqpi'n tchwinqlal myab'a'n.
8Nimxi'x qya kyimni kychmil ẍekyaj nq'o'ne' kyxol
kyetwitz txqan tz'awan ttzi ninnjab'.
Wanq'ijxi'x saj nq'o'ne' kamik
kyi'ju' txub'aj kyuk'i'l kyal ku'xunqe';
naqx myanim saj nq'o'ne' b'is ex xob'ajil kyi'j.
9Inche kub'aju' txub'aj b'a'npun kyal
nche kyejten mixti'tl kyxew;
nche ch'ixwi ex mixti'tl kyb'anil,
matz'okju' q'ij te qxopin kye.
Qa ate'x ẍekyaj anq'in,
knb'incha'ye' tu'n kykub'yo'n kyu'n kyajq'oj.
Ayine' Dyos Manb'aj nchin q'mante, chi Dyos.
Jaw ẍch'inju' t-sajelal Dyos10¡Layqinxwite' na, machin tzajtiq'i'na
naqx tu'n nwuline' ex tu'n nq'ojine' kyuk'i'lju' xjal twitz tx'otx'!
Mix-a'lo'qexi' txa'nq'o'n pwaqe' ch'ex, ex mixa'lo'xi' tzaj q'onte nch'exe',
kykyaqilxtzun xjal nche txkon il wib'aje'.
11Japunxwitju' qanb'en kyu'n, Nman Dyos,
qa na'mx wajb'ene' b'a'n teya,
qa b'ajx chinkub'sanaye' teya kyi'ju' wajq'oje
toju' tq'ijlalil xitb'il ex b'is.
Tma Dyos tqanil tz'e'ysb'il kywitz aj Israel12¿Alxi'xkye ktoqilte k'uxb'il te tb'a'nq'ob'kya'j ex q'ank'uxb'il?
13Tu'ntzunte' tkyaqilju' kyile' aj Israel,
che kxe'lnq'o'ne' kyq'inumale' ex kyk'uwene'
kyeju' kyajq'oje'
tkyaqilju' ati toj kytx'otx'e'
tu'n tb'ajx kyjto'n.
14Che kxe'l nq'o'ne' te k'a'yi'nmajin kye kyajq'oje'
toj jun tx'otx' min kyojtzqi'ne',
qu'n matzaj ntx'u'jile'
kse'n jun q'aq' tu'n kyb'aje' tu'n, chi Dyos.
Kub'san sanjelal te Qman Dyos15Nman Dyos, tkyaqil kanli twitza,
¡chin tna'ntza ex chin tonima!
¡Q'oma tu'me'l t-xel kyeju' ljol toj nq'ije'!
Lalun naqwit ka'yina kye ajnkub' kyb'yo'ne'
naqna' tu'nela nnik'xa' wu'ne' nchin wulinjtze'.
16Enk'ame' tyola tej ttzaj yolina weye',
ojexi'x intzalaje' kyu'n,
qu'n teqina Nman Dyos nimtipumala.
17Min xnmujb'awe' wib'
kyuk'i'lju' o'kx nche ximana' tu'n kytzalaj;
atxi'x tkb'u'lena wib'aje'
njunalxwe' nchin anq'in
matz'oku' ttx'u'jila te ntx'u'jile'.
18¿Tiqu'ntzun majx ati k'i'xk'oj wi'je'?
¿Tiqu'n mixti'x nq'anetju' nk'ixb'lene'?
Matz'oka weye' kse'n xoch mixti' a' toj, chi Jeremiy.
Tzaq'web'l tu'n Qman Dyos19Tzajtzun ttzaq'we'n Qman Dyos weye':
Qa matanjsa' tib'a nk'etze', knk'ma'tla ex k'ajb'ela weye'.
Qa mya noqsoktena yolil mixti' tajb'en
exqa o'kx ati tajb'en xxitma'na,
atzuntza kyolil toj nb'iye'.
Aye'kye' xjal lu tu'n tanjtzkyi'j tuk'i'la,
ex myata tu'n txi' kyuk'i'l.
20Kb'el nq'o'na kse'n jun tapi q'ank'uxb'il layx yukchi
teju' tnam lu.
Che q'ojil ti'ja,
layxtzun kub'ti'ja kyu'n,
intina'we' tuk'i'la klolteya ex tzaqpilteya.
Ayine' Dyos Manb'aj nchin q'mante.
21Knkla'ya te kyipumalju' b'inchal myab'a'n,
knkla'ya toj kyq'ob'ju' b'iyol, chi Dyos.
Who We AreWhat We EelieveWhat We Do
2025 by iamachristian.org,Inc All rights reserved.
