Ez 46 - Mam Ostuncalco Bible

Aju' tu'n tb'inchante kawil ex tu'n kyb'inchante xjal kyoju' ninq'ij

1Ayine' Dyos Manb'aj nchin q'mante: Ati tu'n tjpet tjpelju' pe'n tojxi' toj tjawetzq'ij toju' waqaq q'ij aq'untl, kjqeteltzuntz toju' q'ij te ojlab'l ex toju' q'ij te ak'a'j xjaw.

2K'okyexju' kawil toju' ja te o'yb'il twipe'n ti'jxi', ex kb'elten tk'etz junju' tqan tjpel. Aye'tzu'n pale che b'elkytz'e'ysa'n alu'mj te chojb'il ex che b'el kytb'incha'n chojb'il te b'inchjtib'il che kb'eltq'o'n kawil, ex kb'el meje kawil ttzija, majx kb'elpumel tplaj twitz tx'otx', k'eletztzuntz. Atzu'n ja kjpetelxi' te qale.

3Che k'ululju' tnam twitz Qman Dyos twitzxju' tjpel ja kyoj q'ij te ojlab'l ex kyoj q'ij te ak'a'j xjaw.

4Qaq qpoj tman rit ex jun tman rit ati tu'n tq'onte nimaqkawil toj q'ij te ojlab'l tu'n kykub' tz'e'yset te oyaj te Qman Dyos, kykyaqilx mixti' kyktzakajil.

5Kb'eltq'o'n winqi'n litr kywitz awal k'ok'e'kywitz tmoj junjun rit, atzu'n kymoju' qpoj tman rit axi'x jni' tajb'il. Kb'eltq'o'n oxe' litr tk'i' nik'jan aseyt tmoj winqi'nchaq litr kywitz awal k'ok'e'kywitz.

6Kb'eltq'o'n jun qpoj tman wakx, qaq qpoj tman rit ex jun tman rit mixti' kytzakaj te chojb'il toju' q'ij te ak'a'j xjaw.

7Kb'eltq'o'n winqi'n litr kywitz awal k'oke'kywitz tmoj junjun qpoj tman wakx ex, ex jni'tl tmoj junjun tman rit, atzun jni'xku' tajb'il kymoju' qpoj tman rit. Atzun oxe' litr tk'i' nik'jan aseyt tmoj winqi'nchaq litr kywitz awal k'ok'e'kywitz.

8Ajtokxju' kawil, atzu' tu'n tokxa' toju' ja te oyb'il ttzi tjpel, ex axtzu' tu'n tetza'.

9Ex aj kyokxju' xjal k'ulul te Qman Dyos kyoju' ninq'ij, a tu'n kyb'inchante ja'lu: Aye' nche okx ttzija toj tqb'anq'ob'kya'j xi' che eletza' ttzija toj tnayajkya'j, aye'tzu'n nche okx ttzija toj tnayajkya'j xi' che eletza' ttzija toj tb'a'nq'ob'kya'j. Lay che etz tojxju' ttzi jaẍe okxa', kxel kyljo'n kyb'e jun plajtl.

10Ati tu'n tokxju' kawil tuk'i'lju' tnam ex tu'n tetz tuk'i'l.

11Kb'el q'et winqi'n litr kywitz awal k'oke'kywitz tmoj junjun qpoj tman wakx kyoju' chukchaq ninq'ij, ex txqantl tmoj junjun rit; atzun axi'x jni' kymoju' qpoj tman rit. Expe' kb'el q'etl oxe' litr tk'i' nik'jan aseyt tmoj winqi'nchaq litr triy.

12Ajtq'onte kawil jun oyaj tu'n tk'u'j te Qman Dyos, kse'n jun alu'mj te chojb'il k'ok'sb'il mujqa jun chojb'il te b'inchjtib'il, kjqetelju' tjpel toj tjawetzq'ij ex kb'eltq'o'n chojb'il kse'nx nb'incha'n toju' q'ij te ojlab'l. Telentzxi'tzun kjpetelju' ja.

Oyaj nkub' q'et atl junjun q'ij

13Atl junjun q'ij te prim kb'el jun qpoj tman rit te jun ab'q'i, mixti' ttzakajil, tu'n tkub' tz'e'yset te chojb'il te Qman Dyos.

14Ex kb'el q'et jun oyaj te Qman Dyos atl junjun prim, te wuq litr twitz awal k'ok'e'kywitz ex jun litr aseyt, kb'el qet tib'aju' arin. Ilti'j tu'n tb'inchet ja'lu kukxu'.

15Ilti'j tu'n tkub'ju' chojb'il atl junjun prim, aju' tu'n ttz'e'yset qpoj tman rit, ex oyaj twitz awal k'ok'e'kywitz ex aseyt.

Aju' tu'n tb'inchante kawil ti'ju' tx'otx'

16Ayine' Dyos Manb'aj, nchin yolin: Qama txi' toyi'n kawil jun tneju' tx'otx' ti'ju' ttx'o'tx' te jun tk'wal, kjelten te kyetzb'ilju' tyajajil.

17Qatzun matxi toyi'n kawil jni' tx'otx' ti'ju' ttx'otx' te jun ajb'el te, tzmaxi' teju' ajtpon ab'q'i te tzaqpib'l, ajtanjtlti'j teju' kawil, kjeltzuntz te kyetzb'ilju' tk'wal.

18Mixti' toklen kawil tu'n tel tiq'i'n ttx'otx' jun xjal. Aju' kxe'l tq'o'n te kyetzb'il tk'wal, ti'jxju' te kxela' tq'o'n; mix-a'lo'tzun kjeltz mixti' ttx'otx' ex lay che'x slamju' ntaname', chiju' ichan.

Aye' b'inchb'il wab'j teju' tja Dyos

19Inxi'tzun tiq'i'ne ichan toju' qokyex ttx'u'kju' tjpel, kyoju' tal ja nche ka'yinx toj tqb'anq'ob'kya'j ex xjansa'nqe' naq kyeku' pale. Tzaj tyeku'n jun najb'il weye' toj tkub'exq'ij, ti'jxi',

20tzaj tma'n weye: Atzuntzu' tzalu tu'n kytzq'ajsante pale kychib'jil alu'mj nche kub' te chojb'il tu'n kypaj il, ex tu'n kytzq'ajsante oyaj twitz awal k'ok'e'kywitz. Tu'ntzun lay che etzkyiq'i'n ti'xti' lu twipe'n ti'jxi', ex tu'n lan che okxju' tnam kyk'etzju' ti'xti' xjan, chij.

21-22Ex inxitiq'i'ne' twi' pe'n ti'jxi' ex b'aj qb'etine' kykyajel ttx'u'k. Wile' ati jun b'o's pe'n toj junjunju' kyaje' ttx'u'k. Junelni echb'enkye kykyajelx te winqi'n metr tnuqub' ex o'lajoj twitz junjun;

23atitoq jun nintapi ab'jile kyi'jile, ex ate' q'aq' t-xe tkyaqilju' nintapi.

24Tzaj tma'ntzuntz weye': Aye'tzun tzq'ajsb'il ja'lu ja che b'ela' kytzq'ajsa'n ajb'el toju' ja te k'u'lb'il, ju' alu'mj nche kub' kyq'o'n tnam te chojb'il.