1 S 10 - Mam Ostuncalco Bible

T-xjansa Samwel Sawul te nimaqkawil kye aj Israel

1Tzajtzun tiq'i'n Samwel jun lmet aseyt, ex jax tqo'n toj twi' Sawul ex oktma'tzi'n, xitma'ntzunte:

—Matxi' xjansanjtza ja'lo tu'n Qman Dyos tu'n toka te kawil toj Israel, ju' ttanam. Kkawila tib'aj ex oktkla'ya kyeju' tajq'oj ju' ate' ti'jile. Ex ajtkanb'ana, a techalju' qa a Qman Dyos matxi' tz'okq'onteya te kawil tib'aju' ttanam:

2Aj qpa'nteqib' ja'lo, kche tk'lu'ya kab'e' ichan, nqayin tk'etzu' muqb'il te Rakyel, toj Selsa, toj kytx'otx' tyajajil B'enjamin. Ktzajel kyma'n teya qa matxi' che knetju' b'ur, ju' intoq che tjyo'na, exqa kyi'jtle' in b'isuna' tmana ex mya kyi'ju' b'ur, ex inximan titi' kt-se' ti'ja.

3Ajtzun txi' lq'e ch'i'ntla ajtpona t-xeju' k'ol toju' najb'il Tab'or, ktk'lu' tib'a kyuk'i'l oxe' ichan xi' kyjax B'etel tu'n kyk'ulun te Dyos. Iq'i'n oxe' chib' tu'nju' jun, atzu'n juntl oxe' saq wab'j, atzu'n toxi'n iq'i'n jun tz'u'n b'in tu'n.

4Ktzajel q'olb'e'na kyu'n, ex ktzajel kyq'o'n kab'e' saq wab'j teya. K'moma kye.

5Kpomeltzuntza Kyib'ea te Qman Dyos, ja ta'qe' xq'uqil aj Pilistyaqe'. Ajtzun tokxa toj nintnam, ktk'lu' tib'a kyuk'i'l jun tnej t-sanjelal Dyos nche yolin ti'ju' ntzaj tma'n Dyos kye, xi'kyku'tz toju' ja xjan. Nejlqe' xjal kywitz nche chinb'an tzintzin, chilchil, xux ex arpa.

6Kb'eltzun t-xew Dyostz tib'aja, kyoliltzuntza ti'ju' yol ktzajel tma'n Qman Dyos teya kse'nkye, ex k'okyela naku'j juntl ichan.

7Aj tb'ajiju' lu ti'ja, b'inchamju'ya b'a'n toj twitza, qu'n k'oninjtzela tu'n Qman Dyos.

8Ex kutxi' nejpuna Wilwal, atzun chin pone' tk'etza yajxi'ch'i'ntl tu'n tkub' q'et chojb'il k'ok'sb'il te b'inchb'il. Tenku' wuq q'ija atzu' tzmaxi'j ajnpone' kxe'l nma'ntzuntze' teya titi' ktb'incha'ya.

9Naqxi'xtzun nkyaj tq'olb'e'n Sawul Samwel tu'n tanj, ch'exb'enjtztzuntz tu'n Qman Dyos; ex ejapun tkyaqilju' techlal texju' q'ij lu.

10Tetzunj kypon Sawul tuk'i'lju' tmajin toj Wib'ea, kyk'ulkyib' kyuk'i'l t-sanjelal Dyos inche yolin ti'j tyol Dyos. Kub' tentzun t-xew Qman Dyostz tib'aj Sawul, o'kx taq'wi Sawul yolil ti'j yol in tzaj tma'n Qman Dyos te, kse'nxju'kye.

11Kykyaqiltzunju' ojtzqi'ntoq Sawul kyu'n, tej kyka'yinte qa axjunte nyolin ti'ju' yol ntzaj tma'n Qman Dyos kyuk'i'lju' t-sanjelal Dyos, kyma kyxolilex: ¿Ti'tzun xb'aj ti'ju' tk'wal Kyis? ¿Ma axjunte Sawul t-sanjelal Dyos?, chechij.

12Tmatzun jun kyxol: ¿Altzunkyeju' kyman? Atzuntzu' tzajna'ju' yol: ¿Ma axtzun junte Sawul kyxol t-sanjelal Dyos?, chij.

