Lv 9 - Mam Ostuncalco Bible

Tzyet taq'unan Aaron te pale

1Tojtzu'n twajxaqi'n q'ij e'tzaj ttxko'n Moyses Aaron kyuk'i'lju' tk'wal, exqe' tijwnaq kyxol aj Israel.

2Ex xitma'n te Aaron: Q'intza jun qpoj tman wakx te chojb'il tu'n tpaj il, ex jun tman rit mixti' ttzakajil tu'n tkub' q'et te chojb'il k'ok'sb'il ex q'onku'ya twitz Qman Dyos.

3Atzu'n kye' aj Israel q'manxa tu'n ttzaj kyiq'i'n jun tman chib' te chojb'il tu'n tpaj il, jun qpoj tman wakx ex jun qpoj tman rit te jun ab'q'i qe' ex mixti' kytzakajil, tu'n kykub' q'et te chojb'il k'ok'sb'il.

4Ex jun tman wakx ex jun tman rit tu'n kykub' b'yet twitz Qman Dyos te jun chojb'il te mujb'ab'ltib'il. Ex tu'n ttzaj kyiq'i'n jun oyaj triy xyuq'i'n tuk'i'l aseyt, qu'n ktyek'u'tib' Qman Dyos kywitz ja'lo, chij te.

5Xi'tzun kyiq'i'n aj Israel tkyaqilju' tchaq' Moyses kyetwitzju' Ja te Mujb'ab'ltib'il, kykyaqiltzunju' tnam e'pon ex e'kub' we' twitz Qman Dyos.

6Tmatzun Moysestz: a matxi' tchaq' Qman Dyos kyeye'. Kyb'inchame', atzunte Qman Dyos kb'el tyek'u'ntib' kywitze' toj nim tajwalil, chij kye.

7Ex xitma'ntl Moyses te Aaron: lq'exa tk'etz q'olb'eb'l, ex q'onku'ya chojb'il saj tiq'i'na tu'n tpaj tila exju' alu'mj kb'el tq'o'na te chojb'il k'ok'sb'il tu'n tnajset tila ex tu'n tnajset kyil aj Israel. Ex q'onku'ya kyoyaj aj Israel tu'n najset kyil, kse'nxju' oje tchaq' Qman Dyos, chij te.

8Xi'tzun lq'e Aaron tk'etz q'olb'eb'l ex kub' tb'yo'nju' tman wakx tu'n tkub' tq'o'n tu'n tpaj til.

9Xi'tzun kylaq'b'a'n tk'wal Aaron ju' chik' tk'etz, atzunte Aaron, ku'x tak'sa'n twitq'ob' toj ex oktb'aku'n kyi'j tuk'a q'olb'eb'l, atzunju' jni'l kub' tqo'n t-xe tqan q'olb'eb'l.

10Ex kub' ttz'e'ysa'n unt tib'aj q'olb'eb'l exqe'ju' tchinaq' exju' unt tok ti'j twab'lju' alu'mj kb'el q'et te chojb'il tu'n tpaj il kse'nxju' ojetoq tchaq' Qman Dyos te Moyses.

11Atzu'n tchib'jil exju' ttz'umal e'kub' ttz'e'ysa'n ti'jxi'ju' kynajb'il.

12Ex kub' tb'yo'n Aaron ju' alu'mj inkub' q'et te chojb'il k'ok'sb'il, aye'tzu'n tk'wal xi' kylaq'b'a'nju' chik' te, atzunte Aaron kub' tqo'n tib'aj ex ti'jileju' q'olb'eb'l.

13Ex xikyiq'i'n twi' ex tchib'jilju' alu'mj toj tx'naji'n ju' inkub' q'et te chojb'il k'ok'sb'il, atzunte Aaron kub' ttz'e'ysa'n tib'aj q'olb'eb'l;

14ex b'aj ttxjo'nju' t-xqintxa exqe' tkux, e'kub' ttz'e'ysa'ntzuntz tib'aj q'olb'eb'l, ex tkyaqil t-xmilalju' alu'mj.

15Ex kub' tq'o'n Aaron oyaj tu'nkypaj aj Israel. Tzaj tiq'i'n tman chib' te chojb'il tu'ntpaj kyilju' tnam ex kub' tb'yo'n, kub' tq'o'n tu'n tpaju' il kse'nxju' ojetoq tb'incha nejl.

16Tej tkub' tq'o'nju' alu'mj ju' inkub' q'et te chojb'il k'ok'sb'il, tb'incha kse'nxju' q'ma'ntl.

17Ex kub' tq'o'ntlju' oyaj twitz awal k'ok'e'kywitz, ex kub' ttz'e'ysa'n tib'aj q'olb'eb'l, kyib'ajxi'tlu' chojb'il k'ok'sb'il inche kub' q'et te prim.

18Ex e'kub' tb'yo'n Aaron tman wakx ex tman rit inxi' kyq'o'n aj Israel te b'inchjtib'il. Xilaq'b'a'n chik' te kyu'n tk'wal, atzunte kub' tqo'n tib'aj ex ti'jileju' q'olb'eb'l.

19Ex xikyq'o'n ky-untilju' tman wakx ex tman rit te, exju' kyje ex ky-untilju' kyxqintxa exqe'ju' kychinaq', ex ky-untilju' kywab'l,

20ex kub' kyq'o'nju' unt junx kyuk'i'lju' ttzikyk'u'j. E kub'tzun ttz'e'ysa'n Aaron ju' unt tib'aj q'olb'eb'l,

21aye'tzu'n ttzikyk'u'j exju' kykux te kyb'anq'ob', naq tb'incha tu'me'l tu'n tq'onte twitz Qman Dyos, kse'nxju' tchaq' Qman Dyos te Moyses.

22Jawtiq'i'n Aaron tq'ob' ex e'kub' tky'i'wla'n aj Israel, tetzunj kyb'ajkub' tq'o'nju' chojb'il tu'n tpaj il, chojb'il k'ok'sb'il ex chojb'il te mujb'ab'ltib'il, el lq'e tk'etzju' q'olb'eb'l.

23E'okxtzun Moysestz tuk'i'l Aaron toju' Ja te Mujb'ab'ltib'il, atzunj kyetz e'kub' kyky'i'wla'n aj Israel. Kub'tzun tyek'u'ntib' Qman Dyostz nxi'x qoptz'aj kywitz kykyaqilju' tnam Israel:

24etz q'aq' twitz Qman Dyos ex b'aj patju' alu'mj tu'n, ju' atitoq tu'n tkub' tz'e'y exqe'ju' unt atitoq tib'aj q'olb'eb'l. Tetzunj kyka'yinte aj Israel ja'lu e'jaw ẍch'in kykyaqil tu'n kytzalajb'il ex e'kub' meje majx ku'pun kyplaj twitz tx'otx'.