Neh 9 - Mam Ostuncalco Bible

B'jatztpa'n Esdras kyil aj Israel

1B'aj kyb'u'yi'n kyib'u' aj Israel toj junaq kyaje' (24) tajlalxju' xjaw tu'n kymewayin; b'jo'k kyq'o'n kyxb'alun te b'is ex jax kyq'o'n tx'otx' toj kywi',

2eltzun kypa'n kyib' kyi'ju' najchaq xjal, e'kub' we' ex okkyq'o'n kyil kyi'j ex kyilju' ojtxi' kychman.

3Tetzunj wa'lqe'toq jaxu' te'qe', oxe' or jaw ẍch'i'nju' tkawb'il Qman Dyos kywitz kykyaqil, ex oxe' ortl b'jawtz kypa'n kyil ex ek'ulun te Qman Dyos.

4Yajxi'tzuntl eb'jaxu' aj Leb'i Joswe, B'inuy, Kadmyel, Seb'aniy, B'inuy, Sereb'iy, B'ani ex Kyenani, twi' xwe'l ex ena'n Dyos tuk'i'l tq'ojq'ojel kywi' kuw;

5kymatzun aj Leb'i Joswe, Kadmyel, B'inuy, Asab'niy, Sereb'iy, Odiy, Seb'aniy ex Petaiy, kjalu: Che we'ktze', kyajwalinktze' Qman Dyos tejumajx ex kukxju'. ¡Ajwalinjtzxwitju' tb'i nim toklen ex tb'anilxi'x tuk'i'l ky'i'wb'il ex b'itz! chechij.

6E'na'ntzun Dyosu' tnam kjalu: Ateju'ya Dyos Manb'aj ex mix-a'lo' juntl. Aya b'inchante kya'j ex tzmax tib'ajxi' kya'j, ex kykyaqilju' che'w; aya b'inchante tx'otx' ex tkyaqilju' ati twitz, exqe' ninnjab' ex kykyaqilju' ati kyoj. Aya nq'onte kychwinqlal kykyaqilju' ti'xti'. Qu'mtzun nche k'ulunju' che'w twitz kya'j teya.

7Taye, aya Dyos jaw sk'onte Ab'ram; etztiq'i'na toj Ur, ninkytanam aj Kaldey, ex oktq'o'na tb'i Ab'raam.

8Tka'yiya qa jun ichan q'uqlitoq tk'u'j ti'ja, tb'inchaya jun nak'b'il tuk'i'l, ex kyej b'entti'j jun tyola tuk'i'l qatoq ktzajel tq'o'na kytx'otx' aj Kanaan, itit, amorey, aj Perisya, jeb'usey ex aj Jerjesey, kyeju' tyajajil; ¡ex matxi' japun tyola, qu'n kukxu' njapunta tyol!

9Tka'yiya qa intoq che yajtiju' ojtxi' qchmane' toj Ejipt, ex tb'iju'ya kyoq'el tk'etzju' ninnjab' tok tb'i kyaq.

10Tb'inchaya nimaq b'a'nq'ob'aj te lab'te'nqe' ti'j paraon, kyi'j kykyaqilju' tmajin ex kyi'j kykyaqilju' xjal toju' ttx'otx', qu'n tilju'ya myab'a'n intoq kyb'incha' kyi'ju' aj Israel. Ex tkanb'aya jun tyolinjtza b'a'n tzmax ja'lo.

11Kub' taq'pu'nju'ya ninnjab' toj kab'e' kywitz, ex eb'jik'x toj nky'ajchaqju' ninnjab' tib'aj tx'otx' tzqij; aye'tzu'n kyajq'oj eku'x tmulq'i'na tzmax t-xexi', kse'n jun ab'j toj a' nim t-xe.

12Ex eb'ajx t-ẍaqlu'na te q'ijtl tjaq' jun tnej muj, atzu'n te qonik'an tjaq' jun tnej q'aq', tu'n tk'ant toju' kyb'e ljo'ntoq kyu'n.

13Yajxi'tzuntl kb'u'la twi' witz Sinayi, ex tzaj yolina kyuk'i'l tzmax toj kya'j; e'tzaj tq'o'na chaq'b'il tnik'alkyi'j kye, xnaq'tzb'il axqe'xi'x, e'kawb'il ex chaq'b'il tb'anilqe'.

