Ez 44 - Mam Ostuncalco Bible

Tajb'eb'lju' tjpel toj tjawetzq'ij

1Inxitiq'i'ntle' ichan toju' qokyex ti'jxi' tja Dyos toj tjawetzq'ij, jpu'ntoq.

2Tzaj tma'n Qman Dyos weye' atzu':

Kjel jpette' ttzija lu; lay jqet. Mix-a'lo' k'okyex toj, qu'n toj oje tz'okxa' Qman Dyos, janche ajb'ena' aj Israel. Qu'mtzun kjel jpet.

3Noq o'kxju' kawil b'a'n tokex, tu'n tkub' qe walteju' wab'j xjan nwitze' ayine' Dyos. Atzu' tu'n tokxa' toju' ttzija te o'yb'il ex axtzu' tu'n tetza', chij.

Alkyeqe' b'a'n kyokx toj tja Dyos

4Yajxi'tzuntl nxitiq'i'ne' ichan toju' ttzija toj tb'a'nq'ob'kya'j, twitz tja Dyos. Wile' matxitoq noju' ja te k'u'lb'il tu'n tajwalil Dyos, inkub' mejetzuntze' majx ku'pun nplaje' twitz tx'otx'.

5Tzajtzun tma'n Qman Dyos weye':

Ichan, ka'yina b'a'nxi'x ex b'inku'ya b'a'nxi'x tkyaqilju' kxe'l nma'ne' kyi'ju' kawb'il ex nuk'b'il ti'ju' ja te k'u'lb'il. B'intza b'a'nxi'x alkyeqe' b'a'n kyokx toju' ja te k'u'lb'il ex b'a'n kyetz toj.

6Q'manxa teju' pi's tnam Israel: A ntma'n Dyos ja'lu: Tk'i'xtzun kyb'inchan taq'wixju'ye', tnam aj Israel.

7Inkub' kytxa'ju'ne' njaye', nche okx kyiq'i'ne' najchaq xjal toj, e'xjal min q'i'n techelju' nyole' kyejni b'entti'j, toj kywi' mo ti'j kyxmilal; inkub' kytxa'ju'n ajttzaj kyq'o'n ky-until ex kychk'el chojb'il te nwaye' ex nche ik' tib'aju' nyole' kyejni b'entti'j tu'n tkyaqilju' kyb'inchb'aj taq'wixi'x lu.

8Ex min nche kyb'incha'n nnuk'b'ile' xjan, nche kyej kyq'o'n toj kyq'ob'ju' najchaq xjal.

9Qu'mtzun nmaye' ayine' Dyos Manb'aj: lay tz'okx jun najchaq xjal toju' njaye' qa min iq'i'n techelju' nyole' kyejni b'entti'j tu'n, toj twi' ex ti'j t-xmilal; tk'i'xpe'wt jun najchaq xjal najli kyxol aj Israel.

10Aye' aj Leb'i, elkypa'n kyib' wi'je' tej telkypa'nkyib' aj Israel ti'ju' nb'eye' ex inkyaj kytzaqpi'ne' tu'n kyk'ulun kye witzleb', ati tu'n kychjonteju' kyil.

11B'a'n tu'n kyajb'en xq'uqil ttzi njaye', ex kyoj junjuntl ajb'eb'l toju' njaye'; aye' che b'elb'yo'nkye' alu'mj nche kub' tz'e'yset te chojb'il k'ok'sb'il exqe' che b'elkyq'o'n tnam te oyaj; ex ati tu'n kyajb'en onilkyeju' tnam.

12E'ok ajb'el kye aj Israel tu'n tiq'et twitz k'u'lb'il kye witzleb', ikytzu'n eb'inchana' il kyu'n. Qu'mtzun, kychja'ju' kyil. Ayine' Dyos Manb'aj nchin q'mante.

13Lay b'ent kyajb'en weye' te pale ex lay che tzaj lq'e kyk'etzju' ti'xti' xjan weye', mixyate' kyk'etzju' xjanqe'xi'x. Kkyiqa' kych'ixaw tu'n kypaju' ti'xti' taq'wixi'x b'aj kyb'incha'n.

14Che okyel nq'o'ne' b'inchalte ajb'eb'l ch'i'n toklen toju' njaye', tu'n kyb'inchante tkyaqilju' ati tu'n tb'inchet toj.