13Tb'ajlenxi'tzun yolin Sawul ti'ju' yol ntzaj tma'n Dyos, pon tja.

14Xi'tzun tqani'n ttzik mo titz'in tman kye tuk'i'lju' tmajin:

—¿Jae'tx'anja'ye'?, chijkye.

Atzunte Sawul xitma'n te:

—Jyolkyeju' b'ur. Tetzunj mixtoqti'x nche knet, oxi'ye' tk'etz Samwel, chij.

15Xi'tzun tma'nju' ttzik mo titz'in tman te:

—¿Ti'tzu'n saj tma'n Samwel kyeye'? kyb'inchame' xtalb'il, kymantze' weye', chij.

16Xitzun ttzaq'we'n Sawul te:

—Tzaj tma'n axxi'x qa matxi'toq che knetju' b'ur, chij.

Ex mixti'te xitma'n ti'ju' kawb'il, ju' ojetoq tma Samwel te.

17Yajxi'tzuntel e'ttxok Samwel aj Israel, tu'n kypon Mispa k'ulun te Qman Dyos;

18atzuntzu' xa' tma'n kye:

—Chi Qman Dyos kjalu: Aj Israel, ayine' netz iq'inkyeye' toj Ejipt, e'nkole' toj kyq'ob' aj Ejipt, ex kyeju' kykawb'il intoq che tx'iwunjtze' kyu'n.

19Atzu'n ja'lo machin el kyik'o'ne' ayine' inklonkyeye' toj tkyaqilju' yajb'ilkyeye', ex machin el kyik'o'ne' tu'nju' in kyqani'ne' tu'n tok nq'o'ne' jun nimaqkawil kyeye'. Qu'mtzun, kyb'uyintz kyib'e' ja'lo, kse'nxju' kyyajajile' toj tneji'n ex toj k'loji'n, chi Dyos, chij.

20Tchaq'tzun Samweltz tu'n kyb'jo'k lq'e kykyaqilju' tnej tyajajil Israel, ex atzu' pona' tz'aq kyi'ju' tyajajil B'enjamin.

21Tchaq'tzuntz tu'n kypon lq'eju' tyajajil B'enjamin, ex atzu' pona' tz'aqtl kyi'ju' k'loj tyajajil Matri, kyxoltzun ja'lu pon tz'aq ti'j Sawul tk'wal Kyis. Tetzunj txi' jyob'aj mixti' knet,

22qu'mtzun xikyqani'n junmajtl te Qman Dyos, tu'n kyb'inte qa axtoqtzu' ta' Sawul atzu'. Atzunte Qman Dyos tzaj ttzaq'we'n qa atitltoq atzu' exqa matxi'toq tz'okx tewa'ntib' kyxolju' iq'inj.

23Exi'tzuntz iq'imitzte jatoq in newana'. Tetzunj tpon Sawul kywitzju' tnam, mixtoqti' jun aj Israel njapun twe' twi' t-semu'l.

24Xitzun t-xjelu'n Samweltz kye kykyaqil:

—¿Ma matxi' kyka'yiju'ye' ichan matxi' jaw t-sk'o'n Qman Dyos te nimaqkawil? ¡Mixti' jun aj Israel kse'nte!, chij.

Aye'tzunkye' aj Israel xikytzaq'we'n:

—¡Nimanjtzxwita nimaqkawil!, chechij.

25Eb'ajxtzun tchik'b'a'n Samwel kawb'il kyeju' tnam, ex e'kub' ttz'ib'a'n toj jun u'j ex okxtk'u'n toju' ja xjan te Qman Dyos. Xitma'ntzun Samweltz kye kykyaqil tu'n kyanj kyja.

26Ex ikxte Sawul xi' tja toj Wib'ea, kub'tzun tq'o'n Dyos toj kyanmi b'a'npun xjal min nche xob', tu'n kyxi' tuk'i'l.

27Ate'tzun junjuntl xjal kyma: ¿Ma axi'xtzun ma'na'j kklolqe? chechij. El kyik'o'n ex mixti' e'niman te; atzunte Sawul mixti' xi'tojtwinqil.