1Xitb'itza'n Dab'i tb'itz te Qman Dyos tej tklet tu'n toj tq'ob' Sawul ex toj kyq'ob' kykyaqilju' tajq'oj.
2Tma kjalu:
Aya taye, Aya ktxulweye',
jun ja kuwsa'n tu'n nklete',
tu'na inchin tzaqpeta'ye',
3Aya Ndyose',
jun pik te wewb'ile',
kolb'ilweye',
tu'nju' tipumala inchin kletaye',
ti'ja inchin newana'ye'
ikju'ya kse'n jun ja kuwsa'n te kolb'ilweye',
inchin tklo'na.
¡Machin tzaqpete' tu'na toj q'oj!
4O'kxa Nman Dyos, b'a'n tu'n tjaw nimset tb'iya:
Aj txi' ntxko'na, inchin tklo'na toj kq'ob'ju' wajq'oje.
5Qu'n machin b'aj tb'alq'i'ne' kamik toju' ttolob'; majx matz'oktchiju' xitul wi'je'.
6Aju' kamik machin b'aj tb'alq'i'ne' toju' taqwil; ¡ex machin nokye toj t-xpatxab' kamik.!
7Te ẍin kub' yajtiye' ntxoke' Qman Dyos,
xinqanine' o'nb'il teju' Ndyose',
ex intzaj tb'i'ne' toju' tja;
¡ponju' tq'ojq'ojel nwi'ye' toj t-ẍkyin!.
8Tzajtzun jun nin kyajnajnab'tz twitz tx'otx';
eb'aj yukchiju' tq'uqlil kya'j;
majx eb'aj yukchi tu'n ttx'u'jil Qman Dyos.
9Inxi'xtoq netz sib' toj ttxa'n
atzu'n toj ttzi intoq netz q'aq' in jamun;
¡intoq che etz toj ttzi ttxalq'aq' inche k'enti!
10Tjaqju' ttzi kya'j, ku'tztzuntz.
¡Nimtaq txqan q'eqmuj tjaq' tqan!
11Jaxqe tib'aj t-xik' jun kyerb'in,
tzaj lipantzuntz toj kyq'iq'.
12Ajb'enju' qlolj tu'n
exju' txqan muj iqa'n tuk'i'l jb'al te tja.
13Tzaj qoptz'aj q'ankyaq tzmax tk'etz;
kub'tzun ttxalq'aq'tz in k'enti naku'j jb'al.
14Tb'incha Qman Dyos nim toklen
tu'n tb'injtzu' tq'ojq'ojel twi' intinun tzmax toj kya'j.
15E'tzaj t-xon talsmaj ex q'ankyaq,
aye'tzunju' wajq'oje majx eb'ajx slamj tej kykub' oq.
16Majx kyej q'ancha'lix t-xeju' ninnjab';
ex b'aj kyej q'ancha'lixu' tq'uqlil tx'otx',
tu'n tq'ojq'ojel twi' Qman Dyos,
tej ttzaj t-xupi'n kuw.
17Tzaj tq'o'n Qman Dyos tq'ob' weye' tzmax toj kya'j,
ex njatz tiq'i'ne' toju' nin ninnjab'.
18Machin tkole' kyeju' wajq'oje nim kyipumal
inxi'xtoq tx'a'lti'j kyk'u'j wi'je' ex mastoq nim kyipumal nwitze'.
19E'oktzaqpaj q'ojil wi'je' tej ma'toq chin kub'o'lje',
atzunte Qman Dyos sonin weye':
20Machin ttzaqpiye' ex machin tkole';
¡qu'n nchin tk'u'jla'ne'!
21Matxi' tzaj tq'o'nte Qman Dyos tu'me'l t-xel weye'
tu'nju' nchwinqlale' b'a'n,
22qu'n inchin b'ete' toj tb'e;
¡B'ajx kub'a' nxk'a'yi'na'wib'e' twitz!
23Majx na'nqe' kykyaqilju' tchaq'b'il wu'ne',
¡B'ajx chin ela' txalpuje' kyi'ju' tkawb'ila!
24Matxi' chin lpeye' ti'j chaq'aq'an qine' te;
matxi' njuk'wib'e' ti'ju' myab'a'n.
25Matxi' tzajtq'o'nte Qman Dyos tu'me'l t-xel weye'
qu'n b'a'n wele' twitz.
26Aya Taye, njapunta tyol tuk'i'lju' xjal njapun tyola tu'n,
Tz'aqlixi'xa tuk'ilju' in oktilil tu'n,
27axxi'x yolina tuk'i'lju' ax yolin,
In nab'lina ti'ju' tx'yan tuk'i'l.