14Ex xit-xnaq'tza'na kye tu'n kyxjansanteju' q'ij te ojlab'l, ex e'tzaj tq'o'na chaq'b'il, e'axxi'x xnaq'tzb'il kye toj ttzi tmajina Moyses.

15Expe' tzaj tq'o'na wab'j te toj kya'j kye tu'n tq'jen we'yaj kyi'j ex a' toj pik tu'n tq'jen k'waj kyi'j. Xitma'ntzuntza kye tu'n kyokx toju' tx'otx' tziya'ntltoq tu'n ttzaj tq'o'na kye.

16Aye'tzunkye exqe' ojtxi' qyajilb'ene' jaw kynima'n kyib' ex kub' kypi'sa'n kyib', ex mixti'x exi kyb'i'n tchaq'b'ila.

17Mixti'x xikyb'i'n ex min e'tzaj kyna'nju' b'a'nq'ob'aj te lab'te'n tb'inchaya te kolb'ilkye. Kub' kych'uẍsa'nkyib' ex okkyq'o'n jun nejenel kye tu'n tanj jumajtlkyi'j toju' yajb'ilkye toj Ejipt. Atzunta Dyos inkub' tnajsa'na il, che'w tk'u'ja ex ntzaj laqj tk'u'ja, min ntzajnaj ttx'u'jila ex nim tk'u'jlalila, mixti' e'kyaj tq'o'na.

18Expe' tej tkub' kyb'incha'n jun qpoj tman wakx k'uxb'il, ex kyma qa a dyosu' etzq'inkye toj Ejipt, ex kyb'incha txqan il nimxi'x,

19atzunta, tu'nju' nim tq'aq'b'il tk'u'ja, min e'kyajtq'o'na toj chq'ajlaj. Mixti' eltpa'n tib'ju' tnej muj kyi'j, ẍaqlulkye toju' kyb'e te q'ijtl, exju' tnej q'aq' te qonik'an q'olte spik'un toj kyb'e tu'n t-xikyljo'n.

20Expe' tzaj tq'o'na t-xewa b'a'n xnaq'tzalkye; tz'aqli kywa mana ntoq tzaj t-sma'na kye, ex tzaj tq'o'na a' kye tu'n tq'jenju' k'waj kyi'j.

21Kab'naq (40) ab'q'i tzaj tq'o'na kywa toj chq'ajlaj, ex mixti' jun ti'xti' mixwitti' kye: ex min ekub'aju' kyxb'alun ex min ximal kyqan tu'n kyb'etb'en.

22E'kub' tq'o'na kawb'il ex nimaqtnam toj kyq'ob', ex b'ajx tpa'na tx'otx' toj tneji'n kye, kub'tzun kytzyu'n Esb'on, ttanamju' nimaqkawil Seon ex B'asan, ttanam nimaqkawil Ok.

23Tb'inchaya tu'n kychmet txqan kyk'wal kse'n kyajlalju' che'w twitz kya'j, ex eb'ajxtiq'i'na tu'n kytzyunte kytx'otx' toju' tx'otx' ojetoq ttziyaya tu'n ttzaj tq'o'na kye ojtxi' qyajilb'ene'.

24Eb'jo'kxtzuntz toj ex kub'ti'ju' kytx'otx' aj Kanaan kyu'n; eb'aj kub' tme'ssa'na najli qe'toq toju' tx'otx' lu kywitz, eb'aj kub' tq'o'na kynimaqkawil exqe' xjal toju' tnej tx'otx' lu toj kyq'ob' tu'n kyb'inchante kye aju' kyajb'il.

25Eb'jo'k te kyajawju' nintnam tok nimaqtapi kyi'j ex txqan tb'anil tx'otx', ex txqan ja nojniqe' kyu'n ti'xti' tb'anilqe', e'xoch ex tqan awal ub'a, e'tqan olib'o, ex nim txqantl tqan lob'j; inxi'xtoq che wan b'a'nxi'x ex b'je'tz kywitz, b'aj kynik'b'e'n txqan t-xtalb'ila.

26Aye'tzunkye min eb'in teya, jawkyiq'i'nkyib' ti'ja ex el kyik'o'n tkawb'ila. Expe' eb'aj kub' kyb'yo'nju' t-sanjelala, eb'ajx q'mante kyekywitz tnam qa ati kyil ex tu'ntoq tanjtzkyi'j tuk'i'la, ex nim ttx'u'jila okkyq'o'n.

