Pr 6 - Mam Ostuncalco Bible

Oqxenb'il kyeju' nkyq'o'n kyyol ti'j tk'as juntl

1Nky'ajul, qama taq'tib'a yolil ti'j tk'as tamiwa

mujqa ti'j tk'as juntl xjal,

2Xpatxab' nkub' tq'o'na toj tb'eya:

Axju' tyola nkub' jtz'onteya.

3Tu'ntzun ttzaqpeta nky'ajul,

atina'ya toj tq'ob' juntl,

a b'inchamju'ya:

me'ssankutib'a ex kutxi'ya yolil tuk'i'lju' jata' k'as tu'n ttzaqpinjtza tu'n.

4Lalun wtana,

lalun txitq'o'n che'wa toj;

5kutoqa kse'n jun msat ajtkub' oq twitz jun ub'al;

kse'n jun pich' ajtoq te xpatxab'.

Tzak'b'ilkye ky'aj

6Nimaqky'ej, ka'yi'k qepe'ju'ya snik;

ka'yinxa titi' nb'ajkye, ex knomil jun tnab'la kyi'j:

7maskyepe' mixti' jun kynejel

ex mix-a'lo' chq'olkye ti'j kyaq'un,

8nb'aj kyk'u'n kywa toj q'ijal,

nb'aj kychmo'n ajtb'uyet twitz awal.

9¡Wix we'ktza ky'aj!

¡Wix jawe'ya!

10Qu'n qa nxnakwiya ex nwitzk'ana,

inxi'x kub' tchle'n tq'ob'a tu'n twtana b'a'nxi'x,

11tzul prowil ex k'okyel tzaqpaj ti'ja

naku'j jun eleq' iq'i'n tq'aq'.

Se'n ka'yinju' b'inchal myab'a'n

12Aju' b'inchal myab'a'n ex elsal ch'xaw

naq nchan yol kukxju';

13nxmutz'mun twitz,

nkub' tjuma'n tqan

nyek'laj kyu'n twi'tq'ob';

14naq taq'wix tokx toj twi',

o'kxtzu' nximana' tu'n tb'inchan myab'a'n

ex naq njyon q'oj.

15Qu'mtzun, noqx minab'en ajtk'ulb'an;

naq jun mutz'inx kb'o'ljela'

ex layx b'entl.

Ti'xti' nche eltik'o'n Qman Dyos

16Ate' qaq ti'xti', wuq penate'

majx ik'o'nqe' tu'n Qman Dyos,

17aye'ju' nimjtib'il,

chajyolil,

b'yojxjal mixti' kyil.

18Aju' xjal majx nximan tu'n tb'inchan il,

exju' noktilil tu'n, tu'n tb'inchan myab'a'n,

19aju' nok tq'o'ntib' tziyal chajyolil,

exju' njyon q'oj kyxol xjal kyitz'in kyib'.

Aju' il ntzaj tu'n tpaj ajpaji'n

20Nky'ajul, majx na'nqe'ku'ju'ya tchaq'b'il tmana

ex t-xnaq'tzb'il ttxuya.

21Majx na'qeku'ya,

uwanqe'ka tqula,

22kẍaqlunjtzela kyu'n aj txi'ya toj tb'eya,

kxq'uqinjtzela kyu'n aj twtana,

che yolil teya aj ttzaj tna'ntib'a.

23Axxi'x, spik'un qe'kye' chaq'b'il ex xnaq'tzb'il;

tb'eyil chwinqlalte' tzak'b'il ex nab'l.

24Kklonjtzela kyu'n teju' qya b'inchal myab'a'n,

ex kye' tyolju' qya ajpajil kyexi'x tb'inx.

25lalun tz'oklaqja ti'ju' ka'yin;

¡lalun txab'tzeta tu'n twitz ajttzaj ka'yin teya!

26Aju' qya eqch ntq'o'ntib' naq tu'n twa,

atzunte' qya ajpajil axi'x ntjyo'nju' ichan b'a'n ta'.

27Alkyete makub' tq'o'n q'aq' ttzitk'u'j,

kb'ajel tz'e'yju' t-xb'alun.

28Alkyete' mab'et tib'aj ttxalq'aq',

kb'ajel tz'e'y tqan.

29Ikxtzun matz'okx tq'o'n tib'ju' tuk'i'l t-xu'jil juntl,

ilti'j kyb'el tz'e'ysa'n twitz.

30Lay tz'el ik'u'n jun eleq'

qama tz'elq'an tu'n tpaj twa,

31qatzun matz'elyal,

ati tu'n tchjonte wuq maju' teleq',

expe' kxel tb'ajsa'n tkyaqilju' ati te.

32¡Mixti'x tnab'lju' ichan nokx tq'o'ntib' tuk'i'lju' qya ati tchmil

Qu'n ax nkub' b'o'ljsantetib'!

33Kb'ajel b'yo'n ex kb'ajel yasu'n,

ex layx tzik'tna'lju' tch'ixaw.

34Qu'n ikyte ichan kuw xk'yaqlin kse'n q'aq',

layx kub' tnajsa'n til qama tzyet tu'n;

35lay tk'am qama txiq'o'n jun oyaj te,

b'a'n qama txiq'o'n txqan oyaj te layx kub' tk'u'j.