Is 30 - Mam Ostuncalco Bible

Kyi'ju' nkyjyo'n tonb'il Ejipt

1Intma'n Qman Dyos kjalu:

¡Qab'anx kywitzju' nk'wale' pi'sqe',

nkub'kynk'u'n kyxim ex min ntzaj kyma'n weye',

nb'aj kynk'u'n kyaq'un ex mixti'we' nxinma'n kye,

inxi'xtzun b'aj kychmo'nxi'x kyiltz!

2Ojqelxi'x kyel ajkyb'ajx toj Ejipt,

atzu'n weye' min nchi xjelun;

nche b'ajx klolkyib' tuk'i'l paraon,

nkyklo'nkyib' tjaq' t-xlekumal Ejipt.

3Oktzun k'elel kych'ixaw toju' kolb'il kyib' tuk'i'l paraon,

xi' che b'elẍkyeqaxa' tu'n o'nb'il nkyjyo'n toj Ejipt.

4B'a'nqa maxi'toq che b'ajx kychq'o'ne' t-xel kawil

tzmax kyoj nimaqtnam Soan ex Anes,

5kykyaqilx k'elel kych'ixaw tu'n nintnam mixti' b'a'n tu'n lu,

layx che toni ex mixti' tajb'en kye,

naq b'is ex xitb'il ntq'o'n, chi Dyos.

6Tpakb'alil kyi'ju' alu'mj toj Nekeb':

Nche b'et xjal toju' tx'otx' xob'ajilx,

janajlaqe' b'alun nche tzanun,

e'kan wotz ex nimaq kan nche lipan,

nb'ajx kyiq'i'n kyk'uwen ex kq'inumal

kyi'j b'ur ex kyi'j kamey

tzmax Ejipt, toju' tnam mixti'x tajb'en,

7mixti' tipumal ex lay b'ent tonin.

Qu'mtzun a tb'iju' wu'ne':

Nin txkup ntzanun ex mixti'xte ntb'incha'n.

8Kutzaja ja'lo ex tz'ib'anku'ya twitz jun tz'lan,

tz'ib'anku'ya toj jun u'j

tu'n tkyejten toju' tq'ijlalil tzul,

te jun tziyb'il tejumajx.

9Majx pi'sqe'kye' xjal lu, min njapun kyol kyu'n,

min kyajb'il tu'n kyb'i'nte t-xnaq'tzb'il Qman Dyos.

10A nxikyma'n kyeju' xjal npon kynab'l: Lalun che witzk'antle', chechi,

ex nxikyma'n kye sanjelal: Lalun che tzakyma'ne' yek'u'n ax qeye';

aye' yol mya kuwqe' kymanqe'tze' qeye';

lalun tz'el kyiq'i'ne' qtzalajb'ile'.

11Kypa'mil kyib'e' ti'ju' b'e,

lalun che'xe' toju' b'e tzinun,

lalun kub' kyq'o'ne' Dyos Xjan kye aj Israel qwitze', chechij.

12Qu'mtzun ntma'n Dyos Xjan kye aj Israel ikjalu:

Inel kyik'o'nkyeye' oqxenb'il lu,

nokqekyk'u'je' ti'ju' q'oj ex ti'ju' myab'a'n,

ex a oksla'nju' kyu'ne';

13qu'mtzun, ati kypaje'.

Ikyqe'ye' kse'n nintapi nimin twe' b'ajni lo'n t-xe

naq myanim ajttzaj niq'j;

14che b'elxitu'ne' kse'n jun nin tx'otx' xar,

majx nkub' b'uchj

mixti'xte jun piẍ nkyaj

tu'nwt tajb'en jotb'il ttxalq'aq'

mujqa te pulb'il a' toj xoch, chij.

15Ntma'n Qman Dyos Xjan kye aj Israel ikjalu:

Kutanjtz kyi'je', qex kyk'u'je' ex che kletele'.

Ktenb'el kyipumale' qa min nche b'isune' ex q'uqli kyk'u'je', chij.

Aye'tzunkye' min kyaje',

16ape' kymaju'ye': Lay, ate b'a'n qo oqele' ti'j chej, chechije'.

B'a'natzun, ikykb'ajelju' ajkyxi oqe'.

Ex kymaye': Qo jawixe' kyoj karwaj kuw che ojqelan, chechij.

B'a'natzun, kuw che ojqelanju' che kxe'l lpe kyi'je'.

17Kab'k'al lajnaq (1,000) xjal che b'el oq twitz jun xjal,

kykyaqile' che b'el oqe' kywitz jwe' xjal,

tzmaxi'j aj kyko'pje'

kse'n jun tze nkyej tx'ikye twi' jun witz

mujqa kse'n jun techlal jawniq'o'n twi' jun ttxa'nwitz.

