Ez 41 - Mam Ostuncalco Bible

1Yajxi'tzuntl nxitiq'i'ne' ichan tojxi'ju' tja Dyos, ex e'kub' techa'n tqan ja: te oxe' metrchaq kylamal.

2Te jwe' metr twitzju' tjpel; aye'tzu'n tzuyb'ilte kab'e' metr tk'i' nik'jan twitz junjun. Ex kub' techa'n ninmqo'n toj tnk'yajchaqil, te winqi'n metr tnuqub' ex lajoj metr twitz.

3Yajxi'tzuntl xi' toju' mqo'n tojxi' ex eb'aj techa'n tqan ja te qokex, jun metr tlamal junjun. Oxe' metr twitzju' qokyex, aye'tzu'n tqan ja toj junjun plaj te oxe' metr tk'i nik'janchaq kylamal.

4Ex kub' techa'n mqo'n t-xexi', te lajoj metr junjun plaj. Tzaj tma'ntzuntz weye': Ate najb'il xjanju' lu.

Aye' tal ja b'incha'nqe' twitz nintapi

5Ex kub' techa'n ichan tapi ti'jxi' tja Dyos, aju' tipumal te oxe' metr. Ti'jileju' tja Dyos, ate'k twitz, e'tal mqo'n te kakab' metrchaq twe'.

6Aye' tal ja lu, tojx jun tib'aj juntl, te oxox kolchaq, ate' junaq lajoj (30) tal ja toj junjun kol. Noqxi'x ch'i'nchaq toju' nintapi ti'j tja Dyos atl junjun kol, tib'ajtzu'n ttxa'nja etzniten ntzaja'qe kyqul tal ja, tu'n lalun che okx tojxi' nintapi.

7Jawni b'incha'n jun tnej tx'otx' kyi'jile tal ja ti'jile tja Dyos, japumni tzmax jawtl, tu'ntzunju' kb'antel kyjax xjal, tzajx twitz tx'otx' tu'n kyjapun toju' kol toj nk'yajchaq ex tu'n kyjapun jawtl.

8Wile' toj tkyaqil plaj, tojxju' tja Dyos tib'a jun tq'uqb'il nim toktza', ex b'incha'nqe' tal ja tib'aj. Te oxe' metr twe'ju' tq'uqlil lu,

9-10Atzu'n tapi kyi'ju' tal ja te kab'e' metr tk'i' nik'jan tpimal, ex kyajniten lajoj metr kyxolju' tal ja ti'jile tja Dyos kyuk'i'lju' kyja pale.

11Kab'e' tjpel kyajniten jun toj tb'a'nq'ob'kya'j ex juntl toj tnayajkya'j. Ati jun nintapi toj tnuqub'ju' kyajniten, te kab'e' metr tk'i' nik'jan tpimal.

Aju' ja toj tkub'exq'ij

12Atitoq jun ja toj tkub'exq'ij, tu'me'lju' pe'n jpu'nti'j, te junaq o'lajoj (35) metr twitz, atzun kab'naq jwe' (45) tnuqub', ati jun nintapi ti'j te kab'e' metr tk'i' nik'jan tpimal.

Echb'ente tkyaqilju' ja te k'u'lb'il

13B'aj techa'n ichan tja Dyos, kab'naqlajoj (50) metr tnuqub' tu'n tkyaqil. Ex kab'naqlajoj (50) metr twitzju' pe'n jpu'nti'j tk'i'xi' ja ex nintapi ti'j.

14Ex kab'naqlajoj (50) twitzju' twitz tja Dyos tuk'i'lxi' twitzju' pe'n jpu'nti'j toj tjawetzq'ij.

15Ex xitecha'n tnuqub'ju' ja ati ti'jxi' tja Dyos, twitzju' pe'n jpu'nti'j, kyuk'i'lxi' nimaqtapi toj junjun plaj, kab'naqlajoj (50) metr tkyaqil.

Nuk'b'ente tja Dyos

Aye' tal ja tojxi' tja Dyos exju' ja te o'yb'il,

16-17tok tz'lan kyi'jile. Tok k'uxb'il kutxb'ilkye tokexspik'un ex tok tz'lan kyi'ju' tqul ti'jile te kyoxil plaj. Ex tok tz'lan ti'ju' tapi tzajx twitz tx'otx' japumni ja ta'qe' tokexspik'un, ex tib'ajxi' tjpel. Exju' ttapiyil tja Dyos, tojxi' ex ti'jxi',

18b'incha'nqe'k kyilb'ilal kyerb'in ex tut twitz, xolpi'nchaq kyten. Teyile junjun tilb'ilal kyerb'in kab'e' plaj twitz;

19-20twitz ichan toj jun plaj, nka'yin ti'j jun tut, atzu'n jun plajtl, twitz b'alun nka'yin ti'j juntl tut. Ikytzu'n, b'incha'nqe'k kyilb'ilal kyerb'in ex tut ti'jileju' tja Dyos, tzajx twitz tx'otx' japumni tib'aju' tjpel. Atzu'n ti'ju' ttapiyilju' ja toj nky'ajchaq,

21ate'k tze te kyaje' ttx'u'k te tqulju' tjpel.

Aju' q'olb'eb'l tze

Atitoq jun twitzju' qokyex toju' najb'il xjanxi'x, naku'j

22jun q'olb'eb'l tze, te jun metr twitz junjun plaj, atzun jun metr tk'i' nik'jan twe'. Ate'toq ttx'u'k ex tzeyile tq'uqb'il ex ti'jile. Tzaj tma'n ichan weye': Atzun mes ja'lu ati twitz Qman Dyos, chij.

Aye' tjpel

23-24Kakab' kyjpelju' ja toj nk'yajchaq tuk'i'lju' najb'il xjanxi'x. Kakab' kyxaq junjun tjpel nche jqet tu'me'l tapi.

25B'incha'n kyilb'ilal kyerb'in ex tut kyi'ju' tjpel mqo'n toj nky'ajchaq, ikyqe' kse'n ate'k kywitz nimaqtapi. Tok jun kutxb'il tzeyile twitzju' ja te o'yb'il ti'jxi'.

26Ate'toq tokexspik'un tok kutxb'il kyi'j toj junjun plaju' ja te o'yb'il, ex b'incha'n kyilb'ilal tut kyi'j. Ex ate'k kutxb'il kyi'ju' tal ja ate'k ti'ju' tja Dyos.