Am 6 - Mam Ostuncalco Bible

Xitb'il tib'aj Israel

1¡Qab'anx kwitzju' nche anq'in toj achb'il toj tnam Syon!

¡Qab'anx kwitzju' q'uqlok kyk'u'j ti'j tnam Samarya,

aye'ju' nejenel nimaq kyoklen toju' nimintnam,

janche b'ajxa' aj Israel qanil o'nb'il!

2Kupe' kxi'ye' toj tnam Kalne, ex kyka'yime';

ex kukxi'ye' toj Amat aju' nintnam,

ex kyku'xe' toj Kat ktanam pilistey.

¿Ma mastzun b'a'nqe'kye' kyekywitzju' tnam lu?

¿Mujqa mastzun b'a'nju' ktaname' kwitzju' tnam lu?

3Mixti' kyajb'ile' tu'n kximane' ti'ju' q'ij taq'wix,

extzun aye'xe' nche tzaj iq'inte tkawb'il taq'wix.

4Kuẍlqe'ye' tib'aj xa'wan kuẍb'il ktxu'nti'j tu'n b'aq,

ex nxi' knuqi'n kyib'e' twitz toju' kninq'ije';

nok nimaqwan kyu'ne' kyu'n qpoj tman rit ex kyu'n qpoj tman wakx q'u'sqe'.

5Nxi' kychinb'a'nju'ye' xux mixti'x ttx'o'lajil toj twi';

nb'ajkub' kyxima'n chukchaq kychinab'e', kse'n tb'incha Dab'i;

6nche k'wan ta'l ub'aye' toj nimaq mlon,

ex najb'en tb'anilxi'x k'ok'sb'il kyu'ne',

¡ex mixti' nche' ximane' qa xi' tkub' b'o'lju' tnam kyu'ne'!

7Aye'kye' che kxe'l iq'i'ne' tnejelxi'x toj juntl tnam,

atzuntzu' kb'ajela' toj twi'ju' nimaqwan nkyb'incha'ne'.

8Oje tma Qman Dyos jun tyol tu'n tjapun tu'n;

aku' Qman Dyos nimtipumal inq'mante kjalu:

Nel wik'u'nju'ye' nimjtib'il nkb'incha'nju' ttanam Jakob';

nche elwik'o'ne' tja nimaqkykawb'il;

kxe'l nq'o'ne' nintnam toj kyq'ob'ju' ajq'oj,

kyuk'i'lxi' tkyaqil ati toj.

9Qama che kyej anq'in lajoj ichan toj jun ja, ilti'j che kyimel.

10Nimte' xob'ajil tzul, qu'n qama tz'okx jun iq'imitzte t-xmilal jun twitze'l matxi'toq kyim tuja, exqa matxi' tqani'n te juntl twitze'l nb'et toju' ja: ¿Ma atix juntl tuk'i'la? Qa chi. Atzunju' juntl ktzajel ttzaq'we'n: Mix-a'lo' chilo. Atzunju' xixjelunte kxe'l tma'n: ¡K'uttziya, qu'n jaku' jaw tma'na tb'i Qman Dyos!

11Qu'n tzul tq'o'nte' Qman Dyos tz'e'ysb'il witzb'aj kyib'aj nimaq ja ex k'ok'e', kykyaqilx majx che kjel xitu'n.

12¿Ma jaku' b'ent kyojqelanju' chej twitz pik?

¿Ma jaku'tzun b'ent tkjetju' ninnjab' kyu'n wakx?

¡Matxi'na' tz'okju' tnik'alilti'j kyu'ne' te b'i'yb'il

ex matxi' tz'okju' tnik'alilti'j kyu'ne' te k'ixk'oj!

13Naqx kyak'a'ne' nche' tzalaje' qu'n nkma'ne':

Matxi' tenqe' qipumal qib'xqib'e'. Chechije'.

14Kyb'intzpe'ye' b'a'nxi'x aj Israel; chi Qman Dyos nimtipumal ntma'n:

Kjawil wiq'i'ne' jun nimintnam kyi'je'

tu'n tokten yajulkyeye',

ktzajelx toj tb'a'nq'ob' kya'j ex kpomelx toj tnayajkya'j.