27Qu'mtzun exa' tq'o'na toj kyq'ob'ju' kyajq'oj, eb'ajkub' yajunkye. Yajxi'tzuntl, tej intoq che oq', e'qanin o'nb'il teya, atzunta, tu'nju' inxi'x q'aq'an tk'u'ja, e'tzaj tb'i'na tzmax toj kya'j, e'tzaj tq'o'na xjal klol kye toj kyq'ob'ju' nche yajunkye.

28Aye'tzuntlkye, naqa xten ch'i'n nak'b'il kye, nche aq'witl b'inchal il twitza; qu'mtzun e'kyajtq'o'na tu'n kykub'tz'aq toj kyq'ob' kyajq'oj, ju' eb'jo'kten yajlalkye. Intoqtzun che qanintl o'nb'iltz teya, atzunta, inxi'x q'aq'an tk'u'ja, nche tzaj tb'i'na tzmax toj kya'j, b'a'npun maj e'ttzaqpiya.

29Intoq tzaj tq'o'na kynab'l tu'n kyjapuntlju' tkawb'ila kyu'n; aye'tzunkye atixi'x kynab'l toj kywitz ex min e'xikyb'i'n tchaq'b'ila; intoq che ik' kyib'aju' tchaq'b'ila, ju' ntq'o'n kychwinqalalju' nche'x b'inchante; jawkyiq'i'nkyib' ti'ja, min xikyb'i'n ex min xikynima'n.

30B'a'npun ab'q'i min ntzajnaj ttx'u'jila kyi'j ex b'ajx toqxena'na kye tu'nelju' t-xewa ex toj kytziju' t-sanjelala; extzun mixti'x xikyb'i'n, qu'mtzun exitq'o'na tjaq' kykawb'ilju' nimaqtnam twitz tx'otx'.

31Tu'ntzu'n nim tlaqb'il tk'u'ja, min e'kub' tb'ajsa'na ex minti' e'kyaj tq'o'na; qu'n aya Dyos che'w tk'u'j ex nq'aq'an tk'u'ja nimxi'x.

32Qu'mtzun, aya Dyos Manb'aj qib'aje', nimxi'x toklena, nimtipumala ex xob'ajilxa, kukx tjapun tyolju'ya kyejni b'entti'j ex nim tk'ujlalila, myanaqwit ch'i'nte' txqan yajb'il matxi' tzajxi' kyi'ju' qnimaqkawile', e'qnejele', e'pale ex t-sanjelala, ex kyi'ju' ojtxi' qyajilb'ene', ex tkyaqilju' tnam, ttzajlenx toj kyq'ijlalilju' nimaqkawil aj Asirya tzmax ja'lo.

33Ex myata ati tpaj tu'n tkyaqilju' matxi' tzik' qi'je'; qu'n matxi' japunta tu'n, ayo' qeju'ye' matxi' qo b'inchan ile' twitza.

34Exqepe' qnimaqkawile', e'qnejenele', e'pale, exqe'ju' ojtxi' qyajilb'ene', mixti'x japunju' tkawb'ila kyu'n ex mixti'x exi kyb'i'n tchaq'b'ila exqe' eb'ajx toqxena'na kye.

35Ape' kyb'inchaju', maskyepe' nim txqan q'inumal ex jun nim tb'anil tx'otx' tzaj tq'o'na kye, mixti'x ek'ulun teya ex mixti'x kyej kytzaqpi'nju' kyb'inchb'aj myab'a'n toju' kykawb'il.

36Qo tka'yintztzuna ja'lo, lq'o'n majinqo'ye tojxju' tx'otx' tzaj tq'o'na kyeju' ojtxi' qyajilb'ene' tu'nwtlo kywan ti'ju' tb'anil ex tawalju' tx'otx' njaw.

37Kyekye' nimaqkawil nxa' txqan tawalju' tx'otx' njaw, e'kub' tq'o'na qib'aje' tu'n tpaj qile'. Tjaq'ju' kyajb'il ta'qo'ye' kyuk'i'lxi' qalu'ne'. Qu'mtzun inxi'x qob'isune', chechij te Dyos.

Kyej b'entti'j tyolu' tnam tu'n tjapun kawb'il tu'n

38Tu'n tkyaqil ja'lu, qq'a'qib'e' ti'ju' qyole' kjel tz'ib'et, atzunju' u'j k'okyel seyaret kb'el kysqitu'n qnejenele' ti'j, e'aj Leb'i ex e'pale.