Lv 3 - Mam Ostuncalco Bible

Chojb'il te mujb'ab'ltib'il

1Qa ati jun makub' tq'o'n chojb'il te mujb'ab'ltib'il nwitze', tman wakx mujqa ttxu wakx kyi'ju' talu'n, a kb'el tq'o'nju' mixti' ttzakajil.

2Aju' kb'el q'onteju' oyaj kb'eltq'o'n tq'ob' tib'aj twi'ju' alu'mj, kb'el tb'yo'ntzuntz ttziju' Ja te Mujb'ab'ltib'il. Aye'tzuntlju' pale kxel kywitxk'a'nju' chik' tib'aj ex ti'jile q'olb'eb'l.

3Alkyete makub' tq'o'n toyaj alu'mj te jun chojb'il te mujb'ab'ltib'il, kb'el tq'o'nju' unt tok ti'j t-xqintxaju' alu'mj te jun oyaj tz'e'ysa'n nwitze',

4exqe'ju' tchinaq', exju' unt twittze'lti'j, exju' unt tok kyi'ju' twab'l, ju' k'elel tiq'i'n junx kyuk'i'lju' tchinaq'.

5Kb'el kytz'e'ysa'n pale tkyaqil ja'lu tib'aj q'olb'eb'l, junx tuk'i'lju' alu'mj ju' kb'el tz'e'yset tib'aju' si in k'ent te jun oyaj tz'e'ysa'n tb'anil tk'ok'jal weye'.

6Qa ati jun makub' tq'o'n jun talu'n kyi'ju' trit te jun chojb'il te mujb'ab'ltib'il nwitze', jun tman mujqa jun ttxu mixti' ttzakajil kb'eltq'o'n.

7Qama kub' tq'o'n jun qpoj tman rit, ajtkub' tq'o'n nwitze'

8kb'eltq'o'n tq'ob' tib'aju' twi', kb'el tb'yo'ntzuntz ttziju' Ja te Mujb'ab'ltib'il. Aye'tzunju' pale kb'el kywitxk'a'nju' chik' tib'aj ex ti'jileju' q'olb'eb'l.

9Alkye makub' tq'o'n alu'mj te jun chojb'il te mujb'ab'ltib'il, kb'eltq'o'n unt exju' tje elni joyet twitzxi'x tb'aqil, exju' unt tok kyi'ju' t-xqintxa te jun oyaj tz'e'ysa'n nwitze',

10kyuk'i'lju' kab'e' tchinaq' exju' unt tok kyi'j exju' unt twittze'lti'j, exju' unt tok kyi'ju' twab'l, ju' k'elel tiq'i'n junx kyuk'ilju' tchinaq'.

11Kb'el ttz'e'ysa'ntzun paletz tkyaqil ja'lu tib'aj q'olb'eb'l te jun oyaj k'a'chb'il tz'e'ysa'n te ninb'ilweye'.

12Qatzun ttxu chib' kb'eltq'o'n nwitze',

13kb'eltq'o'n tq'ob' toj twi', kb'el tb'yo'ntzuntz ttziju' Ja te Mujb'ab'ltib'il, aye'tzuntlju' pale kb'el kywitxk'a'nju' chik' tib'aj ex ti'jileju' q'olb'eb'l.

14Aju' kb'el q'onte alu'mj, ate kb'el tq'o'nju' ti'ju' oyaj tz'e'ysa'n te ninb'ilweye' aju' unt tok kyi'ju' t-xqintxa,

15exju' kab'e' tchinaq', exju' unt tok kyi'j, exju' unt twittze'lti'j, exju' unt tok ti'ju' twab'l, ju' k'elel tiq'i'n junx tuk'i'lju' tchinaq'.

16Tkyaqiltzun ja'lu kb'el ttz'e'ysa'nju' pale tib'aju' q'olb'eb'l te jun oyaj k'a'chb'il tz'e'ysa'n, tb'anil tk'ok'jal. Tkyaqilju' unt weye' ayine' Dyos Manb'aj.

17Jun kawb'ilte' lu kjelten tejumajx kyeye' ex kye kyk'wale' jaxjaku' mache'xa'ye': mixti' tu'n t-xi' kych'yo'ne' unt exju' chik', chiku'ya kye, chi Qman Dyos.