1 Cr 28 - Mam Ostuncalco Bible

Ok Salomon te t-xel Dab'i

1E'tzaj tb'u'yi'n Dab'i toj Jerusalen kykyaqilju' ati kyoklen toj kawb'il toj Israel: e'nejenel kye junjun tnej kyyajajil, kye junjun aq'pun xjal te q'oj nche ajb'en te nimaqkawil, kye chaq'ul kye b'a'npun k'loj xjal te q'oj ex kye nimaq tnej, exqe' nejenel nk'ul aq'untl toj tkyaqilju' ttx'otx' nimaqkawil ex talu'n, ex kyeju' tk'wal, e'xjal nimaqxi'x kyoklen ex kykyaqilju' b'a'nxi'x kyu'n kyxolu' xjal te q'oj.

2Jawtzun we' Dab'i ex tma: Chin kyb'intze' witz'in ex ntanam: Xima'ntoq wu'ne' tu'n tjaw nb'incha'ne' jun najb'il tu'n ttenju' kax k'ub'lteju' yol kyejni b'entti'j tu'n Qman Dyos ex awtloju' ja matzaja' tka'yi'n Qman Dyos, ex matxi'toq b'aj nb'u'yine' aju' nojqelan tu'n tb'inchet.

3Atzunte Dyos tzaj tma'n weye': Myata kjawil b'inchante jun ja weye', qu'n jun xjal q'ojil ta ex matxi' qojli chik' tu'na, chij.

4Tu'npetzunju', machin jaw t-sk'o'ne' Qman Dyos, nkyk'u'n aj Israel, kyxol kykyaqilju' toj njaye', tu'n wokye' te kynimaqkawil aj Israel tejumajx. Jaw t-sk'o'nju' tnej tyajajil Juda tu'n tkawin; kyxoltzu'n tyajajil Juda jaw t-sk'o'nju' njaye'; ayintzune' ẍin jaw t-sk'o'n kyxolju' ntzike' tu'n wokye' te nimaqkawil tib'aj tkyaqil Israel.

5Atzu'n ja'lo, kyxol kykyaqilju' nk'wale', nim kyb'aj saj tq'o'n Dyos weye', matxi' jaw t-sk'o'n Qman Dyos nk'wale' Salomon tu'n tokx qe toju' q'uqb'il te tkawb'il Qman Dyos tib'aj Israel.

6Ex tzaj tma'n Qman Dyos we'ye':

A Salomon ju' tk'wala kjawil b'inchante ja weye' exqe' tpen, qu'n matxi' jawnsk'o'ne' te nk'wale', ayintzunwe' Manb'aj te,

7ex knkuwsa'ye' tkawb'il tejumajx, qa matz'oktilil tu'n, tu'n kyjapunju' nchaq'b'ile' ex nyole' tu'n kse'n ntb'incha'n ja'lo, chi Dyos.

8Atzu'n ja'lo, twitz Qman Dyos in b'in qe ex kywitze' kykyaqile' aj Israel toju' b'uyjtib'il te Dyos, tz'oktililx kyu'ne' tu'n kyjapun tkyaqilju' tchaq'b'il Qman Dyos, tu'ntzun ttenju' tx'otx' lu tb'anilxi'x toj kyq'ob'e' kukxju' ex tu'n tkyej kyq'o'ne' te kyetzb'il kyk'wale'.

9Atzunta nky'ajul, Salomon, tz'elx tnik'a ti'ju' Dyos janchin k'uluna'ye' ayine' tmana, tz'ajb'ena te tu'n tkyaqil tk'u'ja ex tu'n tk'u'ja, qu'n inb'aj tka'yi'n te Qman Dyos tkyaqilju' ati qoj ex inel tniky' ti'j alkyexku' qxim. Ikytzu'n, qama jyona ti'j, kknetel tu'na; qatzun matz'el tpa'ntib'a ti'j, k'elel ik'o'na tu'n tejumajx.

