1 S 3 - Mam Ostuncalco Bible

Txokli Samwel tu'n Qman Dyos

1Atzunju' ku'xun Samwel intoq ajb'en te Qman Dyos tjaq' tnuk'b'il Elyi. Naqtoq eqch qa ma'x tzaj yolin Qman Dyos toju' tq'ijlalil lu, tu'n tq'onte jun tqanil te jun xjal; myatoq q'achq'al in nul tyek'u'ntib' jun tqanil te jun xjal toj naku'j witzik'.

2Tojtzun jun q'ij intoq wtanju' pale Elyi toju' tja, tej ljo'ntoq kynaju' twitz ex mixtoqti' nka'yinxi'xtl.

3Kuẍlitoq Samwel toj tja Qman Dyos, ja ta'toq tkaxilju' tchaq'b'il Qman Dyos. Inxtoq k'entiju' kantil toju' ja xjan.

4Tzaj txko'n tu'n Qman Dyos:

—¡Samwel!, chij.

—Atzunte Samwel xittzaq'we'n: luqine' lu, chij.

5Xi'tzun ojqelantz jatoq ta' Elyi ex xitma'n te:

—¿Ti'tzun?, luqine' lu, chij.

—Atzunte Elyi xittzaq'we'n te: mixti'we' nchin txkon ti'ja. Kutxi'ya wtal, chij te.

6Atzunte Qman Dyos txkon jumajtl:

—¡Samwel!, chij.

Jawtzun we' Samwel ex xi' tk'etz Elyi ex xitma'n te:

—¿Ti'tzun?, luqine' lu, chij.

—Atzunte Elyi xittzaq'we'n te: mixti'we' nchin txkon ti'ja nky'ajul. Kutxi'ya wtal, chij.

7Na'mxtoqtzun tojtzqinte Samwel Qman Dyos, qu'n na'mxtoq tyek'u'ntetib' te.

8Tzajtzun yolin Qman Dyos te Samwel toxmaji'n, jawtzun we' Samwel ex xi' q'malte te Elyi:

—Luqine' lu; ¿ti'tzun?, chij.

Kanetzuntz toj twitz Elyi qa a Qman Dyos ntxokon teju' ku'xun Samwel,

9ex xitma'n te:

—Kutxi'ya kẍeb'il; qatzun matxokon Qman Dyos teya, tzaq'we'nxa te: Yolina qu'n kb'el nb'i'nwe' ayine' tmajina, chiku'ya, chij. Xi'tzun Samweltz kẍeb'il toju' tkuẍb'il.

10O'kx tpon jumajtl Qman Dyos, kub'ten ex xittxko'n jumajtl kse'n tnejel:

—¡Samwel! ¡Samwel!, chij.

Atzunte Samwel xittzaq'we'n:

—Yolina qu'n kb'el nb'i'nwe' ayine' tmajina, chij.

11Xi'tzun tma'n Qman Dyos te:

—Knb'incha'ye' jun ti'xti' kyxol aj Israel expe' majx kch'yol kẍkyinju' kche b'ilte.

12Ilti'j kjapumel wu'ne' toju' q'ij lu, tkyaqilju' oje b'ajx nma'ne' te Elyi ti'ju' kb'ajel kyi'ju' toj tja.

13Oje txinma'ne' te qa kb'el ntz'e'ysa'n kywitzju'ye' toj tja tejumajx, qu'n b'i'ntoq tu'n qa taq'wix nkyb'incha'n tk'wal nwitze', extzun min exi'ttzak'u'n.

14Qu'mtzun oje ntziyaye' kyi'ju' toj tja Elyi qa layx kub'najsetlju' kyil tu'n chojb'il ex tu'n oyaj.

15Tb'ajlenxi'tzun ja'lu, kub'kẍe Samwel, tetzunj qsqix te juntl prim, e tjaqu' ttzi tja Qman Dyos. Intoq xob' Samwel tu'n txi' tman te Elyi aju' matxi'toq q'umli te toj naku'j witzik',

16Atzunte Elyi xittxko'n ex xitma'n te:

—¡Samwel, nky'ajul!, chij.

—Luqine' lu, chi Samwel xittzaq'we'n.

17Xi'tzun tqani'n Elyi te:

—¿Ti'tzu'n saj tma'n Qman Dyos teya? b'inchama xtalb'il lalun kub' tewa'na weye'. ¡Awt Qman Dyos kub' tz'e'ysante twitza b'a'nxi'x qama kub' tewa'n jun ti'xti'ya nwitze' ti'j tkyaqilju' saj tma'n teya!, chij.

18Xitzun tchik'b'a'n Samwel tkyaqil te, ex mixti' kub' tewa'n, tmatzun Elyitz:

¡Ana'te Dyos Manb'aj! ¡B'inchet-xwitju' b'a'n toj twitz!, chij.

19Ch'iyte Samwel ex onin Qman Dyos ti'j, ex japun tkyaqilju' tyol ojetoq txi' ttziya'n te.

20Kykyaqiltzu'n aj Israel, tzajx Dan twitz nqach toj tb'a'nq'ob'kya'j ponx B'eerseb'a twitz nqach toj tnayajkya'j, elkynik' te Samwel qa jun t-sanjelalxi'x Dyos.

21Ex kub' tyek'u'n jumajtltib' Qman Dyos te Samwel toj Silo, qu'n atoqtzu' intzaja' tma'na' tyol te Samwel;