Esd 6 - Mam Ostuncalco Bible

1Tchaq'tzu'n nimaqkawil Dariy tu'n tjyonjtz kyoju' k'ub'l u'j janche k'u'njtza'ju' u'j nim kyoklen toj B'ab'ilon,

2eltzun yal jun u'j toju' ja te kawb'il toj Ekb'atana, toju' tx'otx' Medya, ja tz'ib'a'na' kjalu:

3Etztq'o'n nimaqkawil Siro chaq'b'il lu, toju' tnejel ab'q'i nkawin, chij kjalu:

Ti'ju' tja Dyos toj Jerusalen: ati tu'n kyku'x q'etju' tq'uqlil ex tu'n tjaw b'inchet jumajtlju' ja, tu'n kykub' kyq'o'n xjal chojb'il atzu'. Ati tu'n tkub' junaq wuq (27) metr twe' ex junaq wuq (27) twitz;

4tuk'i'l oxe' txol ab'j nimaq kypimal ex jun txol ak'a'j tze. Aju' tk'uwen nimaqkawil kchjolteju' kb'ajel ti'j.

5Aye'tzu'n aq'unb'il q'anpwaqqe' ex saqpwaqqe' toju' tja Dyos, ju' b'je'tztiq'i'n Nab'ukodonosor toju' tja Dyos toj Jerusalen, ex eb'ju'l tiq'in B'ab'ilon, tu'ntanjl anjsetlkyi'j ex tu'n kyxi' iq'et toj Jerusalen, ex tu'n kyokxq'et to'ju' tja Dyos, jaxu' te'qe'toq, chiju' chaq'b'il tz'ib'a'n.

6Etztzun tq'o'n nimaqkawil Dariy chaq'b'il lu te Tatenay, kawil toju' tx'otx' toj tkub'exq'ij te nin a' Ewprates, ex te Setar-b'osnay ex kyeju' kyuk'i'l, nim kyoklen toju' kawb'il tojxju' t'xotx' lu:

Kukyetze' toj Jerusalen

7ex kq'onxe' anb'il teju' kawil kye aj Juda ex kyeju' nejenel kyxol tu'n tjaw kyb'incha'n jumajtlju' tja Dyos toju' tkub'el.

8Aye' nchaq'b'il ju'ye' lu tu'n kyonetju' nejenel kye aj Juda tu'n tjaw b'inchet jumajtlu' tja Dyos: Tu'n kychjetju' nb'aj ti'ju' aq'untl lu tojxi'x tq'ijlalil kyu'nju' chojb'il njaw b'uyet teju' kawb'il toju' tx'otx' toj tkub'exq'ij te nin a' Ewprates, tu'n mi kyeja' teneju' aq'untl.

9Ex tu'n kyxi' q'et ilxi'xti'j tkyaqil q'ij titi' makyqaniju' pale toj Jerusalen, tkyaqilju' nojqelan, qa e'qpoj tma'n wakx, e'tman rit mo qpoj tman rit te chojb'il k'ok'sb'il teju' Qman Dyos te toj kya'j; mujqa triy, atz'an, b'in mo aseyt,

10tu'n kyq'onte chojb'il k'ok'j te Dyos te toj kya'j ex tu'n kykub'san twitz Dyos tib'aju' nchwinqlale' ayine' nimaqkawil ex tib'aj kychwinqlalju' nk'wale'.

11Ex majx kxe'l nma'ne' qa ati jun min xtb'inchaju' nchaq'b'ile' lu, k'eletz qitpet jun tptz'o'milu' tja ex kb'ajel jumet toj; ex majx kjel xitetju' tja.

12¡Ex awtju' Dyos jaw sk'onte Jerusalen jatu'n ttzaja' na'n tb'i, kub' xitunte alkyexku' nimaqkawil mujqa nimaqtnam, qama tz'oktq'o'ntib' maqul mujqa xitul ti'ju' tja Qman Dyos ati toj Jerusalen! Ayine', Dariy, ẍin q'onteju' chaq'b'il lu. Japunx kyu'ne' kse'nxju' xb'ajx ntz'ib'a'ne', chiju' tchaq'b'il nimaqkawil.

Xiljo'n aq'untl ex japunb'aj

13Kyb'inchatzu'n Tatenay, kawil toju' tx'otx' toj tkub'exq'ij te nin a' Ewprates, ex Setar-b'osnay exqe' kyuk'i'l, kse'nxju' tchaq' nimaqkawil Dariy.

14Iktzu'n b'enta' txi' kyljo'n nejenel kye aj Juda aq'untl tu'n tjaw b'inchet jumajtlju' tja Dyos, kse'nx kymaju' t-sanjelal Dyos Akey ex Sakariy, tk'wal Ido. Ex japunb'aj tb'inchet jumajtlju' tja Dyos kse'nxju' tchaq' Qman Dyos ex kse'n kychaq' Siro, Dariy ex Artajerjes, nimaqkawil aj Persya.

15Japunb'aj tb'inchetju' tja Dyos toj oxe' tajlal xjaw Adar, toj twaqaqi'n ab'q'i nkawin Dariy, nimaqkawil aj Persya.

16Kub' kytzalajsa'n aj Israel, e'pale, tyajajil Leb'i exqe' txqantl b'je'xni qe'toq iq'i'n, tej tkub' xjansetju' tja Dyos.

17Kub' kyq'o'n jo'naq (100) qpoj tman wakx te chojb'il toju' q'ij lu, ex lajnaq (200) tman rit ex junk'al (400) qpoj tman rit, extzun kab'lajoj (12) chib', jun tu'n junjun tnej tyajajil Israel, te oyaj tu'n tpaj kyil kykyaqil aj Israel.

18Ekub'tzun kyq'o'n pale toj k'loji'n tu'n kych'exb'ente kyib', exqe' aj leb'i tojilex kyaq'un, tu'n kyajb'en toju' k'u'lb'il te Dyos toj Jerusalen, kse'nxju' tz'ib'a'n toju' tuj Moyses.

19Expe' kub'kyik'sa'n b'je'xniqe'toq iq'i'n Tq'ij Tzaqpib'l toj kyajlajoj (14) tajlal tnejel xjaw.

20Matxitoq b'aj kyẍtilsa'n kyib'ju' pale ex aj Leb'i, qu'mtzun ẍtilsa'ntltoq kyib' twitz Dyos. Kub'tzun kyq'o'n chojb'il te Tq'ij Tzaqpib'l kye kykyaqilju' b'je'xniqe'toq iq'i'n, kyex ex kyeju' pale kyuk'i'l.

21Kykyaqilu' aj Israel exniqe'toq iq'i'n ex eb'ju'l jumajtl, e'wan ti'ju' wab'j te Tzaqpib'l, junx kyuk'i'lju' ojetoq tz'el kypa'n kyib' ti'ju' taq'wix kyb'inchb'aju' nimaqtnam min nche niman te Dyos, ex kymujb'a kyib' kyuk'i'l toju' k'u'lb'il te Qman Dyos.

22Wuq q'ij kub'kyik'sa'n tq'ij wab'j mixti' ttx'amal tuk'i'l tzalajb'il, qu'n ojexi'x che tzalaj tu'n Qman Dyos tu'nju' tb'incha tq'onte tib'ju' nimaqkawil aj Persya kyuk'i'l ex matz'onin kyi'j tu'n tjw b'inchet jumajtlju' tja Qman Dyos.