10Na'nku'tzun tu'na qa matxi' jaw sk'o'na tu'n Qman Dyos tu'n tjaw tb'incha'na jun ja te tja xjan. Qu'mtzun, ¡Kuwsam tib'a ex b'incha'nktza! chi Dab'i.

11Xi'tzun tq'o'n Dab'i ju' tilb'ilalu' ja te Salomon ju' tk'wal, kse'n ktenb'ela' tja Dyos, exqe'ju' txqantl ja, e' k'ub'l ti'xti', e'mqo'n ate'qe'ktz jawl, e'mqo'n tojxi' exu' najb'il xjanxi'x.

12Ex xitq'o'n Dab'i jun yek'b'il ti'j tkyaqilju' xima'ntoq tu'n, tu'n kyb'inchetju' tpen tja Dyos exqe' mqo'n tu'n kyten ti'jile, e'k'uwenj ex e'k'ub'lkye oyaj xjansa'nqe',

13exqe'ju' mqo'n jatu'n kych'exb'ente kyib'u' pale ex tyajajil Leb'i ex te tkyaqilju' ajb'eb'l teju' tja Dyos, ex kykyaqilju' ti'xti' tu'n kyajb'en toju' k'u'lb'il toj tja Dyos.

14Ex xitq'o'n txqan q'anpwaq ex saqpwaq te, tu'n kyb'inchetju' ti'xti' q'anpwaq ex saqpwaqqe' tu'n kyajb'en toju' k'u'lb'il;

15tu'n kyb'inchetju' kykb'el kandil, q'anpwaq ex saqpwaqqe', kse'nxju' talal teyile junjun;

16ex ikx tu'n kyb'inchetju' mes, q'anpwaq ex saqpwaqqe', jatu'n kykub' txoleta' wab'j xjansa'n.

17Ex xitq'o'n q'anpwaq te, tu'n kyb'inchetju' xokb'il, nimaqlaq, xar, ex xitq'o'n txqan q'anpwaq ex saqpwaq te tu'n kyb'inchetju' k'wab'l, kse'nxju' talal junjun.

18Ex xitq'o'n txqan q'anpwaq tb'anilxi'x tu'n tb'inchetju' q'olb'eb'l tz'e'ysb'il sturak, ex xitq'o'n q'anpwaq tu'n tb'inchetju' kykarwaj kyerb'in lik'u'n kyxik' te kutxb'ilte' kax k'ub'lteju' yol kyejni b'entti'j tu'n Qman Dyos.

19Tkyaqil ja'lu tz'ib'a'ntoq tu'n Dab'i kse'nxju' tzaj tyek'u'n Qman Dyos te, ja chik'b'a'na' tkyaqilu' aq'untl tu'n tb'inchet kse'nxju' yek'u'n toj tilb'ilal.

20Xi'tzun tma'n Dab'itz te Salomon: ¡Kuwsam tib'a ex we'ku'ya, tz'aq'unantzuna! ¡Lalun tz'anjtzti'j tk'u'ja ex lalun xob'a, qu'n ktenb'il te Qman Dyos tuk'i'la! Lay kyej q'o'na ex lay kyej kolb'e'na tu'n tzmaxi'j ajtjapun b'aj tkyaqilju' aq'untl tu'n kyajb'en toju' tja Dyos.

21Luqe' pale ex tyajajil Leb'i, nk'u'n kyten tu'n kych'exb'ente kyib', naq ate'qe'tl tu'n kyajb'en toju' tja Dyos; ex ate'qe' chukchaq xjal nkyq'o'n kyib' tu'n kyonin tuk'ila, tu'n kyb'inchetju' chukchaq aq'untl, atixi'x b'a'n kyu'n ti'j chukchaq ajb'eb'l; ex luqe' nejenel ex tkyaqilju' tnam ate' tu'n kyajb'en teya, chi Dab'i.

Blog
About Us
Message
Site Map

Who We AreWhat We EelieveWhat We Do

Terms of UsePrivacy Notice

2025 by iamachristian.org,Inc All rights reserved.

Home
Gospel
Question
Blog
Help