Aye' pale

15Aye'tzu'n pale aj Leb'i tyajajil Sadok, ljo'xtoq kyajb'en toju' njaye' tej kyel txalpuju' aj Israel ti'ju' nb'eye', b'a'n tu'n kytzaj lq'e nk'etze' tu'n kyajb'en weye'. B'a'n tu'n kyul nwitze' tu'n tkub' kyq'o'n ky-until ex kychik'elju' chojb'il nwitze'. Ayine' Dyos Manb'aj nchin chq'onte.

16Ex b'a'n tu'n kyokx toju' njaye' ex tu'n kyoklq'e ti'ju' q'olb'eb'l weye' tu'n kyajb'en weye', ex aye' che ajb'el weye'.

17Aj kyokx toju' tjpel pe'n tojxi', ati tu'n tok kyq'o'n kyxb'alun sed. Mixti' tu'n tok kyq'o'n kyxb'alun lan ajkyb'inchante ajb'eb'l twi' pe'n tojxi' mujqa toju' njaye'.

18Kjawix jun ẍipb'il kywi' sed, ex che okyel kykalsonsiy sed, ex lay tz'ok k'alb'il kyk'u'j tu'n lalun tz'el a' kyi'j.

19Ajtzun kyetz twipe'n ti'jxi' ja ta'qe' tnam xjal, nejl k'elelkyiq'i'n kyxb'alun najb'en kyu'n toju' ajb'eb'l toj tja Dyos, ex tu'n tkyaj kyq'o'n kyoj tal ja toj tja Dyos, ex k'okyel kyq'o'n juntl kyxb'alun, tu'n lalun tzik'ju' t-xjanb'il xb'alun ti'ju' tnam.

20Lay tz'el kysk'o'ji'n kywi', ex lay kub' ch'isa'n kywi' nimaq; naq k'elel kyjo'n t-xya'mal kywi'.

21Mixti' tu'n tk'wan b'in jun pale ajtokx twipe'n tojxi'.

22Mixti' tu'n tmje jun pale tuk'i'l jun qya kyimni tchmil mujqa kub'ni tpa'ntib' tuk'i'l tchmil, naq o'kx tuk'i'l jun txin aj Israel qpoj mujqa t-xu'jilb'en jun pale kyimni.

23Ati tu'nt-xi kyxnaq'tza'n pale ntaname' tu'n telkynik' teju' xjan ex teju' tz'il, teju' ẍtilun ex teju' mya ẍtilun.

24Aye' che okyel te ajkawil kyoju' q'oj, ex k'okyela toj xjel kyu'n kse'nx nkyma'n nkawb'ile'. Kjapumel tkyaqilju' nkawb'ile' ex nxnaq'tzb'ile' kyu'n kyi'j tkyaqilju' ninq'ij weye', ex che b'elkynima'n q'ij te ojlab'l te xjan weye'.

25Mixti' tu'n tok kytzyu'n jun kyimni, tu'n lalun che tz'ilix, naq o'kx qa kyman mo kytxu, jun kyk'wal mo kymyal, jun kytzik mo kyitz'in, mo kyanab' mya mjeb'ni.

26Qama kyb'incha, ati tu'n kyẍtilsante kyib', ex tu'n kyyonte wuq q'ij.

27Ajtzun kyokx jumajtl tpenju' ja te k'u'lb'il tojxi' b'inchalte kyajb'eb'l, kb'el kyq'o'n jun chojb'il tu'n tpaj il. Ayine' Dyos Manb'aj nchin q'mante.

28Naq o'qinkxe' chin kyk'ma' pale te kyetzb'il. Lay txi' kytx'otx' toj Israel. Ayine' kyetzb'il.

29B'a'n tu'n kywan kyi'ju' twitz awal k'ok'e'kywitz nkub' kyq'o'n aj Israel weye', ex kyi'ju' a'lumj inche kub' q'o'n te chojb'il tu'n kypaj il. Ex kxe'l kye tkyaqilju' makub' kyxjansa'n aj Israel weye'.

30Kyk'ma' pale tb'anilxi'x tnejel twitz awal ex tkyaqilju' oyaj. Ex ajtkub' kyb'incha'ne' tq'otjil wab'j, aju' tb'anil kxe'l kyq'o'ne' kye pale. Kb'eltzun nq'o'n nky'i'wb'iltze' kyib'aju' kyjaye'.

31Mixti' tu'n t-xikych'yo'n pale jun pich' mujqa a'lumj majaw kyim tu'nxtib', mujqa makub' tzaqu'n tu'n jun tojk'ul txkup.