28In chetklo'nta' me'sqe',
aye'tzu'n inkynima'n kyib' inel kych'ixaw tu'na.
29Aku'ta Taye, spik'un weye';
aya Qman Dyos, intzaj q'onte spik'un toju' nqloljile'.
30Tu'nju' tonb'ila che b'ajela' wajq'oje,
ex chin iky'ixe' tib'aju' nimaqtapi kyi'jileju' ninkytanam.
31Tz'aqlixi'xte' Dyos tb'eyil;
b'a'n tu'n tqe qk'u'j ti'ju' kyej ttziya'n.
¡Inche tklo'nte Qman Dyos kykyaqilju' q'uqli kyk'u'j ti'j!
32¿Alkyetzuntlju' dyos ti'jxi' Qman Dyos?
¿Alkyetzun juntl dyos kb'a'ntel qklet tu'n?
33Ate Qman Dyos kolb'ilweye' nimtipumal
inchin toni'ne' tu'n wanq'ine' b'a'n,
34majx smaj che b'etju' nqane' tu'n, kse'n tz'ojqelan jun msat,
inchin tkuwsa'ne' ajnxi'ye' toj kyq'iq',
35inchin t-xnaq'tza'ne' tu'n tb'ant nq'ojine',
intzaj tq'o'n wipumale' tu'n ttz'umet q'ank'uxb'il te smaj wu'ne'.
36Aya inxq'uqinweye' ex inchin tklo'na;
tkyaqilju' nb'incha'ne' matxi' q'ancha'lin tu'nju' tb'anila.
37Naqch'i'n sela' nb'eye' tu'na,
ex mixti' ẍin jaw ẍq'ilpuje'.
38Inik' lpeye' kyi'ju' wajq'oje, ex eb'aj wu'ne',
tzmaxi' sanjtzwi'ju'ye' tej kymankun wu'ne'.
39¡E'kub' nb'ajsa'ne'! ¡Majx e'kyaj npẍu'ne'!
¡Majx e'kyaj tjaq' nqane'! Mix e'jawa' we'tl.
40Tzaj tq'o'na wipumale' toj q'oj;
matb'inchaya tu'n kykub' tzipe nwitze' aye'ju' xjaw kyi'nkyib' wi'je',
41ex tu'na ẍe kub'a' oq wajq'oje nwitze'.
Iktzu'n ẍekub'a' nb'ajsa'ne' intx'a'lti'j kyk'u'j wi'je'.
42Intoq che qanin o'nb'il, ex mix-a'lote oninkye;
e'txokon te Qman Dyos, ex mixti' e'tzaj ttzaq'we'n.
43¡Majx e'kyaj nb'uchine' kse'n quq!
¡B'aj nxjab'le'ne' kse'n xoq'l toj b'e!
44In tkola tej tjaw kyiq'i'n kyib'ju' ntaname' wi'je',
machin tene' tu'na te nejenel kyib'aj nimaqtnam,
ex mache ajb'en xjal weye' mixtoqti' ojtzqi'nqe' wu'ne'.
45Aj txi' nma'ne', inche b'in weye';
inchin jaw nimane' kyu'n najchaq xjal,
46inche tzaj xob'u' najchaq xjal weye',
inche lu'lun ajkyetz toju' kyewb'il.
47¡Nimanjtzxwitju' Qman Dyos! ¡Xjanxi'xwit toklenju' klol weye'!
¡Jawxwit nima'n Qman Dyos, inklonweye' ex inxq'uqinweye'!
48Ate Dyos xq'onte tu'me'l t-xel kyeju' wajq'oje
ex matxi' che okxtq'o'n tnam tjaq' nkawb'ile'.
49inchin tklo'ne' kye wajq'oje,
kyeju' ẍe jawmiltz'uj wi'je'.
¡inchin tklo'na Nman Dyos kyeju' xjal tx'u'jqe'!
50Qu'mtzun injaw nnima'na kyxolju' nimaqtnam
ex inchin b'itzane' toj tb'iya.
51Intzaj tq'o'na tipumalju' nimaqkawil jawni t-sk'o'na tu'n tkanb'an;
k'u'jla'n Dab'i kukxju' tu'na kyuk'i'lxi' tyajajil, chi Dab'i toju' tb'itz.
Who We AreWhat We EelieveWhat We Do
2025 by iamachristian.org,Inc All rights reserved.