Yol tziya'ntl tu'n tlaqb'il tk'u'jlalilju' tnam

18Atzunte Qman Dyos nayon kyeye', tu'n ttzaj q'aq'an tk'u'j kyi'je'; tajb'ilxi'x tu'n tyek'u'nte tk'u'jlalil kyi'je', qu'n tnik'alti'jte Qman Dyos. ¡B'a'nqe'xkye kykyaqil xjal q'uqli kyk'u'j ti'j!

19Tnam Syon, najliya Jerusalen: lay tz'o'q'tlta. Ktzajel q'aq'an tk'u'j Qman Dyos ti'ja ajtb'inte nẍch'ina nqanin o'nb'ila, naqntzajb'i'na tu'n, ktzajel ttzaq'we'n.

20Ex maskye matzaj tq'o'n Qman Dyos yajb'ilte twaya ex b'is te tk'wa'ya, ate xnaq'tzalteya, lay kub' ewantl; tu'nku' twitza ktka'ya'ya.

21Qatzun matxitxalpuja toj tb'a'nq'ob'a mujqa toj tnayaja, ktb'i'ya jun nyolin ti'jxi'ya ex ktma' teya: Lute b'e tzalu, kukxi'ye' tzalu, ch.

22Oktzun che eleltik'u'na twitzleb'a saqpwaq exqe' ktxu'n kyi'j tu'n q'anpwaq, mixyab'a'nqe'tl teya. Che eleltik'u'na kse'n tz'is mixyab'a'n.

23Ktzajel tq'o'n Qman Dyos jb'al tib'aju' ij kxel tawa'na, ex ktzajel nim ttriya lantwitz toju' tx'otx'. Nim kywa twakyixa ktenb'el toju' q'ij lu.

24Exqepena' tman twakyixa exqe' tb'ura nche aq'unan toj kojb'il ktenb'el kywa tb'anilxi'x.

25Ajtpon tq'ijlalil tu'n kyb'yet nim xjal ex ajkykub' xitu'n ja kuwsa'nqe', kche b'etel nin a' ex tnimal a' kywi' witz ex kywi' b'us.

26Ktq'a'na' Qman Dyos ex k'okyel tptzo'n tk'ixb'len ttanam. Kk'anteltzun xjawtz kse'n q'ij, atzu'n q'ij kk'antel wuq majtl kuw, kse'n ajkyk'ant wuq q'ij junx.

Tz'e'ysb'il twitz tnam Asirya

27Kyka'yinxe', aku' Qman Dyos tzul najchaq;

nxi'x tx'u'jin kse'n txqan sib' nb'uqchaj,

nxi'x yolin tuk'i'l ttx'u'jil,

ikytyolju' kse'n q'aq' majx nttz'e'ysa'n,

28ikyt-xewju' kse'n jun nin a' nexlaqj

njapunx tjaq' tqul jun xjal;

tzul q'ol jun iqtz kyib'aju' nimaqtnam,

tu'n kykub' t-xitu'n,

k'okyex tq'o'n k'uxb'il toj kytzi tnam juk'b'ilkye,

tu'n kykub' tzpet.

29Atzunkye' k'okyel b'itz,

kse'n jun tzalajb'il xjan te qonik'an;

ktzalajel kyanmiye',

kse'n xjal nb'et toj tq'ojq'ojel chun

tu'n txi' twi' witz te Qman Dyos,

aju' kolb'ilkye aj Israel.

30Kb'injtzel tq'ojq'ojel twi' Qman Dyos kuwxi'x,

ex ktyek'u' tipumal, kq'ojil tuk'i'l ttx'u'jil xob'ajilx,

tuk'i'l jun q'aq' tkyaqil inb'aj tu'n,

tuk'i'l q'ankyaq, txqan jb'al ex saqb'aqun.

31Ajkyb'inte tq'ojq'ojel twi' Qman Dyos ex ajtkub' tz'e'ysa'n kywitz.

Okxi'x k'okyeltchi kyi'j aj Asirya,

32ex atl junjun maj kykub' tjuma'n Qman Dyos,

che q'ajtel tanb'or ex arpa

Kq'ojilte Qman Dyos xob'ajilx kyi'j.

33Atxi'x ojtxi'

b'incha'ntlte' kyi'j aj Asirya ex ti'j kynimaqkawil

nim twitzju' najb'il te yajb'il ex nim t-xe,

jun ninq'aq' nk'ant tu'n txqan si.

Kjawil tk'ansa'n Qman Dyos tu'n t-xew,

naku'j txqan q'ol.